மூத்த வழக்கறிஞர்கள் தங்களிடம் பணி செய்யும் இளம் வழக்குரைஞர்களுக்கு உரிய ஊதியம் வழங்க வலியுறுத்தி உத்தரவு

முதுநிலை வழக்கறிஞர்களிடம் இளநிலை பயிற்சி வழக்குரைஞராகப் பணி செய்பவர்களுக்கு

மாதம்தோறும் ரூபாய்.20,000 உதவித்தொகை !

சென்னை உயர்நீதிமன்றத்தில் வழக்கறிஞர்களாக பணியாற்றுபவர்கள் தங்களுக்கு வழக்கு உதவிக்கான இளம் வழக்குரைஞர்களை வைத்துக்கொள்கிறார்கள்.

ஆனால்,  அந்த இளம் வழக்குரைஞர்களுக்கு முறையான ஊதியம் ஏதும் தரப்படுவதில்லை என்கிற குற்றச்சாட்டு நீண்ட காலமாகவே எழுகிற நிலையில்

சென்னை, மதுரை உள்ளிட்ட நகரங்களில் பணியாற்றும் இளம் வழக்குரைஞர்களுக்கு மாதம் தோறும் ரூபாய் 20 ஆயிரம் உதவித்தொகை வழங்க வேண்டுமென்றும்,

மற்ற நகரங்களில் ரூபாய் .15 ஆயிரம் வழங்க வேண்டுமென மூத்த வழக்கறிஞர்களுக்குச் சுற்றறிக்கை பிறப்பிக்க தமிழ்நாடு மற்றும் புதுச்சேரி பார் கவுன்சிலுக்கு உயர் நீதிமன்றம் உத்தரவிட்டது.

வழக்கறிஞர்கள் நல நிதிச்சட்டத்தை புதுச்சேரி யூனியன் பிரதேசத்தில் அமல்படுத்த உத்தரவிடக் கோரி புதுச்சேரியைச் சேர்ந்த வழக்கறிஞர் ஃபரிதா பேகம் சென்னை உயர் நீதிமன்றத்தில் தாக்கல் செய்த வழக்கை விசாரித்த நீதிபதிகள் எஸ்.எம்.சுப்ரமணியம், சி.குமரப்பன் ஆகியோர் அடங்கிய அமர்வு, "வழக்கறிஞர்கள் நல நிதியத் திட்டத்தின் கீழ் இளம் வழக்குரைஞர்களுக்கு வழங்கப்படும் உதவித் தொகையை அதிகரித்து வழங்குவது குறித்து தமிழ்நாடு மற்றும் புதுச்சேரி பார் கவுன்சில், புதுச்சேரி அரசு மற்றும் புதுச்சேரி - காரைக்கால் வழக்கறிஞர்களின் சங்கங்களுடன் இணைந்து பேசிக் கலந்தாலோசித்து கருத்துருக்களை இறுதி செய்ய வேண்டும்.

மேலும், தமிழ்நாடு மற்றும் புதுச்சேரியில் உள்ள இளம் வழக்குரைஞர்களுக்கு குறிப்பாக, சென்னை, திருச்சிராப்பள்ளி மதுரை, கோயம்புத்தூர் உள்ளிட்ட நகரங்களைச் சேர்ந்தவர்களுக்கு மாதம் தோறும் ரூபாய்.20 ஆயிரத்தையும், மற்ற நகரங்களில் வசிப்பவர்களுக்கு உதவித் தொகையாக ரூபாய்.15 ஆயிரத்தை மூத்த வழக்கறிஞர்கள் வழங்க வேண்டும். இது தொடர்பாக அனைத்து வழக்கறிஞர்களுக்கும் நான்கு வாரங்களில் தமிழ்நாடு மற்றும் புதுச்சேரி பார் கவுன்சில் சுற்றறிக்கை பிறப்பிக்க வேண்டும். இளம் வழக்குரைஞர்களுக்கான உதவித் தொகையை எந்தவொரு பாரபட்சமும் இல்லாமல் வழங்க வேண்டும்" என உத்தரவிடப்பட்டுள்ளது.