புதிய குற்றவியல் சட்டம் பெயர் மாற்றம் கேட்டு வழக்கு தாக்கல் மற்றும் தமிழ்நாடு வழக்கறிஞர்கள் போராட்டம்

புதிய குற்றவியல் நடைமுறைச் சட்டங்களின் சமஸ்கிருதப் பெயர்கள் அரசியலமைப்புக்கு எதிரானது என உத்தரவிடக் கோரி செவ்வாய்க்கிழமை சென்னை உயர்நீதிமன்றத்தில் மனு தாக்கல் செய்யப்பட்டது.

9 மாநிலங்கள் மற்றும் 2 யூனியன் பிரதேசங்களில் மட்டுமே ஹிந்தி  அலுவல் மொழியாக உள்ளதாகவும் சிலர் மட்டுமே சமஸ்கிருதம் பேசுவதாக மனுவில் தெரிவிக்கப்பட்டுள்ளது.

வழக்கறிஞர் இராம்குமார் ஆதித்யன் தாக்கல் செய்த மனுவில் -:

“பாரதிய நியாய சம்ஹிதா, பாரதிய நாகரிக சுரக்க்ஷா, பாரதிய சாக்ஷிய அதினியம் ஆகிய 3 புதிய குற்றவியல் சட்டங்களுக்கு சமஸ்கிருதப் பெயரிடப்பட்டுள்ளது அலுவல் மொழிச் சட்டம் 1963, தமிழ்நாடு அலுவல் மொழிச் சட்டம் 1956 ன் படி, அரசியலமைப்புக்கு எதிரானதென உத்தரவிட வேண்டும்.

ஹிந்தி மற்றும் சமஸ்கிருத மொழிகளில் புதிய சட்டங்களுக்கு அரசு பெயரிட்டுள்ளது. நாட்டில் 28 மாநிலங்கள், 8 யூனியன் பிரதேசங்களுள்ளன. அவற்றில் 9 மாநிலங்கள், 2 யூனியன் பிரதேசங்களில் மட்டுமே ஹிந்தி அலுவல் மொழியாகும். 56.37 சதவீதம் இந்தியர்களுக்கு ஹிந்தி தாய் மொழியில்லை.

ஆகையால், அமைச்சரவைச் செயலகம், உள்துறைச் செயலகம் மற்றும் சட்டச் செயலகங்களுக்கு ஆங்கிலத்தில் பெயர் மாற்றம் செய்ய உத்தரவிடவும் அந்த மனுவில் குறிப்பிட்டுள்ளார்.மேலும், ஹிந்தி மற்றும் சமஸ்கிருதம் தெரியாத சட்டம் பயிலும் மாணவர்கள், சட்டப் பேராசிரியர்கள், வழக்கறிஞர்கள், சட்ட அலுவலர்கள், நீதித்துறை அலுவலர்கள் மற்றும் பணியாளர்கள் மற்றும் பொதுமக்களின் நலன் கருதித் தான் இந்த மனுவைத் தாக்கல் செய்ததாக ஆதித்யன் கூறுகிறார்.

இந்த மனு விரைவில் சென்னை உயர்நீதிமன்றத்தில் விசாரணைக்கு பட்டியலிடப்படுமென்று எதிர்பார்க்கப்படுகிறது.

