தேசிய கைத்தறி தினத்தை முன்னிட்டு உள்ளூர் கைத்தறிப் பொருட்களுக்கு ஆதரவளிக்குமாறு பிரதமர் வலியுறுத்தல்
பிரதமர் அலுவலகம் தேசிய கைத்தறி தினத்தை முன்னிட்டு உள்ளூர் கைத்தறிப் பொருட்களுக்கு ஆதரவளிக்குமாறு பிரதமர் வலியுறுத்தல்
இந்தியாவின் எண்ணற்ற நெசவாளர்கள் மற்றும் கலைஞர்களின் பன்முகத்தன்மை மற்றும் கைவினைத் திறனை கைத்தறிகள் வெளிப்படுத்துகின்றன: பிரதமர்
இந்தியாவின் எண்ணற்ற நெசவாளர்கள் மற்றும் கலைஞர்களின் பன்முகத்தன்மை மற்றும் கைவினைத் திறனை கைத்தறிகள் வெளிப்படுத்துவதாகக் கூறி பிரதமர் திரு நரேந்திர மோடி உள்ளூர் கைவினைப் பொருட்களுக்கு ஆதரவளிக்குமாறு அழைப்பு விடுத்துள்ளார்.
பிரதமர் வெளியிட்டுள்ள சுட்டுரைச் செய்தியில்,
“இந்தியாவின் எண்ணற்ற நெசவாளர்கள் மற்றும் கலைஞர்களின் பன்முகத்தன்மை மற்றும் கைவினைத் திறனை கைத்தறிகள் வெளிப்படுத்துகின்றன. எனது கைத்தறி, எனது பெருமை என்ற உணர்ச்சியை மேம்படுத்தும் வகையில் நமது நெசவாளர்களுக்கு ஆதரவளிக்கும் தருணமாக தேசிய கைத்தறி தினம் விளங்குகிறது. உள்ளூர் கைத்தறிப் பொருட்களுக்கு ஆதரவளிப்போம்!” என்று தெரிவிக்கப்பட்டுள்ளது.
ஒலிம்பிக் போட்டிகளில் பதக்கம் வென்ற மீராபாய் சானுவின் சுட்டுரைச் செய்தியை மேற்கோள் காட்டி, பிரதமர் வெளியிட்டுள்ள சுட்டுரைச் செய்தி பின்வருமாறு:
“கடந்த சில ஆண்டுகளில் கைத்தறிகள் மீதான ஆர்வம் புத்துயிர் பெற்றுள்ளது. எனது கைத்தறி, எனது பெருமையின் உணர்வுக்கு மீராபாய் சானு ஆதரவளிப்பதைக் கண்டு மகிழ்ச்சி அடைகிறேன். தற்சார்பு இந்தியாவைக் கட்டமைப்பதில் கைத்தறித்துறை தொடர்ந்து பங்களிக்கும் என்பதை நான் நம்புகிறேன்”.
கைத்தறி தின கொண்டாட்டம்- உள்ளூர் தயாரிப்புகளை ஊக்குவிப்பதற்கான நினைவூட்டல்: நிபுணர்கள்
“உள்ளூர் கலைப்பொருட்களை வளர்க்கவும் அவற்றை பிரபலப்படுத்தவும் ஓர் சிறந்த நினைவூட்டியாக கைத்தறி தினம் கொண்டாடப்படுகிறது. பல்வேறு சந்ததியினரிடையே வரவேற்பைப் பெறுவதற்காக தரத்தை மேலும் வலுப்படுத்துவதில் கைத்தறித் துறையும் அது சம்பந்தமான ஊரக கலைப் பொருட்கள் துறையும் கவனம் செலுத்த வேண்டும். தரமான பொருட்களுக்கு நுகர்வோர் கூடுதல் ஆர்வம் காட்டுவதால், தர மேம்பாடு, காலத்தின் கட்டாயமாகியுள்ளது.” ‘தேசிய கைத்தறி தினம்’ என்ற தலைப்பில் மத்திய தகவல் மற்றும் ஒலிபரப்பு அமைச்சகத்தின் மண்டல மக்கள் தொடர்பு அலுவலகம் மற்றும் பத்திரிகை தகவல் அலுவலகம், சென்னை ஆகியவை இணைந்து இன்று ஏற்பாடு செய்திருந்த இணையதள கருத்தரங்கில் கலந்து கொண்டு பேசுகையில் காந்திகிராம கிராமிய நிறுவனத்தின் மேலாண்மைப் பிரிவு பேராசிரியரும் தலைவருமான டாக்டர் ஆர் சீரங்கராஜன் கூறினார்.
