மதுரையில் கொரானாவால் பாதிக்கப்பட்டவர்களின் எண்ணிக்கை 60 வரை உயர்வு

மதுரையைச் சேர்ந்த 4 பேருக்கு கொரோனா உறுதி செய்யப்பட்டது. மதுரை மேலமாசி வீதியை சேர்ந்த 38 வயதுள்ள நபரும்,  செல்லூர் பகுதியை சேர்ந்த 21 வயது நபருமாவர்.  இருவருக்கும் ஏற்கனவே கொரோனாவால் பாதிக்கப்பட்ட நபர்களிடமிருந்து நோய்த் தொற்று பரவியதாக சுகாதாரத்துறை அதிகாரிகள் கூறினர்.மற்ற இருவர்  காவல்துறையைச் சேர்ந்தவர்கள். ஒருவர் தெற்குவாசல் போலீசில் சிறப்பு சப்-இன்ஸ்பெக்டராக பணியாற்றி வருபவர். வயது 51. மற்றொருவர் போக்குவரத்துப் பிரிவில் தலைமைக் காவலராக பணியாற்றி வருகிறார். இரண்டு பேரும் கொரானாவால் பாதிக்கப்பட்டு தனிமைப்படுத்தப்பட்ட பகுதிகளில் பணியில் ஈடுபட்ட போது கொரானா பரவி இருக்கலாம் என தெரிகிறது. கொரோனா உறுதி செய்யப்பட்ட நான்கு  பேருக்கும் தீவிர சிகிச்சை அளித்து வருகிறார்கள்.  இவர்களுடன் தொடர்பில் இருந்தவர்களின் ரத்த மாதிரிகள் பரிசோதனைக்காக எடுக்கப்பட்டுள்ளன. தொடர்ந்து அவர்கள் வசித்த செல்லூர், மேலமாசி வீதி, பழங்காநத்தம், பெருங்குடி பகுதிகளில் உள்ள தெருக்களுக்குச் சீல் வைக்கப்பட்டன. மேலும் சுகாதார துறையின் மூலம் அவர்கள் தங்கியிருந்த குடியிருப்பைச் சுற்றி கிருமிநாசினி தெளிக்கும் பணி நடைபெற்றது. காவல் நிலையத்தில் அவர்களுடன் பணியாற்றிய சக போலீசார் மற்றும் அவர்களது குடும்பத்தினருக்கு மேலவாசல் பகுதியில் உள்ள ஆரம்ப சுகாதார நிலையத்தில் வைத்து பரிசோதனை மேற்கொள்ளப்பட்டது. போலீஸ் நிலையத்தை சுற்றிலும் கிருமிநாசினி தெளிக்கப்பட்டது. மதுரையில் போலீசாருக்கு கொரோனா பாதிப்பு முதல் முறையாக உறுதி செய்யப்பட்டுள்ளது. தற்போது மதுரையில் கொரானாவால் பாதிக்கப்பட்டவர்களின் எண்ணிக்கை 60 வரை  உயர்ந்துள்ளது.