ஜனவரி மாதம் ஒன்பதாம் தேதி ஆளுநர் உரையுடன் தொடங்கும் தமிழ்நாடு சட்டமன்றப் பேரவை

தமிழ்நாடு சட்டமன்றப் பேரவை கூட்டம் 2023 ஆம் ஆண்டு  ஜனவரி மாதம்  ஒன்பதாம் தேதி ஆளுநர் உரையுடன் தொடங்குமென சபாநாயகர் அறிவித்துள்ளார்.

2023 ஆம் ஆண்டுக்கான முதல் கூட்டத்தொடர் ஜனவரி ஒன்பதாம் தேதி தொடங்குகிறதென சபாநாயகர் அப்பாவு தெரிவித்துள்ளார். சட்டபேரவை கூடும் நாட்களை அலுவல் ஆய்வுக் கூட்டத்தில் முடிவு செய்யப்படுமென தகவல் வெளியாகியுள்ளது. தொடர்பாக செய்தியாளர்களிடம் பேசிய சபாநாயகர் அப்பாவு, 2023 ஆம் ஆண்டின் முதல் கூட்டத்தொடர் என்பதால் முதல் நாளில் ஆளுநர் ஆர்.என் ரவி உரையாற்றுவார். 2023 ஆம் ஆண்டு ஜனவரி மாதம் ஒன்பதாம் தேதி காலை 10 மணிக்கு தலைமைச் செயலகத்தில் அமைந்துள்ள சட்டப்பேரவை மண்டபத்தில் வைத்து காலை 10 மணிக்கு மாண்புமிகு ஆளுநர்  உரையை நிகழ்த்த வருகை தர இசைவு தெரிவித்துள்ளார் என சபாநாயகர் தெரிவித்தார். எதிர்க்கட்சி துணைத்தலைவர் இருக்கை விவகாரம் தொடர்பாக கடந்த சட்டமன்ற கூட்டத்தொடரில் குறிப்புரை வழங்கப்பட்டுள்ளது. அதன்பின்பு இருதரப்பிலிருந்தும் எந்தவித தகவலும் வரவில்லை.

ஒரு கட்சிக்கு அக்கட்சி சார்ந்த கொள்கைகளில் பிரச்சினை இருந்தால் அவர்களுக்குள் பேசி தீர்த்துக்கொள்ள வேண்டும். அவர்களுக்கு எதிராக அரசோ, சட்டமன்றமோ இல்லை.

கொரோனா தொற்று பரவல்  தமிழகத்தில் மிகக் குறைவாகவே உள்ளது. அனைவரும் முககவசம் அணிய வேண்டுமென மக்கள் நல்வாழ்வுத்துறை அமைச்சர் கேட்டுக்கொண்டுள்ளார். அந்த அடிப்படையில் சட்டமன்ற கூட்டத்தின் போதும் அனைவரும் முகக் கவசம் அணிய வேண்டும் என்ற வழிகாட்டுதல் நெறிமுறை பின்பற்றப்படும்.

அரசு தரப்பில் விசாரணை ஆணைய அறிக்கைகள் உள்ளிட்ட முக்கிய அறிக்கைகளை நிறைவேற்றி தருமாறு கோரினால் அந்த அறிக்கைகளை சட்டமன்றத்தில் வைத்து நிறைவேற்றித் தர நடவடிக்கை எடுக்கப்படும். இதுகுறித்து அரசு தான் முடிவெடுக்க வேண்டும். ஆளுநர்  உரை முழுமையாக நேரலையாக ஒளிபரப்பப்படும். சட்டமன்ற நிகழ்வுகளை பொறுத்தமட்டில் கேள்வி-நேரம் வரை நேரலை ஒளிபரப்பு செய்யப்படுகிறது. சட்டமன்றத்தில் நடைபெறும் விவாதங்களை நேரலையாக ஒளிபரப்பு செய்வது தொடர்பான முயற்சிகள் மேற்கொள்ளப்பட்டு வருகிறது.

எனக் கூறினார்.

சட்டசபையில் ஆளுநர்  ஆர்.என்.ரவி ஆங்கிலத்தில் உரை நிகழ்த்துவார். அவரது உரை சுமார் 1 மணி நேரத்துக்கு மேலாக இருக்கும். அதன்பின்னர், அந்த உரையை தமிழில் சபாநாயகர் மு.அப்பாவு வாசிப்பார். அத்துடன் அன்றைய கூட்டம் முடியும்.

தொடர்ந்து, சட்டசபை கூட்டத்தொடரை எத்தனை நாட்கள் நடத்துவது என்பது குறித்து விவாதிப்பதற்காக, அலுவல் ஆய்வு குழு கூட்டம் சபாநாயகர் மு.அப்பாவு தலைமையில் நடைபெறும். அதில், சட்டமன்ற அனைத்துக் கட்சி சார்பில் உறுப்பினர்கள் கலந்துகொள்வார்கள்.

மூன்று அல்லது நான்கு நாட்கள் சட்டசபை கூட்டம் நடைபெறுமென்று தெரிகிறது. இந்தக் கூட்டத்தொடரில், ஆளுநர்  உரைக்கு நன்றி தெரிவிக்கும் தீர்மானத்தின் மீதான விவாதம் நடைபெறும். இந்த விவாதத்தில் பங்கேற்று ஆளும் மற்றும் எதிர்க்கட்சி உறுப்பினர்கள் பேசுவார்கள். நிறைவு நாளில், முதல்-அமைச்சர் மு.க.ஸ்டாலின், எதிர்க்கட்சி தலைவர் எடப்பாடி கே. பழனிசாமி ஆகியோர் பேசுவார்கள். சட்டசபையின் இந்த கூட்டத்தொடர் நிறைவடையும். அடுத்து பிப்ரவரி மாதம் 2023-2024-ம் ஆண்டுக்கான பொது நிதிநிலை அறிக்கையும் வேளாண்மைத் துறை நிதிநிலை அறிக்கையும் சட்டசபையில் தாக்கல் செய்யப்பட்டு பட்ஜெட் மீதான விவாதமும் நடைபெறும்.

அதன்பிறகு, துறை வாரியாக மானியக் கோரிக்கை விவாதமும் நடைபெறும். இந்த கூட்டத்தொடர் ஒரு மாதத்திற்கு மேலாக நடைபெறும் என்பது குறிப்பிடத்தக்கதாகும்.