நெசவுக்கு முந்தைய செயல்முறைகள் மற்றும் தறி உபகரணங்களின் பராமரிப்பிலும் கவனம் செலுத்துமாறு அவர் வலியுறுத்தினார். இந்தத் துறையில் தொழில்நுட்பத்தின் பயன்பாடு அதிகரிக்கப்பட வேண்டும் என்று அவர் கூறினார். உதாரணத்திற்கு உணரி போன்ற தொழில்நுட்பங்களால், ஏதேனும் இடர்பாடுகள் எழும்போது, தானியங்கியாக நெசவாளர்களுக்கு தகவல் அளிக்கப்படுவதன் மூலம் அது போன்ற பிரச்சினைகளை சுலபமாக எதிர்கொள்ளலாம். சாயத்தின் செயல்முறைகளில் நிலையான வழிகாட்டுதல்கள் வெளியிடப்பட வேண்டும் என்றும் அவர் வலியுறுத்தினார்.
தமிழ்நாடு மற்றும் புதுச்சேரி தேசிய கைத்தறி மேம்பாட்டுக் கழகத்தின் மூத்த அதிகாரி திரு விஜய் பிரதாப் கௌதம் பேசுகையில், இதே தினத்தன்று தொடங்கப்பட்ட சுதேசி இயக்கத்தைக் குறிக்கும் வகையில், ஒவ்வொரு ஆண்டும் ஆகஸ்ட் 7-ஆம் தேதி தேசிய கைத்தறி தினம் கடைபிடிக்கப்படுவதாகக் கூறினார். கைத்தறி பொருட்கள் பற்றி மக்களிடையே விழிப்புணர்வை ஏற்படுத்துவதற்காக இந்த தினம் கடைப்பிடிக்கப்படுகிறது. உள்ளூர் பொருட்களின் பயன்பாடு மற்றும் உற்பத்தியை ஊக்குவிப்பது தான் சுதேசி இயக்கத்தின் முக்கிய நோக்கம். அடிமட்ட அளவில் கைத்தறி துறையில் சேவைகளை அளிப்பதற்காக கைத்தறி அலுவலகங்களும் அதன் கிளைகளும் சென்னை உட்பட நாடு முழுவதும் பல்வேறு இடங்களில் இயங்கி வருவதாகவும் அவர் குறிப்பிட்டார்.
நெசவுத் தொழிலில் தமது அனுபவத்தைப் பகிர்ந்து கொண்ட திருவண்ணாமலை தேவிகாபுரம் கிராமத்தைச் சேர்ந்த நெசவாளி திரு பி. தனசேகரன், தமது குடும்பம் மூன்று தலைமுறைகளாக இந்தத் தொழிலில் ஈடுபட்டு வருவதாகக் கூறினார். பெருந்தொற்று காலகட்டத்தில் பிற துறைகளைப் போல நெசவுத் தொழிலிலும் கொவிட் தொற்றின் தாக்கம் பெரிதும் காணப்பட்டதாக அவர் தெரிவித்தார். மூலப்பொருட்களின் விலை உயர்வு, வேலை இழப்பு உள்ளிட்ட பிரச்சினைகளை நெசவாளிகள் சந்தித்தனர். ஆரணியில் அமைக்கப்படுவதாக அறிவிக்கப்பட்டுள்ள ஒருங்கிணைந்த ஜவுளி பூங்காவின் பணிகளை விரைவுபடுத்த வேண்டும் என்று அவர் கோரிக்கை விடுத்தார். ஆரணியில் சுமார் ஒரு லட்சம் நெசவாளிகள் வசிப்பதால் இந்த முன்முயற்சி சந்தை உள்ளிட்ட துறைகளில் பேருதவியாக இருக்கும். கோரா, ஜரி போன்ற பொருட்களை அரசே கொள்முதல் செய்து நியாயமான விலைகளில் நெசவாளர்களுக்கு அளிக்கவேண்டும் என்றும் அவர் கேட்டுக்கொண்டார்.
