புகழ் பெற்ற நடிகை பத்மஸ்ரீ சரோஜா தேவி, காலமானார்

இந்தியத் திரையுலகின் பொற்காலத்தைத் தனது வசீகர நடிப்பால் அலங்கரித்த,

தமிழ்நாட்டில் நாடோடி மன்னன் திரைப்படத்தில் 1957 ஆம் ஆண்டில் அறிமுகம்.   பிறகு 1958 ஆம் ஆண்டில் இயக்குனர் ஸ்ரீதரின் கல்யாண பரிசு துவங்கி  1960 முதல் 1990 வரை முப்பது வருடங்களில் மிகவும் புகழ் பெற்ற நடிகை சரோஜா தேவி, இன்று ஜூலை மாதம் 14 ஆம் தேதி, 2025 ல் 87-வது வயதில் காலமானார். கன்னடத்துப் பைங்கிளி, அபிநய சரஸ்வதி என ரசிகர்கள் மத்தியில் அழைக்கப்பட்ட சரோஜா தேவி காலமானார்

பெங்களூரு மல்லேஸ்வரத்தில் அவரது இல்லத்தில், வயது மூப்பும் உடல்நலக் குறைபாடு காரணமாக காலை 9 மணியளவில் அவரது உயிர் பிரிந்ததாக தகவல் தெரிகிறது. இந்தியத் திரையுலகில்  கோடிக்கணக்கான உலக  ரசிகர்களை அவரது மறைவு சோகத்தில் ஆழ்த்தியுள்ளது.

கன்னடத்து பைங்கிளி, அபிநய சரஸ்வதி என்ற அடைமொழியுடன் கன்னட திரையுலகில் புகழ் கொடி நாட்டிய நடிகைகளில் முதன்மையான சரோஜா தேவி, தமிழ், தெலுங்கு, ஹிந்தி மொழிகளிலும்  முத்திரையைப் பதித்தவரது நீண்ட திரையுலகப் பயணத்தில், 160 க்கும் மேற்பட்ட திரைப்படங்களில் நடித்துள்ளார்.

தமிழ் திரைப்படத்தில், மக்கள் திலகம் எம்.ஜி.ஆர்., உடன் 26 திரைப்படங்களிலும், நடிகர் திலகம் சிவாஜி கணேசன் உடன் 22 திரைப்படங்களிலும் நடித்துள்ளார். தென்னிந்திய திரையுலகில் ஜாம்பவான்களுடன் இணைந்து மறக்க முடியாத பல வெற்றிப் படங்களில் நடித்த சரோஜா தேவி அன்பே வா, அன்னை இல்லம், நாடோடி மன்னன், பாகப்பிரிவினை,திருவிளையாடல்,போன்ற திரைப்படங்களில் அவரது பங்களிப்பு இன்று வரை  பேசப்படுகிறது. இவரது இயல்பான நடிப்பு, வசீகரமான புன்னகை மற்றும் கதாநாயகர்களுடன் இணக்கமான கதாநாயகி ஜோடிப் பொருத்தம் ஆகியவை அவரை ஒரு தலைமுறை ரசிகர்களின் கனவு நாயகியாக மாற்றின.

 இந்தியத் திரையுலக வரலாற்றில் தனித்துவமான இடத்தைப் பிடித்துள்ளார். இந்திய அரசு பத்மஸ்ரீ மற்றும் பத்ம பூஷண் விருதுகளை வழங்கிக் கௌரவித்தது. பல மாநில அரசுகளின் விருதுகளையும், வாழ்நாள் சாதனையாளர் விருதுகளையும் பெற்றுள்ளார். திரைப்படங்களில் இருந்து விலகிய பின்னரும், பொது நிகழ்வுகளில் பங்கேற்று வந்த சரோஜா தேவி, சூரியா நடிப்பில் வெளிவந்த ஆதவன் திரைப்படத்தில் குணசித்திர கதாபாத்திரத்தில் நடித்தார் திரைத்துறைக்கு ஒரு வழிகாட்டியாகத் திகழ்ந்தார். அவரது மறைவு, ஒரு தலைசிறந்த நடிகையை மட்டுமல்ல, இந்தியத் திரையுலகின் ஒரு பொற்காலத்தின் நினைவுகளையும் வரலாறு பதிவு செய்து சுமந்து செல்கிறது.

