ஆம்ரோ கிங்ஸ் நிறுவனத்தில் ஒரு லட்ச ரூபாய் முதலீடு செய்தால் மாதம் பத்து சதவீதம் என்ற அடிப்படையில் பத்தாயிரம் ரூபாய் திரும்பத் தருவதாக கூறினர்.
மேலும் பொதுமக்களிடம் வசூலிக்கும் பணத்தை ரியல் எஸ்டேட், சூப்பர் மார்க்கெட்,ஹோட்டல்கள், இன்சூரன்ஸ் நிறுவனம், தங்க வியாபாரம் உள்ளிட்ட 18 தொழில்களில் முதலீடு செய்து, அதில் பணத்தை முதலீடு செய்தவர்களையும் பங்குதாரர்களாக சேர்த்து ஒரு லட்சம் ரூபாய்க்கு 10 ஆயிரம் ரூபாய் வரை மாதம் திரும்பத் தருவதாக உறுதியளித்துள்ளனர்.இதனை நம்பி ஆயிரக்கணக்கான மக்கள் தங்கள் பணத்தை இந்த நிறுவனத்தில் முதலீடு செய்தனர். பணம் முதலீடு செய்தவர்களுக்கு உறுதியளித்ததை போல சில மாதங்கள், ஒரு லட்சத்திற்கு 10 ஆயிரம் ரூபாய் வரை திரும்ப வழங்கப்பட்டுள்ளது.ஆனால் சில மாதங்களுக்கு பிறகு ராஜராஜன், அவரது மனைவி முத்துலட்சுமி ஆகியோர் தங்கள் வேலையை காட்டத்தொடங்கினர். பணத்தை திரும்பத் தராமல் நிறுவனத்தை மூடிவிட்டு ராஜராஜன், அவரது மனைவி முத்துலட்சுமி உள்ளிட்டோர் தலைமறைவாகினர்.இதனையடுத்து முதலீடு செய்தவர்கள் தாங்கள் ஏமாற்றப்பட்டதை உணர்ந்து பெரும் அதிர்ச்சி அடைந்தனர். பலரும் பல லட்சம் ரூபாய் இதில் முதலீடு செய்து ஏமாற்றம் அடைந்தனர்.இந்த நிறுவனத்தின் உரிமையாளர்கள், நிறுவனத்தில் தங்களை சேர்த்துவிட்ட முகவர்கள் மீதும் சென்னை மாநகர காவல் ஆணையர் அலுவலகத்தில் புகார் அளித்தனர்.இந்த புகார் பொருளாதார குற்றப்பிரிவுக்கு மாற்றப்பட்டது. குறிப்பாக அசோக் நகரைச் சேர்ந்த சாந்தகுமார் என்பவர், 71 முதலீட்டாளர்களிடமிருந்து 3.26 கோடி ரூபாய் மதிப்பிற்கு மோசடி செய்துள்ளனர் என்று புகார் அளித்துள்ளார்.
இந்த புகாரின் அடிப்படையில் பொருளாதார குற்றப்பிரிவு காவல்துறை மார்ச் 16ஆம் தேதி வழக்குபதிவு செய்து விசாரணை மேற்கொண்டனர். இது தொடர்பாக நிறுவனத்தின் நிர்வாகிகள் மற்றும் அலுவலகத்தில் கடந்த மார்ச் 18ஆம் தேதி ஐந்து இடங்களில் சோதனை நடத்தி பல முக்கிய ஆவணங்கள் பணம், தங்கம், வெள்ளி, நகை, கார், எலெக்ட்ரானிக் ஆவணங்கள் ஆகியவற்றை பொருளாதார குற்றப்பிரிவு காவல்துறையினர் பறிமுதல் செய்துள்ளனர்.இந்நிலையில் தலைமறைவாக இருந்த ராஜராஜன்,முத்துலட்சுமி மற்றும் ரஞ்சித்குமார் ஆகியோரை நேற்றுமுன்தினம் இரவு காவல்துறையினர் கைது செய்து விசாரணை நடத்தினர். அதில் ‘சதுரங்கவேட்டை’ படப்பாணியில் எம்எல்எம் போல் பல்வேறு கூட்டங்களை நடத்தி ஆசை வார்த்தை காட்டி பலரையும் இந்த மோசடியில் சிக்க வைத்தது தெரியவந்தது.முக்கிய தரகரான அய்யனார் என்பவரை தேடி வருகின்றனர். பொதுமக்களிடம் வசூல் செய்த பணத்தில் வாங்கப்பட்ட சொத்துக்கள் குறித்து ஆவணங்களைப் பொருளாதார குற்றப்பிரிவு காவல்துறையினர் சேகரித்து வருகின்றனர்.
கருத்துகள்