மருந்து தயாரிப்பு தொழில்துறையினருக்கு அமைச்சர் மன்சுக் மாண்டவியா அறிவுரை

இரசாயனம் மற்றும் உரங்கள் அமைச்சகம் உலகச் சந்தையைக் கைப்பற்ற 'அளவில்' இருந்து "மதிப்புக்கு" மாறுவதற்கான நேரம் என மருந்து தயாரிப்பு தொழில்துறையினருக்கு திரு மன்சுக் மாண்டவியா அறிவுரை

உலகளாவிய மருந்துச் சந்தையைப் பிடிக்க 'அளவு' என்பதிலிருந்து "மதிப்பு" என்ற நிலைக்கு மாறவேண்டும் என மருந்து தயாரிப்பு நிறுவனங்களுக்கு மத்திய ரசாயனம், உரத்துறை, சுகாதாரம் மற்றும் குடும்பநலத்துறை அமைச்சர் டாக்டர் மன்சுக் மாண்டவியா ஆலோசனை தெரிவித்துள்ளார். ஆரா ய்ச்சி, உற்பத்தி மற்றும் கண்டுபிடிப்பு ஆகியவற்றில் உலகளாவிய சிறந்த நடைமுறைகளிலிருந்து அறிவைக் குவித்து, நமது உலகளாவிய தடத்தை அதிகரிக்கும் அதே வேளையில் உள்நாட்டுத் தேவையைப் பூர்த்தி செய்ய உற்பத்தியை விரைவுபடுத்துவதில் கவனம் செலுத்தும் நமது சொந்த மாதிரிகளை உருவாக்குவதற்கான நேரம் இது என்று அவர் கூறினார். . இந்திய மருந்து தயாரிப்பு நிறுவனங்களின் பிரதிநிதிகளுடன் நடைபெற்ற கலந்துரையாடல் நிகழ்ச்சியில் கலந்து கொண்ட அவர், மருந்துத் தொழில்துறையின் முன்னணி நிறுவனங்களை இவ்வாறு கேட்டுக்கொண்டார். இந்தியாவின் பார்மா விஷன் 2047 மற்றும் இந்திய மருந்துத் துறைக்கான எதிர்காலத் திட்டம் குறித்து விவாதிப்பதே கூட்டத்தின் நோக்கமாகும். இந்த அமர்வில், இந்தியாவில் மருந்துத் துறையின் தற்போதைய நிலை, கடந்த சில ஆண்டுகளில் அரசு எடுத்த முக்கிய முயற்சிகள் மற்றும் இந்த தொலைநோக்கு பார்வையை இந்தியா உணர உதவும் கூட்டு நடவடிக்கைகள் குறித்து விவாதிக்கப்பட்டது.

அனைத்து துறைகளிலும் தற்சார்பை அடைவதற்கான பிரதமரின் பார்வையை டாக்டர். மன்சுக் மாண்டவியா வலியுறுத்தினார். வரவிருக்கும் ஆண்டுகளில் மருந்துத் துறையை அதன் வளர்ச்சிப் பாதையில் செலுத்துவதற்கு,நம்மிடம்  ஏற்கனவே தேவையான மனிதவளம், வணிக முத்திரை உள்ளது என்றும், இந்திய நிறுவனங்கள் இன்று உலக அளவில் உயர் பதவிகளை கைப்பற்றும் முனைப்பில் உள்ளன என்றும் அவர் கூறினார். இந்தியா அதன் பொதுவான மருந்து உற்பத்தி மற்றும் உலகளாவிய சந்தையில் அளவு பங்கின் அடிப்படையில் "உலகின் மருந்தகம்" என அங்கீகரிக்கப்பட்டுள்ளது. மதிப்பின் அடிப்படையிலும் முன்னேறி, உலக அளவில் முதலிடத்தைப் பிடிக்க வேண்டிய நேரம் இது என்று அவர் வலியுறுத்தினார்.

"உலகமே ஒரு குடும்பம்" என்ற இந்தியாவின் தத்துவத்தை மீண்டும் வலியுறுத்தும் வகையில், உலகிற்கு ஆதரவளிக்கும் அதே நேரத்தில் நமது உள்நாட்டு கோரிக்கைகளுக்கு  எப்போதும் முன்னுரிமை அளிக்கிறோம் என்று அவர் கூறினார்.  தொற்றுநோய் நெருக்கடியின் போது உலகமே இந்தியாவை எதிர்நோக்கியபோது, உதவிகளை வழங்கி,  இந்தியாவின் பலம் பற்றிய உலகளாவிய பாராட்டுக்கு மத்திய அரசு வழிவகுத்தது. மேலும் இந்த வாய்ப்பை அடுத்த கட்டத்திற்கு கொண்டு செல்ல நாம் இப்போது பயன்படுத்த வேண்டும் என்று அமைச்சர் கேட்டுக்கொண்டார்.

தொழில்துறைக்கு ஸ்திரத்தன்மையை வழங்கும் நீண்ட கால கொள்கைகளின் முக்கியத்துவத்தை டாக்டர் மாண்டவியா அடிக்கோடிட்டுக் காட்டினார். தொழில்துறை நட்புக் கொள்கைகள் மற்றும் முதலீட்டாளர்களை ஊக்குவிக்கும் சுற்றுச்சூழல் அமைப்பைக் கொண்டு மருந்து நிறுவனங்களை ஊக்குவிப்பதில் அரசு உறுதிபூண்டுள்ளது என்று அவர் கூறினார்.