தெருவில் வசிப்பவர்களின் சுகாதார பிரச்சனைகளை அலசும் மராத்தி படம் ‘ரேகா’
மராத்தி மொழிப் படமான ரேகா, 53 வது இந்திய சர்வதேச திரைப்பட விழாவில் இந்தியன் பனோரமா கதை அல்லா பிரிவின் கீழ் வியாழனன்று திரையிடப்பட்டது.
தெருவில் வசிப்பவர்களின் அன்றாடப் போராட்டங்கள், அவர்களின் சுகாதாரம் மற்றும் தூய்மைப் பிரச்சினைகள், அவர்கள் மீதான சமூகத்தின் கண்ணோட்டம் பற்றி இத்திரைப்படம் அலசுகிறது. இத்திரைப்படத்தின் இயக்குனர் சேகர் பாபு ரன்காம்பே, “தெருவில் வசிப்பவர்களின் குறிப்பாக பெண்களின் சுகாதாரப் பிரச்சினைகளை, அவர்கள் எதிர்கொள்ளும் சிரமங்களை இப்படம் சித்தரிக்கிறது’’ என்று கூறினார். ‘’ஒன்றரை ஆண்டுகளாக இதுபற்றி ஆராய்ச்சி செய்தபோது, அவர்களின் உண்மை நிலையைக் கண்டு அதிர்ச்சியடைந்தேன். பல மாதங்களாக அவர்கள் குளிக்க முடியாமல் இருப்பதையும் காணமுடிந்தது'' என்றார்.
கதாநாயகி ரேகா சாலையோரத்தில் வசிக்கிறார். பூஞ்சை தோல் நோய்த் தொற்றால் பாதிக்கப்பட்டு, குளித்துவிட்டு மருந்து தடவுமாறு மருத்துவர் பரிந்துரைக்கிறார். ஆனால் அவளது கணவன் அவளைத் தடுத்து நிறுத்தி அவளை மோசமாக நடத்துகிறான். ரேகா குளிக்க முயல்கிறாள், ஆனால் அவளது சமூகத்தைச் சேர்ந்த பெண்கள் அவளிடம் வேண்டாம் என்ற காரணத்தைக் கூறும்போது அதிர்ச்சியடைந்து, அவள் கணவனை விட்டு வெளியேற முடிவு செய்கிறாள். சுத்தமாக இருக்க அவள் படும் கஷ்டங்களை படம் சித்தரிக்கிறது.
மகாராஷ்டிராவின் வாகா (நாடக ) கலைஞர்களைக் கொண்டு படம் எடுக்கப்பட்டுள்ளது. அவர்கள் இதுவரை கேமராக்களை எதிர்கொள்ளவில்லை. எனவே, அவர்களுக்கு கேமரா முன் நடிப்பது குறித்து பயிற்சி அளிக்கும் வகையில் இரண்டு மாத கால பயிலரங்கம் நடத்தப்பட்டது. சாங்லியில் வசிக்கும் சேகர் பாபு ரன்காம்பே, இன்று பத்திரிகை தகவல் அலுவலகத்தால் ஏற்பாடு செய்யப்பட்ட "டேபிள்-டாக்ஸ்" அமர்வில் பேசும் போது, இந்த திட்டத்தில் உதவியதற்காக புகழ்பெற்ற மராத்தி இயக்குனர் ரவி ஜாதவ்க்கு தான் கடன்பட்டிருப்பதாக தெரிவித்தார்.
படத்தில் நடிக்கும் வாய்ப்பு கிடைத்ததற்கும், திரைப்படங்களில் இடம்பிடித்ததற்கும் படத்தில் முக்கிய கதாபாத்திரங்களில் நடித்துள்ள மாயா பவார் மற்றும் தமினா பவார் ஆகியோர் நன்றி தெரிவித்தனர். மேலும் மற்றொரு நிகழ்வில் படத்தொகுப்பின் நுணுக்கங்கள் பற்றி புகழ்பெற்ற திரைப்பட எடிட்டர் ஸ்ரீகர் பிரசாத் பகிர்ந்து கொள்கிறார்
புகழ்பெற்ற திரைப்பட படத்தொகுப்பாளர் ஏ ஸ்ரீகர் பிரசாத், இன்று கோவாவில் 53 வது இந்திய சர்வதேச திரைப்படவிழாவின் மாஸ்டர் கிளாஸ் நிகழ்ச்சியில், திரைப்படப் படத்தொகுப்பின் நுணுக்கங்களைப் பற்றிய முக்கிய அம்சங்களைப் பகிர்ந்து கொண்டார்.