இந்த வலைதள கருத்தரங்கில் தலைமை உரை நிகழ்த்திய சென்னை மண்டல மக்கள் தொடர்பு அலுவலக இயக்குநர் திரு ஜே. காமராஜ், மகாத்மா காந்தி, கைத்தறியை ஏழ்மையை ஒழிக்கும் முக்கிய கருவியாக மட்டும் பயன்படுத்தாமல், ஆங்கிலேயர்களுக்கு எதிரான மாபெரும் ஆயுதமாகவும் பயன்படுத்தி, அதில் வெற்றியும் கண்டார் என்று தெரிவித்தார். கைத்தறி உள்ளிட்ட உள்ளூர் கலைப்பொருட்கள் மற்றும் தயாரிப்புகளை ஊக்குவிக்கும் கொள்கையின் அடிப்படையில் தற்சார்பு இந்தியா திட்டம் உருவாக்கப்பட்டுள்ளது. விவசாயிகளின் நல்வாழ்விற்காக பிரதமர் திரு நரேந்திர மோடியின் தலைமையிலான அரசு அனைத்து நடவடிக்கைகளையும் மேற்கொண்டு வருகிறது. தேசிய கைத்தறி தினத்தன்று காதி மற்றும் இதர ஊரகத் தொழில்துறைகளின் பொருட்களை வாங்கி இந்தத் தொழிலில் ஈடுபடுபவர்களின் வாழ்வாதாரத்திற்கு ஆதரவளிப்போம் என்று அனைவரும் உறுதி ஏற்போம் என்று அவர் தெரிவித்தார்.
முன்னதாக, புதுச்சேரி கள மக்கள் தொடர்பு அலுவலகத்தின் துணை இயக்குநர் டாக்டர் சிவகுமார் வரவேற்புரை நிகழ்த்தினார். சென்னை மண்டல மக்கள் தொடர்பு அலுவலக அதிகாரி திருமிகு வித்யா ஏ.ஆர் நன்றி தெரிவித்தார்.
ஏழாவது தேசிய கைத்தறி தினம்
.இந்தியாவில் விவசாயத்திற்கு அடுத்தபடியாக கைத்தறித்துறை அதிக வேலை வாய்ப்பை வழங்குகிறது. இந்தியாவில் 23 லட்சம் கைத்தறிகள் இருக்கின்றன. 43 லட்சம் நபர்கள் கைத்தறி வேலை வாய்ப்பில் ஈடுபட்டுள்ளனர்.
பிரிட்டிஷ் அரசாங்கத்தை எதிர்த்து 1905 ஆம் ஆண்டில் கல்கத்தா டவுன் ஹாலில் தொடங்கப்பட்ட சுதேசி இயக்கத்தின் நினைவாக ஆகஸ்ட் 7 தேசிய கைத்தறி தினமாகத் தேர்ந்தெடுக்கப்பட்டு கொண்டாடப்படுகிறது. இந்த இயக்கம் உள்நாட்டு தயாரிப்புகள் மற்றும் உற்பத்தி செயல்முறைகளை புதுப்பிப்பதை நோக்கமாகக் கொண்டிருந்தது.
இந்தியா முழுவதும் உள்ள அனைத்து நெசவாளர் சேவை மையங்களிலும் 7வது தேசிய கைத்தறி நாள் ஏற்பாடு செய்யப்பட்டுள்ளது. காஞ்சிபுரத்தில் உள்ள நெசவாளர் சேவை மையத்திலும் இந்த விழா ஏற்பாடு செய்யப்பட்டுள்ளது.
