அரசுக்கு வருவாய் இழப்பு ஏற்படுத்தியதாக மாவட்ட பதிவாளர், சார் பதிவாளர் உட்பட எட்டு பேர் மீது ஊழல் தடுப்பு மற்றும் லஞ்ச ஒழிப்புத் துறையினர் வழக்குப்பதிவு.

மதுரையில், வீடுகளை காலி மனைகளாக பத்திரப்பதிவு செய்து, அரசுக்கு, 5.50 லட்சம் ரூபாய் வருவாய் இழப்பு ஏற்படுத்தியதாக மாவட்ட பதிவாளர், சார் பதிவாளர் உட்பட எட்டு பேர் மீது ஊழல் தடுப்பு மற்றும் லஞ்ச ஒழிப்புத் துறையினர் வழக்குப்பதிவு செய்தனர்.

புதுக்கோட்டை மாவட்ட பத்திரப்பதிவு துறையில் தணிக்கை பதிவாளரான அஞ்சனாகுமார், (வயது 57) கன்னியாகுமரி மாவட்டம், நாகர்கோவிலில் வழிகாட்டி மதிப்பு சார் - பதிவாளராக இருப்பவர் ஜவஹர், (வயது 54) மதுரை சொக்கிக்குளம் பத்திரப்பதிவு அலுவலகத்தில் அஞ்சனா குமார், 2018 ஆம் ஆண்டு  ஜூலை மாதம் முதல், 2019 ஆம் ஆண்டு ஜூலை மாதம் வரை; 2019, ஆம் ஆண்டு ஜூலை மாதம் 24 ஆம் தேதி முதல், 2021 ஆம் ஆண்டு ஜூன் மாதம் வரை ஜவஹரும் சார் - பதிவாளராக இருந்த காலத்தில், வீடு கட்டி விற்கும் உரிமையாளர்கள் பத்திரப்பதிவு செய்ய இவரை அணுகினர். இவர் வீடுகளாகப் பதிவு செய்தால் கூடுதலாக கட்டணம் செலுத்த வேண்டும் என்பதால், மனைகளாகக் காட்டி வீட்டை மறைத்துப் பதிவு செய்தனர். அந்த வகையில், அஞ்சனாகுமார், அரசுக்கு 3.50 லட்சம் ரூபாயும்; ஜவஹர், 2 லட்சம் ரூபாயும் அரசுக்கு வருவாய் இழப்பை ஏற்படுத்தியது குறித்து ஊழல் தடுப்பு மற்றும் லஞ்ச ஒழிப்பு துறையினருக்கு புகார்கள் சென்ற நிலையில், இருவரும் புதுக்கோட்டை, மற்றும் நாகர்கோவிலுக்கு இடம் மாற்றப்பட்டனர்.

இருவரும் முறைகேட்டில் ஈடுபட்டது உறுதியானதைத் தொடர்ந்து, அவர்கள் மீதும், வீடு கட்டி விற்பனை செய்த  உரிமையாளர்கள் எட்டு நபர்கள் மீதும் வழக்குப்பதிவு செய்யப்பட்ட நிலையில், மதுரை, பாண்டிக் கோவில் அருகேயுள்ள அபார்ட்மென்ட்டில் வசிக்கும் ஜவஹர் வீட்டில் ஊழல் தடுப்பு மற்றும் லஞ்ச ஒழிப்புத் துறையினர்  சோதனை மேற்கொண்டு முக்கிய ஆவணங்களைப் பறிமுதல் செய்தனர். வேலுார் மாவட்டம், குடியாத்தத்தில் உள்ள அஞ்சனாகுமார் வீட்டிலும் சோதனை நடந்தது.      

பதவியை தவறாகப் பயன்படுத்தி பத்திரப்பதிவு செய்ததாக புதுக்கோட்டை மாவட்டப் பதிவாளர் வீட்டில் லஞ்ச ஒழிப்புத் துறையினர் அதிரடி சோதனை செய்தனர்.

புதுக்கோட்டை பத்திரப்பதிவு துறையில் மாவட்டப் பதிவாளராக (தணிக்கை பிரிவு) பணியாற்றியவர் அஞ்சனக்குமார். இவரது வீடு புதுக்கோட்டையில் கே.எல்.கே.எஸ். நகரில் உள்ளது. இந்த நிலையில் புதுக்கோட்டை லஞ்ச ஒழிப்புத் துறையினர் ஆய்வாளர் ஜவகர் தலைமையில் 5 பேர் கொண்ட குழுவினர் அஞ்சனகுமாரின் வீட்டிற்குள் சோதனை நடத்தியபோது அஞ்சனகுமார் வீட்டில் இருந்தார். வீட்டில் ஒவ்வொரு அறையாக சோதனையிட்டனர்.