திரைப்பட இயக்குநர்கள் பார்வையாளர்களை நன்கு அறிந்திருக்க வேண்டும், அவர்களது விருப்பங்களை நன்கு உணர்ந்திருக்க வேண்டும் என்று அவர் அறிவுறுத்தினார். பார்வையாளர்களை நன்கு அறியும் இலக்கை அடைவது படத்தின் வெற்றியை உறுதிப்படுத்த உதவுகிறது.
படங்களில் காணப்படும் மிகைப்படுத்தல்கள் பற்றி பேசிய பிரசாத், படம் மற்றும் நடிகர்களைப் பொறுத்து மிகைப்படுத்தலின் அளவு மாறுபடும் என்று கூறினார். ‘ஸ்டார் படங்களில், ரசிகர்களை மகிழ்விக்கும் தருணங்களை பெரிதுபடுத்துகிறோம் என்றார்.
தனது திரைப்பட அனுபவத்தைப் பற்றிக் கூறிய ஸ்ரீகர் பிரசாத், ஒவ்வொரு அனுபவமும் இன்னொரு அனுபவத்திற்கு இட்டுச் செல்கிறது என்றார். என்ன செய்ய வேண்டும், என்ன செய்யக்கூடாது என்று அனுபவம் கற்றுக்கொடுக்கிறது. ஒவ்வொரு முறையும் இது ஒரு கற்றல் அனுபவமாக இருக்க வேண்டும். இது முடியாது போலிருக்கிறது என்று கை விட்டு விடுவது மிகவும் எளிதானது. ஆனால் இலக்கை நோக்கி உழைத்து அதை அடைவது மிகவும் சவாலானது என்று அவர் கூறினார்.
இளம் திரைப்பட இயக்குநர்கள் எடிட்டிங் மேஜையில் அமரும் வரையில் படத்தின் ஒரு காட்சியை வெட்டுவது என்பதை கற்பனை செய்து பார்க்க முடியாது. பல இயக்குனர்களுக்கு எடிட்டிங் அறை அனுபவம் இல்லை. முன்னதாக, திரைப்பட இயக்குநர்கள் தங்கள் இயக்கத்தை சிறப்பாகச் செய்ய அந்த அனுபவத்தைப் பெறுவது கட்டாயமாக இருந்தது. இப்போது, படம் எடிட்டிங் அறைக்கு வருவதற்கு முன்பே பல மென்பொருள்களின் உதவியுடன் இன்னும் அதிகமாகத் திருத்தப்படுவதற்கான வாய்ப்பு உள்ளது, ஆனால் சரியான விஷயத்தைப் பெறுவது கடினமாக உள்ளது என்று தற்போதைய நிலையை அவர் விளக்கினார்.
படத்தின் வெற்றிக்கும், சிறப்புக்கும் படத்தொகுப்பு மிகவும் முக்கியமானது என்று கூறிய பிரசாத், சில அமைதியான காட்சிகள் தாக்கத்தை ஏற்படுத்துவதும், பின்னணி இசையுடன், வேறு உணர்ச்சியை ஏற்படுத்துவதும் உண்டு என்றார்.
பாடல்களை படமாக்கும்போது எதை மனதில் கொள்ள வேண்டும் என்ற பார்வையாளர்களின் கேள்விக்கு பதிலளித்த அவர், 'பாடல்கள் எப்போதுமே திரைப்பட வரலாற்றின் ஒரு பகுதியாகும், மேலும் இது காட்சி உயர்வைக் கொடுக்கப் பயன்படுகிறது. முன்பெல்லாம் பாடல் வரிகள் கதையின் ஒரு பகுதியாக பயன்படுத்தப்பட்டு வந்த நிலையில், இப்போது நிலைமை மாறி படத்தின் பாடல்களின் எண்ணிக்கை படிப்படியாகக் குறைந்துவிட்டது’ என்றார்.
கிளைமாக்ஸ் படத்தின் உச்சக்கட்ட காட்சிக்கான செயல்முறை குறித்த கேள்விக்கு பதிலளித்த ஸ்ரீகர் பிரசாத், 'கிளைமாக்ஸ் கதையின் உச்சத்தை அடைவதற்கான ஒரு பெரிய பங்கை வகிக்கிறது. க்ளைமாக்ஸ் சரியில்லை என்றால் படம் முழுமையடையாது. துரதிர்ஷ்டவசமாக இந்திய சினிமாவில், இரண்டு கிளைமாக்ஸ்கள் உள்ளன, ஒன்று இடைவேளையில் மற்றொன்று இறுதியில். சில சமயங்களில் முதல் பாதி இரண்டாம் பாதியை விட சிறப்பாக இருக்கும். க்ளைமாக்ஸ் என்பது படத்தின் கடைசிக் காட்சி என்பதால் பார்வையாளர்கள் அதற்கு முக்கியத்துவம் அளிக்கின்றனர்’ என்று கூறினார்.
கருத்துகள்