பழனி கும்பாபிஷேகத்தில் கலந்து கொள்ள அறநிலையத் துறையின் கட்டுப்பாடுகள் பக்தர்கள் அதிர்ச்சி

மேற்குத் தொடர்ச்சி மலையில் தனியே அமைந்த  பழனி மலையில் 18 சித்தர்களில் ஒருவர் போகரால்  நவபாசாணத்தால் செய்த புகழ் பெற்ற முருகன் சிலை, மலைக்கோயிலில் உள்ளது. 

அறுபடை வீடுகளில் ஒன்றான திருஆவினன்குடி கோவிலும் இங்கு உள்ளது.இதன் சங்ககாலப் பெயர் பொதினி. சங்க இலக்கியத்தில் பத்துப்பாட்டின் முதல் நூலான திருமுருகாற்றுப்படையில் நக்கீரர் குறிப்பிடுவது ஆவினன்குடியே ஆகும். “தா இல் கொள்கை மடந்தையொடு சில் நாள் ஆவினன்குடி அசைதலும் உரியன்” எனக் குறிப்பிடுகிறார். அதில் வருத்தமே இல்லாத வள்ளியோடு சில நாட்கள் முருகன் தங்கியிருந்து இயங்கிய ஆவினன்குடி என்பது  பொருள். ஆகையால் நக்கீரர் குறிப்பிடும் கோவிலும் இன்று கொண்டாடப்படும் பழனிமலைக் கோயிலும் வேறு வேறு. நக்கீரருக்குப் பிறகு போகர் உருவாக்கியது  பழனி மலைக்கோவில்.

வையாவி கோப்பெரும் பேகன் என்று அழைக்கப்படும் கடையெழு வள்ளல்களில் ஒருவரான மயிலுக்குப் போர்வை தந்த பேகன் பிறந்த குடிக்குப் பெயர் ஆவியர்குடி. அந்தக் குடி அமர்ந்து அரசு புரிந்த இடம் தான் ஆவினன்குடி. பிற்காலத் தமிழர் ஆட்சியில் வையாவிக்கோ நாட்டை வையாபுரி நாடு அல்லது வைகாபுரி நாடு என்றனர் வரலாற்றில்.மூன்றாம் படைவீடு பழனி அருள்மிகு தண்டாயுதபாணி சுவாமி திருக்கோவில்   கும்பாபிஷேகத்தில் பக்தர்கள் கலந்துகொள்ள இணையதள முன்பதிவு தொடங்கியுள்ளது. அதன் பின்னர் குலுக்கல் முறையில் தேர்வு செய்யப்படும் பக்தர்களுக்கு மட்டுமே ஜனவரி மாதம் 22 ஆம் தேதி உறுதி செய்யும் தகவல் மின்னஞ்சல் வழியாகவும், மற்றும் செல்லுலர் தொலைபேசி வாயிலாக   குறுந்தகவல் அனுப்பி வைக்கப்படும் எனவும் ஹிந்து சமய அறநிலையத்துறை சார்பில் தெரிவிக்கப்பட்டுள்ளது. அதாவது 

பழனி கோவில் கும்பாபிஷேகம். வாய்ப்பு  இருந்தால் மட்டுமே முருகனைத் தரிசிக்கலாம். குலுக்கல் மூலம் டிக்கெட் உறுதியாகும்.

தற்போது  இணையதள முன்பதிவு இன்று முதல் தொடங்கியுள்ளது. 

தமிழ்நாட்டில் அதிகமாக பக்தர்கள் வரும் இக்கோவிலில்  2006 ஆம் ஆண்டு கும்பாபிஷேகம் நடத்தப்பட்டது. ஆகம விதிப்படி 12 ஆண்டுகளுக்கு ஒருமுறை கும்பாபிஷேகம் நடத்தப்பட வேண்டும். இதன்படி கடந்த 2018 ஆம் ஆண்டு பழநி கோவிலில் கும்பாபிஷேகம் நடத்தப்பட்டிருக்க வேண்டும். ஆனால், நடத்தப்படவில்லை.பல தரப்பினரும் கும்பாபிஷேகம் நடத்த வேண்டுமென கோரிக்கை விடுத்தனர். அதனைத் தொடர்ந்து  2019 ஆம் ஆண்டு டிசம்பர் மாதம் இறுதியில் கும்பாபிஷேகம் நடத்துவதற்காக பாலாலயம் நடைபெற்றது. ஆனால், கொரோனா தொற்று பரவல்  உள்ளிட்ட பல காரணங்களால் பணிகள் நடைபெறுவதில் தாமதம் ஏற்பட்டது.

