மறியலைத் தடுக்க முயன்ற பெண் காவல்துறை துணைக் கண்காணிப்பாளர் மீது நடந்த தாக்குதல் குறித்து விசாரணை

அனுமதி இல்லாமல் நடந்த மறியலைத் தடுக்க முயன்ற பெண் காவல்துறை துணைக் கண்காணிப்பாளர் மீது நடந்த தாக்குதல்

குறித்து அருப்புக்கோட்டையில் விருதுநகர் மாவட்டக் காவல்துறைக் கண்காணிப்பாளர் நேரில் விசாரணை விருதுநகர் மாவட்டம் அருப்புக்கோட்டையில் இன்று அனுமதி இல்லாமல் நடந்த சாலை மறியலைத் தடுக்க முயன்ற பெண் காவல்துறை துணைக் கண்காணிப்பாளரின்  தலை முடியை  இழுத்து சிலர் தாக்குதல் நடத்தியதால் அந்தச் சம்பவம் குறித்து மாவட்டக் காவல்துறைக் கண்காணிப்பாளரான கண்ணன் நேரடி விசாரணை நடத்தினார். கமுதி  வட்டம் பெருமாள் தேவன்பட்டியைச் சிறிய சரக்கு ஊர்தி ஓட்டுநர் காளிகுமார் (வயது 33). இவர், நேற்று  தாமிரபரணி கூட்டுக் குடிநீர் திட்டத்தின் குழாய் பதிப்பதற்கான உதிரி பாகங்களை ஏற்றிக்கொண்டு திருச்சுழி நோக்கி வந்துகொண்டிருந்த போது திருச்சுழி - இராமேஸ்வரம் சாலையில் கேத்தநாயக்கன்பட்டி விலக்கு அருகில் வந்த 2 மோட்டார் சைக்கிள்களில் வந்த மர்ம நபர்கள் ஐவர் சிறிய சரக்கூர்தியை நிறுத்தி காளிகுமாரை சரமாரியாக அரிவாளால் வெட்டிக் கொலை செய்தனர். அதையடுத்து காளிகுமாரின் உடல் பிரேத பரிசோதனைக்காக அருப்புக்கோட்டை அரசு மருத்துவமனையில் வைக்கப்பட்டது.

இந்தச் சம்பவம் காரணமாக காளீஸ்வரன், அருண்குமார், லட்சுமணன், பாலமுருகன், வீரசூரன், வேல்முருகன் ஆகிய ஆறு பேர் மீது திருச்சுழி காவல் நிலையத்தில் வழக்குப் பதிவு செய்தனர். அருப்புக்கோட்டை அரசு மருத்துவமனையில் காளிகுமாரின் உடல் செவ்வாய்க்கிழமை பிரேத பரிசோதனை செய்யப்படவுள்ள நிலையில், அவரது உறவினர்கள் ஏராளமானோர் அருப்புக்கோட்டை அரசு மருத்துவமனையில் இன்று காலை குவிந்தனர். கொலையாளிகளை உடனே கைது செய்யக்கோரி அவர்கள் அரசு மருத்துவமனை முன்பு சாலை மறியலில் ஈடுபட முயன்ற போது அவர்களை அருப்புக்கோட்டை காவல்துறை துணைக் கண்காணிப்பாளரான காயத்ரி தலைமையிலான காவலர்கள் தடுத்து நிறுத்தினர். அதனால் ஆத்திரமடைந்த சிலர் காவல்துறை துணைக் கண்காணிப்பாளர் காயத்ரியை கைவைத்துத் தள்ளியதுடன், அவரது தலை முடியையும் பிடித்து இழுத்துத் தாக்கினர். அதனால், காவல்துறையினரும் பதில் தாக்குதல் நடத்தியதால் மறியலில் ஈடுபட முயன்றவர்களும் காவல் துறையினரும் ஒருவரை ஒருவர் தாக்கிக் கொண்டனர். அதனால் அங்கு பதற்றமான சூழ்நிலை உருவானது. மேலும், போராட்டத்தில் ஈடுபட்டவர்கள் காவல்துறையினரைக் கண்டித்து திருச்சுழி சாலையில் அமர்ந்து சாலை மேலும் மறியல் போராட்டத்தில் ஈடுபட்டனர். தகவலறிந்த மாவட்டக் காவல்துறைக் கண்காணிப்பாளர் கண்ணன் சம்பவம் நிகழ்ந்த இடத்துக்கு வந்து நேரடி விசாரணை நடத்தினார்.

காவல்துறை துணைக் கண்காணிப்பாளர் தாக்கப்பட்டது தொடர்பாக குமார், பொன்குமார் உள்ளிட்ட நான்கு பேரை பிடித்து தீவிர விசாரணை நடத்தினர். பின்னர், காவல்துறை துணைக் கண்காணிப்பாளர் காயத்ரி மீது தாக்குதல் நடத்திய இராமநாதபுரம் அருகிலுள்ள நெல்லிக்குளத்தைச் சேர்ந்த பாலமுருகன் (வயது 43) என்பவரைக் கைது செய்தனர். மேலும், சிறிய சரக்கு ஊர்தி ஓட்டுநர் காளிகுமார் கொலை வழக்கில் காளீஸ்வரன், அருண்குமார், லட்சுமணன், பாலமுருகன் ஆகியோரையும் இன்று கைது செய்தனர். தலைமறைவாக உள்ள வீரசூரன், வேல்முருகன் ஆகிய இருவரையும் காவல்துறையினர் தேடி வருகின்றனர்.