சென்னையில் நிலமோசடி செய்யும் திருட்டு அடாவடிக் குழுவினருடன் தொடர்பு வைத்துக் கொண்டு நில மோசடி அபகரிப்பு அக்கிரமப் பிரவேஷம் செய்ய முயன்றவர்களுக்குச், சாதகமாக
கூலிக்கு லஞ்சமாகப் பணம் பெற்றுக் கொண்டு செயல்பட்ட அரசு பணியை நேர்மையாகச் செய்யாத குற்றச்சாட்டில் சிக்கியுள்ள காவல்துறை ஆய்வாளர் ஆனந்த்பாபு வீடு உள்ளிட்ட அவருக்குச் சொந்தமான நான்கு இடங்களில், சி.பி.ஐ., உயர் அலுவலர்கள் சோதனை நடத்தினார்கள் சென்னை சோழிங்கநல்லுார் பகுதியில் வசிக்கும் கார்த்திக். என்பவருக்கு, அதே பகுதியில், 18.25 சென்ட் நிலம் இருந்துள்ளது. அதை, அதே பகுதியைச் சேர்ந்த கோபாலகிருஷ்ணன், சரவணன், தேவன், சீனிவாசன் உள்ளிட்டோர், போலியான ஆவணங்கள் உற்பத்தி செய்து அபகரிக்க முயற்சி செய்துள்ளனர்.
அது குறித்து, ஆலந்துார் நீதிமன்றத்திலும், சென்னை மத்தியக் குற்றப்பிரிவு காவல்துறையிலும் தற்போது வழக்கு விசாரணை நிலுவையில் உள்ளது. பிரச்னைக்குரிய இடத்திற்கு பட்டா வழங்கக் கூடாது என அரசு சுற்றறிக்கை உள்ளதால், கார்த்திக், நீலாங்கரை சார் பதிவாளர் அலுவலகம், சோழிங்கநல்லுார் வருவாய் வட்டாட்சியர் அலுவலகத்திலும் புகார் கொடுத்துள்ளார்.
இந்த நிலையில், மே மாதம் 14 ஆம் தேதியில், கோபாலகிருஷ்ணன் உள்ளிட்டோர் பிரச்னைக்குரிய அந்த இடத்திற்குச் சென்றுள்ளனர். அவர்களுடன், 20 உள்ளூர் கூலிப்படை ரௌடிகள் உடன் சென்றிருந்ததாகவும் தெரிகிறது. அவர்கள் சுற்றுச்சுவரை இடித்துள்ளனர். அவர்களுடன் கூட்டு சேர்ந்து, நீலாங்கரை காவல் ஆய்வாளாராக இருந்த ஆனந்த்பாபு, சினிமா வில்லன் போல செயல்பட்டு பத்து அரசு பணி செய்து வரும் காவலர்களுடன் சென்று பாதுகாப்பு அளித்தாகவும் தெரிகிறது. நில அபகரிப்பை தடுக்க முயன்ற கார்த்திக் மற்றும் அவரது பெற்றோரை அவர் ஆபாசமாக வார்த்தைகளில் திட்டியதுடன், 'இந்த இடத்தை விட்டு ஓடிவிடுங்கள். பிரச்சனைகள் செய்தால் உங்கள் மீது வழக்குப்பதிவு செய்வேன்' என, மிரட்டியதாகவும் கூறப்படுகிறது.
அது குறித்து, சென்னை சி.பி.ஐ., அலுவலகத்தில், கார்த்திக் புகார் அளித்துள்ளார். சென்னை உயர் நீதிமன்றத்திலும் வழக்கு தொடர்ந்துள்ளார். அதை விசாரித்த நீதிமன்றம், காவல்துறை ஆய்வாளர் ஆனந்த் பாபு உள்ளிட்டோர் மீது வழக்குப்பதிவு செய்து விசாரிக்க உத்தரவிட்டது.