நெசவாளர்களின் சமூக பொருளாதார நிலை மேம்பட பல விதமான திட்டங்கள் செயல்படுத்தப்படுகிறது. இத்திட்டங்கள் பற்றி இந்த நிகழ்ச்சியின் வாயிலாக எடுத்துரைக்கப்படுகிறது
1. தேசிய கைத்தறி வளர்ச்சி திட்டத்தின் மூலம் குழுமங்களை ஏற்படுத்துதல் (BLOCK LEVEL CLUSTER)
2. கைத்தறி நெசவாளர்களுக்கான தேசிய விருது (NATIONAL AWARD), சந்த் கபீர் விருது (SANT KABIR AWARD) இந்திய கைத்தறி தரச் சான்று (NATIONAL MERIT CERTIFICATE)
3. நூல் வழங்குவதற்காக கைச்சாத்து புத்தகம்(YARN PASS BOOK)
4. நெசவாளர்களுக்கான கல்வி திட்டங்கள் (WEAVERS EDUCATION SCHEME-IGNOU, NIOS)
5. பிரதமரின் ஜீவன் ஜோதி பீமா திட்டம் (PRADAN MANDRI JEEVAN JYOTHI BHEEMA YOJANA)
6. பிரதமரின் சுரக்ஷா பீமா திட்டம் (PRADHAN MANDRI SURAKSHA BHEEMA YOJANA)
7. இ - தாகா செயலி(E-DHAAGA)
8. நெசவாளர்களின் நண்பன் (புண்கா் மித்ரா)(BUNKAR MITRA)
9. புவிசார் குறியீடு (GI- GEOGRAPHICAL INDICATION ACT).
10. முத்ரா திட்டம்
11. இந்திய கைத்தறி பிராண்ட்
இந்த விழாவிற்கு காஞ்சிபுரம் தொகுதி சட்டமன்ற உறுப்பினர் திரு சி. வி.எம்.பி. எழிலரசன். முக்கிய விருந்தினராக கலந்து கொண்டார்.
திரு மகாலிங்கம், இணை இயக்குநர், / கைத்தறி மற்றும் ஜவுளி துறை,/ நிர்வாக இயக்குநர் அறிஞர் அண்ணா பட்டு கூட்டுறவு சங்கம், திருமதி தெய்வானை, துணை இயக்குநர் கைத்தறி மற்றும் ஜவுளி துறை, திரு. சுப்பிரமணி, தேசிய கைத்தறி மேம்பாட்டுக் கழகம், கைத்தறி மற்றும் ஜவுளித்துறை இயக்குநர் அலுவலகத்தின் அதிகாரிகள், மற்றும் நிர்வாக இயக்குநர்கள், முருகன் பட்டு கூட்டுறவு சங்கம், திருவள்ளுவர் பட்டு கூட்டுறவு சங்கம், கலைஞர் பட்டு கூட்டுறவு சங்கம் , காஞ்சிபுரம் பட்டு கூட்டுறவு சங்கம் , காமாட்சியம்மன் பட்டு கூட்டுறவு சங்கம், தேசிய விருது பெற்றவர்கள், திரு ஆர். நாகேஸ்வரன், திரு என். கே. மோகன், தேசிய தகுதி சான்றிதழ் வைத்திருப்பவர் திரு எம்.பி.செல்வகுமார், மற்றும் இந்த அதிகார வரம்பின் கைத்தறி நெசவாளர்கள் இந்நிகழ்ச்சியில் கலந்து கொண்டனர்.
கைத்தறி துறையில் வடிவமைப்பு சார்ந்த சிறப்பை உருவாக்க மற்றும் புதிய வடிவமைப்புகளை உருவாக்க நெசவாளர்கள், ஏற்றுமதியாளர்கள், உற்பத்தியாளர்கள் மற்றும் வடிவமைப்பாளர்களுக்கு வசதி செய்ய வடிவமைப்பு வள மையம் திறக்கப்பட்டது
இந்த விழா காணொலியில் தேசிய தகவல் மையம் வாயிலாக ஜவுளித்துறை இந்திய அரசு, புதுதில்லியால் ஒளிபரப்பப்பட்டது. இதில் கைத்தறி குழுமங்களின் நெசவாளர்கள், தேசிய விருது பெற்றவர்கள் மற்றும் பலர் பங்கேற்றனர்.