அவரது மறைவுக்குத் திரையுலகப் பிரபலங்களும், அரசியல் தலைவர்களும், ரசிகர்களும்  சமூக வலைத்தளங்கள் மற்றும் நேரடி இரங்கல் செய்திகள் மூலம் அஞ்சலி செலுத்தி வருகின்றனர். பி. சரோஜா தேவியின் மறைவு, இந்திய சினிமாவின் ஒரு சகாப்தத்தின் முடிவைக் குறிக்கிறது. அவரது கலைப் பங்களிப்பு என்றென்றும் நினைவுகூரப்படும்.நடிகை டி.ஆர்.ராஜகுமாரி நடித்த 'கச்ச தேவயானி' திரைப்படத்தை கன்னடத்தில் எடுக்க விரும்பிய கே.சுப்ரமண்யம்

நாயகி தேடி பெங்களூர் வந்த போது 'மகாகவி காளிதாஸா' கன்னடப்படத்தைப் பார்க்கச் சென்றவர் அதில் நடித்த நாயகியை உடனே பேசி சென்னைக்கு கொண்டு வந்தார்.  அந்தப்பெண் இயக்குனரின் மகளான பத்மாவுக்கு நெருக்கமான தோழியானார்  சரோஜா தேவி.

பைரப்பா என்கிற கர்நாடக மாநிலத்தின் கான்ஸ்டபிளுக்கும் ருத்ரம்மாவுக்கும் நான்கு பெண் குழந்தைகள். நான்காவதும் பெண் குழந்தை என்பதால் வேண்டாவெறுப்பாக வளர்க்கப்பட்ட குழந்தை. இடையில் முடக்குவாதம் வேறு. திரும்பவும் கடவுள் அருள் குழந்தை நடக்கத்தொடங்கியது. 

சரோஜா என்கிற குழந்தை நன்றாக ஹிந்திப்பாடல்கள் பாடுவதைக் கண்ட தந்தை அவரை காவல் துறை விழாவில் பாட வைக்க அது பள்ளிப்பாட்டு போட்டி வரை சென்றது. பள்ளிகளுக்கான போட்டியில் பெங்களூரு செயிண்ட் தெரசா பள்ளி மாணவி சரோஜாவின் குரல் நடுவராக வந்திருந்த நடிகர், இயக்குனர் ஹொன்னப்ப பாகவதருக்குப்பிடித்துப்போனது. பாட வைக்க குரல் டெஸ்ட்டோடு, மேக்கப் டெஸ்ட்டும் எடுத்தார். பாடுவதை விட நடிப்பு சிறப்பாக இருந்தது. அப்படி பாகவதரின் 'மகாகவி காளிதாஸ்' படத்தில்  சிறிய வேடம் கொடுத்தார். அடுத்து இரண்டு படங்களில் சிறிய வேடத்தில் நடித்தார் சரோஜா தேவி. 

சுப்ரமண்யம் மூலம் சென்னை வந்த சரோஜாதேவியை அழைத்துக் கொண்டு மகள் பத்மா எழுத்தாளர் சின்ன அண்ணாமலையை சந்தித்தார். சின்ன அண்ணாமலை அப்போது 'தங்கமலை ரகசியம்' படத்தின் கதையை எழுதி படமாக்கிய. நிலை பத்மா சரோஜாவை அறிமுகப்படுத்தி தந்தையின் படத்தில் நடிக்க வந்திருப்பதைச் சொல்லி தமிழில் வாய்ப்புக் கேட்க சின்ன அண்ணாமலைக்கு அந்தப்பெண நடிப்பைப் பிடித்தது. அவர் சிபாரிசில் 'தங்கமலை ரகசியம்' படத்தில் ஒரு பாடலுக்கு நடனமாட வாய்ப்புக் கிடைத்தது. 250 ரூபாய் சம்பளம். பின்னர் சில படங்களில் நடன வாய்ப்புகள் வந்தன.

சின்ன அண்ணாமலை எம்.ஜி.ஆரிடம் தான் தயாரிப்பாளராக வாய்ப்புக் கேட்டார். ஆனால் எம்ஜிஆரை சம்மதிக்க வைக்க அவர் "நீங்கள் சமூகப்படத்தில் நடிக்க வேண்டும். எத்தனை நாள் தான் வாள் சண்டை போட்டுக்கொண்டிருப்பது?" எனப்போட்டு வைக்க அவரும் சிரித்துக்கொண்டே சம்மதிக்க 'சாவித்திரி பிக்சர்ஸ்' கம்பெனி உருவானது.

கதைக்கு ஹிந்தியில் தேவ்ஆனந்த் நடித்த 'பாக்கெட் மார்' படத்தின் கதை காப்பி ரைட்ஸ் வாங்கப்பட்டது. படத்தின் தலைப்பு நல்ல அறிவுரையாக வைக்க வேண்டும். யார் சொல்கிறார்களோ அவர்களுக்கு 500 ரூபாய் பரிசினை எம்.ஜி.ஆர் அறிவிக்க மா.லெட்சுமணன் 'திருடாதே' எனச் சொல்லி 500 ரூபாய் பரிசை வென்றார். 