இந்த சோதனை குறித்து லஞ்ச ஒழிப்புத் துறையினர் கூறுகையில், ''அஞ்சனகுமார் மதுரையில் பணியாற்றிய காலத்தில் தனது பதவியை பயன்படுத்தி முறைகேடாக பத்திரப்பதிவு செய்ததாக மதுரை ஊழல் தடுப்பு மற்றும் லஞ்ச ஒழிப்புத் துறையினர் வழக்குப்பதிவு செய்துள்ளனர். இந்த வழக்கின் அடிப்படையில் சோதனை நடைபெற்றது. அஞ்சனகுமார் கடந்த சில மாதங்களுக்கு முன்பு பணியிட மாறுதலில் புதுக்கோட்டை வந்தார். அதனால் இங்குள்ள அவரது வீட்டில் சோதனை நடத்தப்பட்டது '' என்றனர்.

முன்னதாக சோதனையின் போது வீட்டிற்குள் யாரும் செல்லாதபடி நுழைவு வாயில் கதவை லஞ்ச ஒழிப்புத் துறையினர் மூடினர். வீட்டில் உள்ளவர்கள் வெளியே செல்ல அனுமதிக்கவில்லை. வீட்டிற்குள் கதவினையும் உள்பக்கமாக பூட்டி சோதனை மேற்கொண்டனர். வழக்கு தொடர்பாக அவரிடம் விசாரணை நடத்தியதோடு, முக்கிய ஆவணங்கள் கைப்பற்றப்பட்டன. இந்த சோதனையானது காலையில் துவங்கி மாலை வரை நீடித்தது. அஞ்சனகுமார் முறைகேடாக பத்திரப்பதிவு செய்ததின் மூலம் வருமானத்திற்கு அதிகமாக சொத்து சேர்த்ததாக குற்றச்சாட்டு எழுந்துள்ளதாகவும், அவர் பணியாற்றிய இடங்களில் முறைகேட்டில் ஈடுபட்டதாகவும் கூறப்படுகிறது.              அரசு நிலங்களை ஆக்கிரமித்து போலியான ஆவணங்கள் மூலம் விற்பனை செய்கின்றனர். அதே வேளையில், வீட்டு மனைகளுக்கு இடையே பூங்கா, நுாலகம் என பொது பயன்பாடிற்கு ஒதுக்கப்பட்டிருக்கும் ஓ.எஸ்.ஆர்., எனப்படும் திறந்தவெளி இட ஒதுக்கீடு நிலங்களும் விற்கும் சம்பவங்கள் அதிகளவில் நடக்கிறது. இதை தடுக்க காஞ்சிபுரம் கலெக்டர் அறிவுறுத்தி உள்ளார்.

நாளுக்கு நாள் உயர்ந்து வரும் நிலங்களின் மதிப்பு காரணமாக, அரசு நிலங்களையும் சில தனியார் நிலங்களிலும் ஆக்கிரமித்து, போலியான ஆவணங்கள் மூலம், விற்பனை செய்கின்றனர்.

அதுபோன்ற மோசடி நடவடிக்கைகள் தொடர்ந்து நடைபெறுவதால், நில நிர்வாக ஆணையர் நாகராஜன் மாவட்ட ஆட்சித்தலைவர்கள், ஊரக வளர்ச்சி துறை, வருவாய் துறை உள்ளிட்ட துறைகளுக்கு செப்டம்பர் மாதம் 26 ஆம் தேதி சுற்றறிக்கை  அனுப்பியுள்ளதில் கூறப்பட்டுள்ளதாவது:

பூங்கா, நுாலகம் என பொதுபயன்பாடிற்கு என உள்ள திறந்தவெளி இட ஒதுக்கீடு நிலங்கள் பலவும் இன்னும் தனியார் பெயரிலேயே உள்ளன. இதுபோன்ற பல இடங்கள் கண்டுபிடிக்கப்படாமல் உள்ளன. வருவாய் துறையின் நில ஆவணங்களில் உள்ளாட்சி அமைப்புகளின் பெயர் இல்லை. இந்த நிலங்களை பராமரிக்காததால், ஆக்கிரமிப்பு உள்ளிட்ட பல்வேறு பிரச்னைகளை சந்திக்க நேரிடுகிறது. எனவே, மாநகராட்சி, நகராட்சி, பேரூராட்சி, ஊராட்சி பெயர்களில் இந்த அரசு நிலங்களின் விபரங்களை சேர்க்க வேண்டும்.

இவ்வாறு கூறப்பட்டு உள்ளது.

இந்த சுற்றறிக்கையை தொடர்ந்து, காஞ்சிபுரம் மாவட்டத்தில் வருவாய் துறை, ஊரக வளர்ச்சி துறை, நகராட்சி துறை, பேரூராட்சி துறை ஊழியர்களுக்கான ஆய்வு கூட்டம் கலெக்டர் ஆர்த்தி தலைமையில் சமீபத்தில் நடைபெற்றது. அப்போது, மாவட்ட ஆட்சித்தலைவர் அறிவுறுத்தியதாவது:

ஓ.எஸ்.ஆர்., எனப்படும் திறந்தவெளி நிலங்களை ஒவ்வொரு வட்டார வளர்ச்சி அலுவலர்களும் ஆய்வு செய்ய வேண்டும்.உள்ளாட்சி அமைப்புகளுக்கு எழுதி கொடுக்கப்பட்ட பத்திரங்களைக் கொண்டு, அந்த நிலங்கள் ஆக்கிரமிப்பு செய்யப்பட்டுள்ளதா என கண்டறிந்து, வருவாய் துறைக்கு பரிந்துரை செய்ய வேண்டும். வருவாய் துறையினர், ஓ.எஸ்.ஆர்., நிலங்களுக்கான பட்டாவை, அந்தந்த உள்ளாட்சி அமைப்புகளின் பெயருக்கு மாற்ற நடவடிக்கை எடுப்பார்கள்.