இந்திய தண்டனைச் சட்டம், இந்திய சாட்சியங்கள் சட்டம் போன்ற குற்றவியல் சட்டங்கள் நீக்கப்பட்டு, பாரதிய நியாய சம்ஹிதா, பாரதிய நாகரிக சுரக்க்ஷா, பாரதிய சாக்ஷிய அதினியம் ஆகிய 3 புதிய குற்றவியல் சட்டங்கள் திங்கள்கிழமை முதல் அமலுக்கு வந்துள்ளது குறிப்பிடத்தக்கது. மேலும் இது குறித்து மனிதநேய மக்கள் கட்சியின் சட்டமன்ற உறுப்பினரான எம்.எச்.ஜவாஹிருல்லா புதிய குற்றவியல் நடைமுறைச் சட்ட மாற்றங்கள் குறித்து சட்டமன்றப் பேரவையில் பேசியதற்கு  முதலமைச்சர் மு.க.ஸ்டாலின்  பதிலளித்துள்ளார். நாடாளுமன்ற மாநிலங்களவை உறுப்பினரும், மூத்த வழக்கறிஞருமான பி.வில்சன் தலைமையில் தமிழ்நாடு வழக்கறிஞர்கள் சங்கத் தலைவர்  எஸ்.பிரபாகரன், தமிழ்நாடு மற்றும் புதுச்சேரி வழக்கறிஞர்கள் சங்கக் கூட்டமைப்பின் தலைவர். என்.மாரப்பன், பொருளாளர். கே.முரளிபாபு, செயலாளர். பி.கார்த்திகேயன், மண்டலச் செயலாளர்கள எஸ்.பாலமுருகன்,  டி.பழனிச்சாமி, கே.ரமேஷ், நாமக்கல் வழக்கறிஞர்கள் சங்கத் தலைவர்  ஆர்.அய்யாவு, வழக்கறிஞர்கள் கூட்டமைப்பின் துணைத்தலைவர்  எஸ்.கே.ஆடம், அம்பத்தூர் வழக்கறிஞர்கள் சங்கத் தலைவர் ஏ.லட்சுமி ராஜரத்தினம், விழுப்புரம் மாவட்ட குற்றவியல் வழக்கறிஞர்கள் சங்கத் தலைவர்  எம்.காளிதாஸ் ஆகியோர் முதலமைச்சரைச் சந்தித்து, மத்திய அரசின் மூன்று புதிய குற்றவியல் சட்டங்களை எதிர்த்து மத்திய உள்துறை அமைச்சருக்கு கடிதம் எழுதியமைக்காக நன்றி தெரிவித்தும், இந்தப் புதிய சட்டங்களை இரத்து செய்ய வேண்டுமென மத்திய அரசை வலியுறுத்துமாறும் கேட்டுக் கொண்டனர்.

புதிய 3 சட்டங்கள் சாதாரண மக்களுக்கு எந்த வகையில் எதிரானவை என்பது பற்றி ஓய்வு பெற்ற முன்னாள் நீதிபதி ஹரி பரந்தாமன் விளக்கங்கள் முன்வைத்துள்ளவர், “இந்தியாவில் நடைமுறையில் உள்ள நூற்றுக்கணக்கான சட்டங்கள் ஆங்கிலேயர்கள் ஆட்சியில் கொண்டுவரப்பட்டதுதான். எனவே சட்டத்தை மாற்றலாமா? என்றால் மாற்றலாம். அதில் எந்தத் தவறுமில்லை. ஆனால்,பாஜக அரசு மாற்றும் போது என்ன நடைமுறையைக் கடைப்பிடித்திருக்கிறார்கள் என்பதை நாம் முக்கியமாகப் பார்க்கக் கவனிக்க வேண்டும். அது மிகமிக முக்கியமானது. இதைக் கொண்டுவந்துள்ள முறை ஆட்சேபனைக்குரியது.இந்தச் சட்டம் நாடாளுமன்றத்தில் விவாதத்திற்குக் கொண்டு வரும்போது 143 எம்பிகளை இடைநீக்கம் செய்யப்பட்டிருந்தனர். அப்படி கேள்வி கேட்பதற்கு எதிர்க்கட்சிகளே இல்லாமல் இருந்த காலகட்டத்தைப் பயன்படுத்தி சட்டத்தை நிறைவேற்றியது ஆட்சேபனைக்குரியது.அதுவும் இது சாதாரண சட்டம் இல்லை. குற்றவியல் சட்டத்திருத்தம். அதை விவாதிக்க வேண்டாமா? அவையில் அதைப்பற்றி அலசி ஆராய வேண்டாமா? அப்படி எதையும் இந்த அரசு செய்யவே இல்லை. கிட்டத்தட்ட 80 சதவீதம் ஷரத்துகளை அப்படியே மீண்டும் பயன்படுத்தியுள்ளனர். மீதி உள்ள 20 சதவீத மாற்றம் என்ன மாதிரியானது? பொதுமக்களுக்கு ஆதரவான மாற்றமா? இல்லை. காவல்துறைக்குக் கட்டுக்கடங்காத அதிகாரத்தை இந்த மாற்றம் கொடுத்துள்ளது. இந்த 20 சதவீத மாற்றம் என்பது மிகப்பெரிய மாற்றமாக உள்ளது.