 2021ஆம் ஆண்டு ஆட்சி மாற்றம் ஏற்பட்டது. கும்பாபிஷேகத் திருப் பணிகளை துரிதப்படுத்த வேண்டுமென பழநி சட்டமன்ற உறுப்பினர் ஐ.பி.செந்தில்குமார் தமிழ்நாடு முதல்வர் மற்றும் இந்து சமய அறநிலையத்துறை அமைச்சரிடம் வலியுறுத்தியதையடுத்து அறநிலையத்துறை அமைச்சர் பழநி கோவிலை ஆய்வு செய்து கும்பாபிஷேகப் பணிகளை துரிதப்படுத்த உத்தரவிட்டார். அதனைத்தொடர்ந்து கும்பாபிஷேகப் பணிகள் முழுவீச்சில் நடைபெற்றன. ரூபாய்.16 கோடி செலவில் கட்டுமானம் மற்றும் அழகுபடுத்துதல் பணி நடைபெற்று முடிந்துள்ளது.  கும்பாபிஷேகத்திற்காக, 2022 டிசம்பர் மாதம் 25 ஆம் தேதி பழனி மலைக்கோவிலில் முகூர்த்தக்கால் நடப்பட்ட நிலையில் கும்பாபிஷேகத்துக்கு இன்னும் 8 நாட்களே உள்ள நிலையில் கோவிலில் திருப்பணிகள் முழுவீச்சில் நடைபெறுகிறது. அர்ச்சகர்களின் புகார்களுக்கு மத்தியில் கும்பாபிஷேகப் பணிகள் இறுதிகட்டத்தை எட்டியுள்ளது.

ஜனவரி 27ஆம் தேதி கும்பாபிஷேகம் நடைபெறுகிறது. 16 ஆண்டுகளுக்கு பிறகு கும்பாபிஷேகம் நடைபெறுவதால் பக்தர்கள் மத்தியில் பெரும் எதிர்பார்ப்பு நிலவிய நிலையில்,  கும்பாபிஷேகத்தில் பக்தர்கள் கலந்துகொள்வதற்கான இணையதள முன்பதிவு இன்று தொடங்கியுள்ளது. கும்பாபிஷேகத்தில் கலந்துகொள்ள www.palanimurugan.hrce.gov.in மற்றும் www.hrce.tn.gov.in ஆகிய இணையதளத்தில் 18. ஆம் தேதி நேற்று முதல் 20 ஆம் தேதி வரை 3 நாட்கள் முன்பதிவு செய்யலாம் எனவும் அதற்கு ஆதார் அட்டை, வருமான வரி அட்டை,கடவுச்சீட்டு , பொது வினியோகத் திடட குடும்ப அட்டை, ஓட்டுனர் உரிமம், வாக்காளர் அடையாள அட்டை, வங்கிக் கணக்குப் புத்தகம் ஆகியவற்றில் ஏதேனும் ஒன்றுடன் செல்லுலர் தொலைபேசி  எண், மின்னஞ்சல் முகவரி போன்ற விவரங்களை அளித்து முன்பதிவு செய்யலாம் என கோவில் நிர்வாகம் அறிவித்துள்ளது.

ஜனவரி 21ஆம் தேதி குலுக்கல் முறையில் பக்தர்கள் தேர்வு செய்யப்படுவார்கள். அவ்வாறு தேர்வு செய்யப்படும் பக்தர்களுக்கு ஜனவரி 22 ஆம் தேதி உறுதி செய்யப்பட்டதற்கான தகவல் மின்னஞ்சல் வழியாகவும், செல்லுலர் தொலைபேசி  குறுந்தகவல் மூலமும் அனுப்பி வைக்கப்படும். இந்தத் தகவல் கிடைக்கப்பெற்றவர்கள் வருகிற ஜனவரி 23, 24 ஆகிய தேதிகளில் பழனி ரயில்வே பீடர் சாலையில்  உள்ள வேலவன் விடுதியில் பதிவேற்றம் செய்ய சான்றிதழ் நகலுடன் வந்து கட்டணமில்லா சீட்டை பெற்றுக் கொள்ளலாம் எனவும்.

மேற்கண்ட 2 நாட்களிலும் காலை 10 மணி முதல் மாலை 5 மணி வரை மட்டுமே கட்டணமில்லா சீட்டு பெற முடியும். குறிப்பிட்ட நேரத்திற்கு பின்பு வருவோருக்கு சீட்டு வழங்க இயலாது. இந்தச் சீட்டை கொண்டு படிப்பாதை வழியே மட்டுமே மலைக்கோவிலுக்கு செல்லலாம். ரோப்கார், மின் இழுவை ரயில் போன்ற சேவைகளுக்கு இது பொருந்தாது என அறநிலையத் துறை நிர்வாகம் தெரிவித்துள்ளது.கும்பாபிஷேகத்தை முன்னிட்டு ஜனவரி 23 ஆம் தேதி முதற்கால யாகசாலை பூஜைகள் தொடங்கும். ஜனவரி மாதம்  26 ஆம் தேதி காலை 9.50 மணி முதல் 11 மணி வரை பாதவிநாயகர் முதல் இரட்டை விநாயகர் வரை உள்ள பரிவார தெய்வங்களுக்கான சன்னதிகளுக்கு கும்பாபிஷேகம் நடைபெறும். ஜனவரி 27ஆம் தேதி வெள்ளிக்கிழமை காலை 8 மணி முதல் 9.30 மணிக்குள் கும்பாபிஷேகம் நடைபெறும் என அறிவிக்கப்பட்டுள்ளது.

அதாவது 17 ஆண்டுகளுக்குப் பிறகு பழனி  கோவிலில் நடைபெறப்போகும் கும்பாபிஷேகத்தை பார்க்க பக்தர்கள் ஆவலாக உள்ள நிலையில்

ஆன்லைனில் டிக்கெட் புக் செய்தாலும் அதிர்ஷ்டம் இருந்தால் மட்டுமே அருள் கிடைக்கும் என்ற நிலையை இந்துசமய அறநிலையத் துறை உருவாக்கியுள்ளது பக்தர்களுக்கு கவலை  ஏற்பட்டுள்ளது.