நீதிமன்ற அவமதிப்பு வழக்கில் ஹிந்து சமய அறநிலையத் துறை ஆணையர் விளக்கம் ஏற்று ஒருவாரம் வழக்கு தள்ளிவைப்பு

தேசிய பாரம்பரியச் சின்னமான, விஜய வரதராஜப் பெருமாள் கோவிலை பாதுகாக்க, அறநிலையத் துறை அலுவலர்கள் முனைப்புக் காட்டாதது துரதிருஷ்டவசமானது.

கோவில் தொடர்பாக, நீதிமன்றம் பிறப்பிக்கும் உத்தரவுகளை, முறையாக அமல்படுதாவிட்டால், அறநிலையத் துறை ஆணையரை நீக்கம் செய்ய உத்தரவிட நேரிடும்' என, சென்னை உயர்நீதிமன்றம் எச்சரித்தது.

செங்கல்பட்டு மாவட்டம், பாபுராயன்பேட்டை கிராமத்தில், ஸ்ரீ விஜய வரதராஜப் பெருமாள் கோவில், ஹிந்து சமய அறநிலையத் துறையின் நிர்வாக கட்டுப்பாட்டில் உள்ளது.  வடகலை வைணவ சம்பிரதாயப்படி, திருப்பணிகள் செய்து,

கும்பாபிஷேகம் நடத்த உத்தரவிட வேண்டும் என கோரிக்கை வைத்து, சென்னை உயர் நீதிமன்றத்தில், வழக்கறிஞர் பி.ஜெகந்நாத் பொது நல மனு தாக்கல் செய்தார் விசாரித்த உயர் நீதிமன்றம், கோவிலில் கும்பாபிஷேகம் நடத்த, 12 வாரங்களில் நடவடிக்கை எடுக்க வேண்டும் என,

2020 ஆம் ஆண்டில் தமிழ்நாடு அரசு ஹிந்து சமய அறநிலையத்துறைக்கு உத்தரவிட்டது. அந்த உத்தரவை அமல்படுத்தவில்லை என, வழக்கறிஞர் பி.ஜெகந்நாத், நீதிமன்ற அவமதிப்பு வழக்குத் தொடர்ந்தார். உயர் நீதிமன்றத்தின் தலைமை நீதிபதி கே.ஆர்.ஸ்ரீராம், நீதிபதி செந்தில்குமார் இராமமூர்த்தி ஆகியோர் அடங்கிய முதல் அமர்வில், நேற்று விசாரணைக்கு வந்த போது,

வழக்கறிஞர் ஜெகந்நாத் நேரில் ஆஜராகி, ''பழமையான கோவில், தற்போது மிகவும் சிதிலமடைந்துள்ளது. கோவிலைச் சுற்றி முட்செடிகள் முளைத்து, புதர் மண்டியுள்ளது. நீதிமன்றம் உத்தரவிட்டும், இதுவரை கோவில் நிர்வாகம் செய்து வரும் ஹிந்து சமய அறநிலையத் துறை கும்பாபிஷேகம் நடத்த முயற்சி எடுக்கவில்லை,'' எனக் கூறி, அதற்கான புகைப்படங்களை தாக்கல் செய்தார்.

அதைப் பார்த்த முதல் பெஞ்ச், ஹிந்து சமய அறநிலையத்துறை ஆணையர், பிற்பகலில் உயர்நீதிமன்ற பெஞ்ச் முன் ஆஜராக உத்தரவிட்டது; மதியம் 2.15 மணிக்கு வழக்கு விசாரணைக்கு வந்தது.

வீடியோ கான்பரன்ஸ் வாயிலாக, அறநிலையத் துறை ஆணையர் பி.என்.ஸ்ரீதர் ஆஜரானார். அறநிலையத்துறை தரப்பில், கூடுதல் அட்வகேட் ஜெனரல் ஜெ.ரவீந்திரன், சிறப்பு பிளீடர் அருண் நடராஜன் ஆஜராகி, 'கோவில் முழுமையும் ஆய்வு செய்யப்படும். ஒரு வாரத்துக்குள் சீரமைக்கும் பணிகள் துவக்கப்படும். பணிகள் முடிக்கப்பட்டு, அது தொடர்பான புகைப்பட ஆதாரங்கள் தாக்கல் செய்யப்படும்' எனத் தெரிவித்தனர்.

அதையடுத்து நீதிபதிகள் தெரிவித்ததாவது:

நீதிமன்ற அவமதிப்பு வழக்கு, இரண்டு ஆண்டுகளாக நிலுவையிலுள்ளது. பொது நல வழக்கை விசாரித்த நீதிமன்றம், கடந்த ஐந்து ஆண்டுகளுக்கு முன் உத்தரவு பிறப்பித்துள்ளது. அப்படியிருந்தும், இந்த விஷயத்தை, ஹிந்து சமய அறநிலையத்துறை அலட்சியத்துடனும், மந்த கதியிலும் செயல்பட்டுள்ளது. இது ஏமாற்றமளிக்கிறது.

மனுதாரர் தரப்பில் தாக்கல் செய்த புகைப்படங்களைப் பார்க்கும்போது, கோவில் குளம், வசந்த மண்டபம், மிகவும் சிதிலமடைந்துள்ளது நன்றாகவே தெரிகிறது. ஆலயம் சீரமைப்பு செய்யாவிட்டால் ஆணையரை நீக்கம் செய்யும் படியும், இணை ஆணையருக்கு, எந்தவிதமான பதவி உயர்வும் வழங்கக்கூடாது என்றும், உத்தரவு பிறப்பிக்க நேரிடும்.