உதாரணமாக ஒன்று சொல்லி விளக்கலாம் என்று நினைக்கிறேன். காவல்துறை விசாரணையில் இருப்பவரைக் கேட்ட கேள்வி இல்லாமல் தண்டித்து அவரைக் கொலை செய்யும் போக்கு என்பது நம் நாட்டில் சர்வ சாதாரணமாக நடக்கிறது. லாக் அப் டெத் பற்றி பக்கம் பக்கமாகப் பேசலாம். சாத்தான்குளத்தில் மட்டும் இதைப் போன்று நடக்கவில்லை. தினந்தோறும் நடக்கிறது.காவல்துறை விசாரணையின் போது ஒருவர் இறந்துவிட்டால், முன்பு இருந்த சட்டப்படி மாவட்ட நீதிபதி வந்து விசாரணை செய்து ஒரு அறிக்கை தருவார். இதுதான் நடைமுறை. இப்போது அது தேவை இல்லை என்று சட்டத்தைத் திருத்தியுள்ளனர். ஒரு வட்டாட்சியர் அல்லது ஆர்.டி.ஓ அறிக்கை கொடுத்தால் போதும். நீதித்துறை சுதந்திரமான அமைப்பு. ஆனால், இந்த வட்டாட்சியரும் ஆர்.டி.ஓவும் அரசு நிர்வாகத்தின் ஒரு அங்கம். அவர்கள் அரசுக்கு எதிராக அறிக்கை தருவார்களா?

124 A இராஜத்துரோகக் குற்றச் சட்டம் என ஒன்றுள்ளது. இதை அப்படியே தான் இப்போது நீடித்திருக்கிறார்கள். அதை நீக்கவே இல்லை. அரசை விமர்சித்தால் அது குற்றம் என்பது வெள்ளைக்காரன் போட்ட சட்டம். அதை ஏன் ஜனநாயக நாட்டில் தொடர்ந்து வைத்திருக்க வேண்டும்? முதலில் ஐபிசி சட்டம் என இருந்ததை இப்போது பிஎன்எஸ் என பெயர் மாற்றி இருக்கிறார்கள். அவ்வளவுதான்.   புதிய 3 குற்றவியல் சட்டங்கள் மூலம் காவல்துறைக்குக் கட்டற்ற அதிகாரம் வழங்கப்பட்டுள்ளது என்றும், ஒருவரின் சொத்தையே முடக்கக் கூடிய அதிகாரம் வழங்கப்பட்டுள்ளது என்றும் ஆகவே இந்தச் சட்டங்கள் பாமர ஜனங்களுக்கு எதிரானது என்றும் முன்னாள் நீதிபதி ஹரி பரந்தாமன் கூறியிருக்கிறார்.

 புதிய குற்றவியல் சட்டங்களின் கீழ் முதலாவது வழக்கு, மத்தியப் பிரதேச மாநிலம் குவாலியரில் அதிகாலை 12.10 மணிக்குப் பதிவு செய்யப்பட்டுள்ளது என்றும் தெரிவித்துள்ளார். இந்தப் புதிய 3 குற்றவியல் சட்டங்களைப் பற்றி மறுபரீசினை செய்ய வேண்டும் என்று முன்பே முதலமைச்சர் மு.க.ஸ்டாலின், மத்திய அமைச்சர் அமித்ஷாவுக்குக் கடிதம் எழுதி இருந்தார்.

மத்திய அரசு சில மாதங்களுக்கு முன்பு இந்த பாரதிய சக்‌ஷயா சநிதா, பாரதிய நகாரிக் சுரக்‌ஷா சநிதா, பாரதிய நியாய சநிதா 2023 ஆகிய 3 புதிய சட்டங்களும் முதலில் யூனியன் பிரதேசமான சண்டிகரில் நடைமுறைக்கு வரும் என்றும் பிறகு படிப்படியாக நாடு முழுவதும் அமல் செய்யப்படும் என்று கூறியிருந்தது. ஆனால், அதற்கு மாறாக இப்போது உடனடியாக நாடு முழுவதும் அமல்படுத்தப்பட்டுள்ளது.

ஆகவே, அதற்கு நாடு முழுவதும் நீதித்துறை, சட்டத்துறை உள்ளிட்ட பல தரப்புகளிலிருந்து எதிர்ப்பு கிளம்பியுள்ளது.

தமிழ்நாடு முழுவதும் வழக்கறிஞர்கள் போராட்டம் நடத்துகின்றனர். மதுரை வழக்கறிஞர்கள் சங்கம் சார்பில் 200-க்கும் மேற்பட்ட வழக்கறிஞர்கள் கண்டனப் பேரணியை மாவட்ட நீதிமன்றத்திலிருந்து தல்லாகுளம் தபால் நிலையம் வரை  ஈடுபட்டனர். நாகையில் வழக்கறிஞர்கள் கருப்புச் சட்டை அணிந்து 3-வது நாளாக போராட்டம் நடத்துகின்றனர். புதுக்கோட்டை ஒருங்கிணைந்த நீதிமன்ற வளாகம் முன்பு வழக்கறிஞர்கள் ஒரு நாள் உண்ணாவிரதப் போராட்டத்தில் ஈடுபட்டனர்.