சென்னையில் கைத்தறி தினம் 2021 நிகழ்ச்சி
1905-ம் ஆண்டு தொடங்கப்பட்ட சுதேசி இயக்கத்தின் நினைவாக ஆகஸ்ட் 7 தேசிய கைத்தறி தினமாகத் தேர்ந்தெடுக்கப்பட்டு கொண்டாடப்படுகிறது. கைத்தறி நெசவாளர்களை கவுரவிப்பதையும், கைத்தறி தொழிலுக்கு ஊக்கமளிப்பதையும் இந்த தினம் நோக்கமாகக் கொண்டிருக்கிறது.
ஏழாவது தேசிய கைத்தறி தினத்தின் முக்கிய நிகழ்ச்சி காணொலி மூலம் இன்று புதுதில்லியில் நடைபெற்றது. 28 நெசவாளர் சேவை மையங்கள், 6 இந்திய கைத்தறி தொழில்நுட்ப நிறுவனங்கள், நாடு முழுவதுமுள்ள தேசிய கைத்தறி வளர்ச்சிக் கழகம் மற்றும் நிஃப்ட் வளாகங்கள், மொகாபத்ரா, கனிஹாமாவில் உள்ள கைவினை கைத்தறி கிராமங்கள், காணொலி மூலம் நடைப்பெறும் வாங்குவோர் விற்போர் கூட்டங்கள் மற்றும் நாடு முழுவதும் உள்ள சுமார் 150 கைத்தறி குழுக்கள் இந்நிகழ்ச்சியில் பங்கேற்றன.
சென்னையிலுள்ள நெசவாளர்கள் சேவை மையத்தின் பணியாளர்கள், நெசவாளர்கள் மற்றும் வடிவமைப்பாளர்களுடன் இணைந்து இந்நிகழ்ச்சியில் காணொலி மூலம் கலந்து கொண்டனர். மேலும், திருவிடைமருதூர்-1, பரமக்குடி-2, அருப்புக்கோட்டை-2, அருப்புக்கோட்டை-5 மற்றும் திண்டுக்கல்-5 ஆகிய கைத்தறி குழுக்களை சேர்ந்த நெசவாளர்களும் இதில் பங்கேற்றனர்.
நெசவாளர்கள் சேவை மையம், சென்னை, இயக்குநர் திரு சி முத்துசாமி வெளியிட்டுள்ள செய்திக் குறிப்பில் மேற்கண்ட விவரங்கள் தெரிவிக்கப்பட்டுள்ளன.கைத்தறி துறை மூலம் ஊரக வாழ்வாதாரத்தை ஊக்குவிப்பதை தற்சார்பு இந்தியா திட்டம் நோக்கமாக கொண்டுள்ளது
தேசிய கைத்தறி நாள் தின கொண்டாட்டத்தின் ஒரு பகுதியாக, தேசிய கைத்தறி தினமான கடந்த 7ம் தேதி மாலை, இணைய கருத்தரங்கு ஒன்றை கோயம்புத்தூர் களவிளம்பரத்துறை அலுவலகம், சென்னை பத்திரிகை தகவல் அலுவலகத்துடன் இணைந்து நடத்தியது.
இதில் பங்கேற்ற பிரமுகர்களை சென்னை பத்திரிகை தகவல் அலுவலகத்தின் துணை இயக்குனர் திரு டி. நதீம் துஃபாயில் வரவேற்றார். அவர் பேசுகையில், ‘‘1905ம் ஆண்டு ஆகஸ்ட் 7ம் தேதி சுதேசி இயக்கம் தொடங்கப்பட்டதை நினைவுக் கூறும் வகையில், உள்நாட்டு தொழில்களையும், குறிப்பாக கைத்தறி நெசவாளர்களை ஊக்குவிக்க ஒவ்வொரு ஆண்டும் ஆகஸ்ட் 7ம் தேதியை, தேசிய கைத்தறி தினமாக கொண்டாட மத்திய அரசு முடிவு செய்தது. முதல் கைத்தறி தேசிய தினம், பிரதமர் திரு நரேந்திர மோடியால், சென்னையில் கடந்த 2015ம் ஆண்டு ஆகஸ்ட் 7ம் தேதி தொடங்கி வைக்கப்பட்டது’’ என்றார்.