நாயகியாக புதுமுகத்தைப்போடலாம் என எம்.ஜி.ஆர் சொல்ல சின்ன அண்ணாமலைக்கு சந்தோஷம். ஏனென்றால் 'தங்கமலை ரகசியம்' படத்தில் சரோஜாதேவிக்கு மேக்கப் போட்ட மேக்கப்மேன் 'நல்ல முகவெட்டு இருக்கிறது. புக் செய்து வையுங்கள்' எனச்சொல்ல மூன்று படத்துக்கு தலா 3000, 7500, 10000 என சின்ன அண்ணாமலையே புக் செய்து வைத்திருந்தார். சரோஜாவைப்பற்றி சின்ன அண்ணாமலை புதுமுகத்துக்காக சொல்ல அவரை எம்.ஜி.ஆர் வரச்சொன்னார். மேக்கப் டெஸ்ட் எடுக்கப்பட்டு பலரும் சரோஜாதேவியை கருப்பாக இருக்கிறார், உயரமில்லை என தட்டிக்கழிக்க எம்.ஜி.ஆர் சரோஜாவை நாயகியாக்கத் தீர்மானித்தார். 

"காலை தாங்கி தாங்கி நடக்கிறது இந்தப்பெண்" என ஒருவர் குறை சொல்ல "அதுவும் செக்ஸியாக தானே இருக்கிறது" எனச்சொல்லி 'திருடாதே' நாயகியாக்கியதோடு தன் நாடோடி மன்னன் படத்துக்கும் ஒரு பாடலுக்காக சின்ன அண்ணாமலையின் கால்ஷீட்டை வாங்கினார் எம்.ஜி.ஆர். 

நாடோடி மன்னன் படத்தில் சரோஜா தேவியின் பாடல் எடுத்து முடிந்திருக்க பானுமதி-எம்.ஜி.ஆர் இடையே தகராறு உருவானது. நடிகை பானுமதி 'நாடோடி மன்னன்' படத்திலிருந்து வெளியேற எம்.ஜி.ஆர் சரோஜா தேவியின் எடுத்தப்பாடலை தூக்கி வீசிவிட்டு புதிய நாயகியாக்கி கதையை மாற்றி ஷூட்டிங்கைத்தொடங்கினார்.

இடையில் திருடாதே படத்தின் போது ஏற்பட்ட விபத்தில் எம்.ஜி.ஆரால் நடிக்க முடியாமல் ஷூட்டிங் நின்று போக சின்ன அண்ணாமலை வாங்கிய கடனின் வட்டிக்காக படத்தை ஏ.எல்.சினிவாசனிடம் எம்.ஜி.ஆரே விற்றுக்கொடுத்தார். அதில் சின்ன அண்ணாமலைக்கு நல்ல தொகை கிடைத்தது. அதில் வேறு படமே எடுத்தார் அவர். 

நாடோடி மன்னன் பெருவெற்றி பெற சரோஜா தேவி தமிழ்நாட்டில் முன்னணி நடிகையானார். ஆனால் அதற்கு முன்பே சாண்டோ சின்னப்பாத் தேவர் எடுத்த 'செங்கோட்டை சிங்கம்' சரோஜா தேவியை தமிழ் ரசிகர்கள் மத்தியில் அறிய வைத்தது.

இரண்டு வருடங்களுக்குப்பிறகு 'திருடாதே' வெளியானது. நூறு நாள்  ஓடி வெற்றி விழா கொண்டாடப்பட்டது. படம் துவங்கிய சின்ன அண்ணாமலை இப்போது வெளியில். 

ஆனால் நூறு தேங்காய், நூறு மாம்பழம், நூறு வாழைப்பழத்துடன் அவர் வீட்டு வாசலில் நன்றியோடு ஒரு பெண்  நின்றிருந்தார். 

சின்ன அண்ணாமலையை நெகிழ்வுறச் செய்த அந்தப்பெண் நடிகை சரோஜாதேவி. தன்னை அறிமுகப்படுத்திய தயாரிப்பாளரை மறக்காத அந்தக்குணத்துக்கு அடுத்து ஐம்பது ஆண்டுகளுக்கு அவர் திரையில் தோன்றச் செய்தார் அந்தக்கடவுள்.

சரோஜா தேவி எம்.ஜி.ஆரால் கண்டு பிடிக்கப்பட்ட கருப்பு வைரம். வீச்சு விழிகள். அதில் ஒரு விழியில் கருப்புப் புள்ளி. குவிந்த உதடாக வரையப்பட்ட உதடுகள். கொஞ்சும் குரல். குளோஸ் நெக் ஜாக்கெட். பூப்போட்ட சேலை. காதருகே ஒரு சிறு சுருண்ட கற்றை. அல்ட்ரா மாடர்ன் நடிகைக்கு அடிச்சுக்க வேறு நடிகை கிடையாது. குமரியா? குழந்தையா? என்று குழப்பமடையச்செய்யும் பாவனைகள். ஆனால் அது தான் அவரின் தனித்துவம். காலம் அவரை எடுத்துச் சென்ற போதும் தனது கண்களை கொடுத்துச் சென்றார் அனைவரின் இதய அஞ்சலிகள்