இவ்வாறு அறிவுறுத்தி பேசினார்.

இதைத்தொடர்ந்து காஞ்சிபுரம் மாவட்டத்தில் உள்ள ஐந்து ஊராட்சி ஒன்றியங்களிலும், வட்டார வளர்ச்சி அலுவலர்கள், பேரூராட்சி செயல் அலுவலர்கள், நகராட்சி துறை கமிஷனர்கள் ஓ.எஸ்.ஆர்., நிலங்களை ஆய்வு செய்து வருகின்றனர்.

ஓ.எஸ்.ஆர்., நிலங்களை சிலர் விற்பனை செய்தது மட்டுமல்லாமல், சிலர் அந்த நிலங்களுக்கு பட்டா பெற்று, நில எடுப்பு அலுவலகங்களில் கோடிக்கணக்கில் இழப்பீடும் பெற்றுள்ளனர். உதாரணமாக, 2021 ஆம் ஆண்டில் ஸ்ரீபெரும்புதுார் தாலுகா பீமந்தாங்கல் கிராமத்தில் தேசிய நெடுஞ்சாலைக்காக நில எடுப்பு செய்யும்போது, ஓ.எஸ்.ஆர்., நிலங்களை அரசுக்கே விற்று, 30 கோடி ரூபாய் மோசடி நடந்தது.

இந்த விவகாரத்தில், அப்போது நில எடுப்பு பிரிவு மாவட்ட வருவாய் அலுவலராக இருந்த நர்மதா உள்ளிட்ட அதிகாரிகள் மீது வழக்குப்பதிவு செய்து சி.பி.சி.ஐ.டி காவல்துறை விசாரிக்கின்றனர். இதேபோல், ஜூலை மாதம் வல்லம்- வடகால் சிப்காட்டுக்கு நிலம் எடுக்கும்போதும், ஓ.எஸ்.ஆர்.,நிலங்களை விற்று 26 கோடி ரூபாய் வரை இழப்பீடு பெற்று ஒரு கும்பல் மோசடியில் ஈடுபட்டது. இந்த விவகாரத்திலும் அப்போது நில எடுப்பு பிரிவு மாவட்ட வருவாய் அலுவலராக இருந்த ராஜேந்திரன் உள்ளிட்ட 11 மீது சி.பி.சி.ஐ.டி., காவல்துறை வழக்கு பதிவு செய்து விசாரணை நடத்தி வருகின்றனர்.

தரிசு நிலங்களை லே அவுட் போட்டு வீட்டு மனைகளாக மாற்றும் போது, 30 சதவீதம் ஒதுக்கப்பட்டு, அதில், பூங்கா, கோவில், சாலை உள்ளிட்டவைக்கு இடம் ஒதுக்க வேண்டும். அந்த இடத்தை, சம்பந்தப்பட்ட ஊராட்சி, பேரூராட்சி, நகராட்சி, மாநகராட்சி பெயருக்கு பதிவு செய்து தர வேண்டும். அவ்வாறு பதிவு செய்த பிறகும் சில நில உரிமையாளர்கள், பழைய பட்டாவை வைத்து, புதிய பத்திரம் தயாரித்து, ஓ.எஸ்.ஆர்., நிலத்தை விற்று மோசடி செய்கின்றனர்.

தரிசு நிலங்களை 'லே அவுட்' போடும் போது, நகர ஊரமைப்புத் துறையிடம் முன் அனுமதி பெற வேண்டும். அவ்வாறு அனுமதி பெறும்போது, வீட்டு மனைகளுக்கு இடையே ஒதுக்கப்படும் சாலை, பூங்கா போன்ற இடங்களை அந்தந்த ஊராட்சி, பேரூராட்சி, நகராட்சி ஆகிய உள்ளாட்சி அமைப்புகளின் பெயர்களுக்கு எழுதி தர வேண்டும். ஆனால், அவ்வாறு வழங்க வேண்டிய நிலங்களின் பட்டா விவரம், 'லேஅவுட்' போட்டவர்களின் பெயரிலையே இன்னும் உள்ளது. அவற்றை மீண்டும் பத்திரம் தயாரித்து விற்பனை செய்கின்றனர். இதுபோன்ற மோசடிகளை களையவே, இப்போது ஓ.எஸ்.ஆர்., நிலங்களை மீட்கும் பணிகளை நில நிர்வாக ஆணையர் முடுக்கி விட்டுள்ளார். இது சிவகங்கை, புதுக்கோட்டை உள்ளிட்ட மாவட்டங்களிலும் தொடர்ந்து நடக்கிறது.