எனவே, உடனே ஹிந்து சமய அறநிலையத்துறை அலுவலர்கள், கோவிலை ஆய்வு செய்து, பணிகளை விரைவில் துவக்க வேண்டும். மேலும், புதர்களை அகற்ற வேண்டும். பணிகள் நடந்துள்ளதா என்பதை, மனுதாரர் நேரில் சென்று, புகைப்படங்கள் எடுத்து, நீதிமன்றத்துக்கு சமர்ப்பிக்கலாம்.

விஜய வரதராஜ பெருமாள் கோவிலில் இதுவரை நடந்துள்ள சீரமைப்புப் பணிகள் என்ன, அடுத்து என்ன நடவடிக்கை எடுக்கப் போகிறீர்கள் என்பது குறித்து, அறநிலையத்துறை ஆணையர் பதிலளிக்க வேண்டும்.

இவ்வாறு நீதிபதிகள் உத்தரவிட்டு, விசாரணையை நவம்பர் மாதம் 29 ஆம் தேதிக்குத் தள்ளி வைத்தனர். ஐந்து கோபுரங்களும் அதன் பிரகாரங்களும் கொண்ட சிறப்புற்ற கோயில் கவனிப்பின்மையால் காலப்போக்கில் சிதிலமடைந்தது. 2013 ஆம் ஆண்டு புனர்நிர்மாணப் பணிக்குழு பக்தர்களாலும் கிராமத்தாராலும் துவக்கப்பட்டது.     தற்போது சென்னை உயர்நீதிமன்றம்  W.P. 9692 / 2020 ன் படி வழக்கறிஞர் பி.ஜெகநாத் முயற்சியில் டிவிஷன் பெஞ்ச் உத்தரவு மூலம் ஹிந்து சமய அறநிலையத்துறை பணிகள் துவங்க வாய்ப்பு உள்ளது. காஞ்சிபுரம் வரதராஜபெருமாள் உற்சவர் ஆண்டுக்கொருமுறை இங்கு எழுந்தருள்வது வழக்கம். பாபுராயன், காடாக இருந்த இடத்தை மாற்றியமைத்த போது அங்கே புற்று ஒன்றில் பசு தானாகவே பால் சொரிவது கண்டு அந்த இடத்தை சுத்தம் செய்து நிலத்தை அகழ்வு  செய்யவே அங்கு இரண்டு ஆஞ்சநேயர் சிலைகள் வெளிப்பட்டன.   விஜயநகரப் பேரரசின் நாயக்க மன்னர்களால் கட்டப்பட்ட திருத்தலமே பாபுராயன்பேட்டை ஸ்ரீ விஜயவரதராஜப் பெருமாள் திருக்கோவில். தமிழ்நாட்டில் செங்கல்பட்டு மாவட்டம் மேல்மருவத்தூர் அருகில் பாபுராயன்பேட்டை கிராமத்தில் அமைந்துள்ள விஜய வரதராஜ பெருமாள் கோவில்.                                      சுமார் 500 வருடங்களுக்கு முன் கட்டப்பட்ட பிரமாண்டமான பெருமாள் கோவிலாகும்.                               கோவில் சிதிலமடைந்து விட்டாலும், தினமும் ஒரு காலப் பூஜை நடக்கிறது,                             மூலவர் விஜய வரதராஜர் , தாயார் விஜயவல்லி தாயார் என அழைக்கப்படுகிறார், கோவில் 16 ஏக்கர் நிலப் பரப்பளவில் அமைந்துள்ளது. மிகப்பெரிய பரப்பளவில் அமைதியான சூழ்நிலையில் அழகாக அமைந்திருக்கும் இந்தக் கோவில் அதன் முக்கிய கடந்த காலத்தில் எப்படி இருந்திருக்கும் என கற்பனை செய்தால் தற்போது நிலை காண வருத்தமே மிஞ்சும்.                      கோவிலுக்கான மானியம் நிலங்கள் அதிகமாக இருந்தும், கோவில் பராமரிப்பின்றி உள்ளது. இது இப்போது HR & CE துறையின் கட்டுப்பாட்டில் உள்ளது. சென்னை - திருச்சிராப்பள்ளி நெடுஞ்சாலையில் உள்ள தொழுப்பேடுக்கு மேற்கே 7 கிலோ மீட்டர் தொலைவில் அமைந்துள்ளது. தொழுப்பேட்டிலிருந்து கோவிலுக்கு ஆட்டோக்கள் செல்லும்.                           இதில் பொது நீதி யாதெனில் :- நீதிமன்றம் உத்தரவிருந்தும் நடவடிக்கைகள் எடுக்காமலிருக்கக் காரணம் ஹிந்து சமய அறநிலையத் துறை என்பது ஆலயத்தில் வருவாய் வந்தால் உள்ளே நுழைந்து ஊழல் செய்வதும், வருவாய் இல்லாத ஆலயங்கள் பல கண்டு கொள்ளாமல் இருப்பதும் பல இடங்களில் கண்கூடு. வருவாய் வரவில்லை எனில் அந்த ஆலயத்தில் விபூதி குங்குமம் கூட அறநிலையத் துறை சார்பில் வாங்க மாட்டார்கள், அதற்கும் யாராவது உபயதாரர்கள் வருவார்களா? எனக் காத்திருக்கும் நிலை தான் இன்னும் தொடர்கின்றது, இதை மாற்ற ஜெகநாத் போல வழக்கறிஞர்கள் வரவேண்டும்.