மன்னர் சின்ன மருது பிறந்த தினம் இன்று (1753).

ஏப்ரல் 20 வெள்ளையர்களை எதிர்த்து நாட்டிற்காகப் போராடிய மருது பாண்டியர்களில் இளையோர் சின்ன மருது பிறந்த தினம் இன்று (1753).
வெள்ளையர்களை எதிர்த்து மருது பாண்டியர்கள் நடத்திய போராட்டம் தென்னிந்தியாவில் நடந்த விடுதலைப் போரில் முதன்மையானதும், திருப்புமுனை கொண்டதாகும்.
மருது பாண்டியர்கள் தளபதியாகவும்,பிரதானியாகவும் ஆட்சிப் பொறுப்பிலும் இருந்த ஆண்டுகள் 1780 முதல் 1801 வரை. 
மருது பாண்டியர்களின் அரசு மக்கள் அரசாக குறிப்பாக விவசாயிகள் விரும்பிய அரசாக விளங்கியது.
அதற்குக் காரணம் அவர்கள் விவசாயிகளுக்கு பல அரசு உதவிகளை (சலுகையாகவோ, மானியமாகவோ) வழங்கிடும் நிர்வாகச் சீர்திருத்தங்களைச் செய்தனர். அடித்தள மக்களின் ஆதரவாளர்களாக மருது பாண்டியர்கள் விளங்கியதை பேராசிரியர்.கதிர்வேலின் "History of Maravas" நூலில் நரிக்குடி சத்திரச் செப்பேட்டில் காணப்படும் செய்தியைத் தருகிறார்.
ஆங்கிலேயர்கள் தென்னகத்தில் நிலை பெற்று ஆதிக்கம் செலுத்திய போது பல்வேறு சிற்றரசுகள் ( பாளையப்பட்டுகள்) வரி வசூலிக்கும் முகவாண்மையாக செயல்பட்டன.
பின்பு வரி வசூலிக்கும் உரிமையை தானே எடுத்துக் கொண்டு சிற்றரசுகளின் அதிகாரத்தை ஆங்கிலேயர் பறித்துக் கொண்டனர்.
அப்போதுதான் சிற்றரசுகள் சில விழித்துக் கொண்டு பொது எதிரி எனும் அடிப்படையில் ஆங்கிலேய ஆட்சியை எதிர்த்து ஒன்று படுகின்றன .இந்த ஒன்று படுத்துதல் முயற்சிக்கு முதலில் அடித்தளமிட்டவர்கள் மருது பாண்டியர்களாவார்கள்.
சின்ன மருது வெளியிட்ட "ஜம்புத்தீவு பிரகடன" அறிக்கை வெள்ளையர்களின் ஆதிக்கத்தை எதிர்த்துப் போராட வருமாறு இந்திய மன்னர்களுக்கு விடுக்கப்பட்ட எழுச்சிப் பிரகடனம் ஆகும். இதைப் படித்து ஆத்திர முற்ற ஆங்கிலேய அரசு மருது பாண்டியர்களின் உற்றார், உறவினர் ,மகன்கள், பேரன்கள் ஆகியோரை சிறை பிடித்து தூக்கிலிட ஆணை பிறப்பித்தது.
அதன் பிறகு மருது பாண்டியர் உள்ளிட்ட 500 பேர் திருப்புத்தூரில் தூக்கிலிடப்பட்டனர். இன்று அந்த இளைய மன்னரின் பிறந்த தினம்.