தலைமை உரையற்றிய சென்னை மண்டல மக்கள் தொடர்புத்துறை அலுவலக இயக்குனர் திரு ஜே.காமராஜ் பேசுகையில், ‘‘ராட்டையில் நூல் நூற்பது சுதந்திரத்தின் அடையாளமாகவும், ஏழ்மையை ஒழிக்கும் உபகரணமாகவும் மகாத்மா காந்தியால் பார்க்கப்பட்டது. விவசாயத்துக்கு அடுத்தபடியாக, கைத்தறி துறை மிகப் பெரிய பொருளாதார நடவடிக்கை என்றும், 4.3 லட்சத்துக்கும் மேற்பட்ட நெசவாளர்களுக்கு நேரடி மற்றும் மறைமுக வேவைாய்ப்பை இது அளிக்கிறது’’ என்றும் கூறினார்.
மத்திய அரசின் ஜவுளித்துறை அமைச்சகத்தின் இந்திய கைத்தறி தொழில்நுட்ப மையத்தின் இயக்குனர் டாக்டர் சி.பிரகாஷ் பேசுகையில், ‘‘ இந்தியாவின் ஒவ்வொரு மாநிலத்தைச் சேர்ந்த நெசவாளர்களிடமும், பல்வேறு விதமான திறமைகள் உள்ளது என்றும், அவர்களின் தயாரிப்புகள் தனித்துவத்தை வெளிப்படுத்துகின்றன’’ என்றார்.
தேசிய கைத்தறி வளர்ச்சி நிறுவனத்தின் கரூர் கிளை மூத்த அதிகாரி திரு பசவராஜ் பேசுகையில், ‘‘ கைத்தறி துறையின் விரைவான வளர்ச்சிக்காக, தேசிய கைத்தறி வளர்ச்சி நிறுவனத்தை மத்திய அரசு கடந்த 1983ம் ஆண்டு ஏற்படுத்தியது’’ என்றார்.
திருப்பூர், வெள்ளக்கோயில் மகிளம் பொது நல அறக்கட்டளையின் பொது செயலாளர் திரு கே.ஜி.நட்ராஜ் பேசுகையில், ‘‘ நெசவாளர் அட்டைகள், நெசவாளர்களுக்கான முத்ரா திட்டம் மற்றும் இதர நிதியுதவி திட்டங்கள் நெசவாளர்கள் இடையே மிகவும் பிரபலம் அடைந்தன’’ என்றார்.
கோயம்புத்தூர் களவிளம்பரத்துறை அலுவலகத்தின் துணை இயக்குனர் திருமதி கரீனா பி தெங்கமம், இணைய கருத்தரங்கை நிறைவு செய்து பங்கேற்ற விருந்தினர்களுக்கு நன்றி தெரிவித்தார்.
என்எஸ்எஸ் அதிகாரி டாக்டர் ஆர். சுனிதா பேசுகையில், ‘‘பல்கலைக்கழக பேராசிரியைகள் மற்றும் மாணவிகள் கைத்தறி சேலையை மட்டுமே அணிகின்றனர்’’ என்றார். அவினாசிலிங்கம் ஹோம் சயின்ஸ் மற்றும் உயர் கல்வி மையத்தின் ஜவளித்துறை மாணவர்கள் மற்றும் என்எஸ்எஸ் தொண்டர்கள் இந்த இணைய கருத்தரங்கில் பங்கேற்றனர்.
கோயம்புத்தூர் களவிளம்பரத்துறை அலுவலகத்தின், களவிளம்பரத்துறை உதவியாளர் திரு.எஸ்.ஆர்.சந்திர சேகரனின் நன்றியுரையுடன் இணைய கருத்தரங்கு நிறைவடைந்தது.
கருத்துகள்