அதையடுத்து, காவல்துறை உதவி ஆணையர் தலைமையிலான சி.பி.ஐ., அதிகாரிகள், ஆனந்த்பாபு, கோபாலகிருஷ்ணன் உட்பட, ஆறு பேர் மீது வழக்கு பதிவும் செய்துள்ளனர். அதன் அடிப்படையில், சென்னை அண்ணா நகர் காவலர் குடியிருப்பில் உள்ள, ஆனந்த் பாபுவின் வீடு மற்றும் இந்த நில அபகரிப்புக்கு உடந்தையாக இருந்த, பெசன்ட் நகரில் உள்ள ஒரு பெண் வங்கி அலுவலரின் வீடு உள்ளிட்ட, நான்கு இடங்களில் நேற்று தீவிரமாக சோதனையில் ஈடுபட்டனர். காவல் ஆய்வாளர் ஆனந்த் பாபு தற்போது நுங்கம்பாக்கம் காவல் நிலையத்தில், சட்டம் ஒழுங்கு ஆய்வாளராகப் பணிபுரிந்து வருகிறார். வழக்கை விசாரித்த நீதிபதி, நிலம் கார்த்திக்குச் சொந்தமானது என்பதற்கான அனைத்து ஆதாரங்களும் முகந்திரமும் இருப்பது தெரிந்தும் கண்களை மூடிக்கொண்டு லஞ்சப் பணத்திற்காக நிலத்தை அபகரிக்க காவல்துறையினர் உதவியுள்ளனர், அதற்கு அரசு பணியை பயன்படுத்தி நில உரிமையாளர்களை மிரட்டியுள்ளனர் என கண்டித்ததோடு, சிபிஐ இந்த வழக்கை விசாரித்து நான்கு மாத காலத்திற்குள் அணைத்து குற்றவாளிகள் மீது செய்த குற்றம் குறித்து அறிக்கை தாக்கல் செய்ய வேண்டும் என உத்தரவிட்ட பின்னர் வழக்கு பதிவு செய்து சிபிஐ அண்ணாநகர் காவலர் குடியிருப்பில் உள்ள காவல் ஆய்வாளர் ஆனந்த் பாபு வீட்டில் காலை 7:30 மணி முதல் ஆறு பேர் கொண்ட சிபிஐ உயர் அலுவலர்கள் குழு அவரது வீட்டில் சோதனை நடத்தினர். அதே போல், இந்த வழக்கு தொடர்பாக சென்னை அடையார் சாஸ்திரி நகர், பெசன்ட்நகர் அடுக்குமாடிக் குடியிருப்பில் பாரத ஸ்டேட் வங்கிப் பெண் அலுவலர் ஹரிணி என்பவர் வீட்டில் சோதனை நடத்தி, அவரிடமும் முழு விசாரணை நடத்தப்பட்டுள்ளது. மேலும், இந்த வழக்கு தொடர்பாக சோழிங்கநல்லூர் தமிழ்நாடு வாழ்விட மேம்பாட்டு வாரியக் குடியிருப்பில் உள்ள வீடு மற்றும் வேளச்சேரி நேரு நகர் பகுதியில் உள்ள வீடு ஆகிய ஐந்து இடங்களில் சிபிஐ சோதனை நடைபெற்றது. ஐந்து மணி நேர சோதனை முடிவில் காவல் ஆய்வாளர் ஆனந்த் பாபு வீட்டில் இருந்து தங்கம்,வெள்ளி ஆபரணங்கள், சொத்து ஆவணங்கள் பறிமுதல் செய்யப்பட்டுள்ளன. அவை அனைத்தும் நுங்கம்பாக்கத்திலுள்ள சிபிஐ அலுவலகத்திற்கு எடுத்துச்செல்லப்பட்டு மதிப்பீடு செய்யும் பணி நடைபெறுகிறது என சிபிஐ உயர் அலுவலர்கள் தெரிவித்துள்ளனர்.அவரது வீட்டில் நடைபெற்ற சோதனை முடிவில் அதிகமாக பணம் நகைகள் ஆவணங்கள் மற்றும் அவர் செய்த இதர மோசடிகள் குறித்து விபரங்கள் சிக்கியதாகத் தெரிகிறது விசாரணை முடிவில் மற்ற விபரங்கள் தெரியவரும்.
கருத்துகள்