தமிழக வருவாய்த்துறை அமைச்சர் ஆர்.பி. உதயகுமார் ஐடி நிறுவன நிர்வாகிகளுடன் ஆலோசனை

கோவிட் 19 காலகட்டத்தில் முதல்வர் உள்பட எங்களை போன்றவர்கள் மக்கள் பணியாற்றி வரும் நிலையில், எதிர்கட்சி தலைவர் அறிக்கை மட்டும் விட்டுவிட்டு எந்த சேவையும் செய்வது இல்லை என அமைச்சர் ஆர்.பி.உதயகுமார் குற்றம்சாட்டியுள்ளார் சென்னை சிங்காரவேலர் மாளிகையில் உள்ள தமிழ்நாடு மின்ஆளுமை முகமை அலுவலகத்தில் சென்னனை மற்றும் அதனைச் சுற்றியுள்ள பகுதிகளில் இயங்குகின்ற ஐடி நிறுவன நிர்வாகிகளுடன் தகவல் தொழில்நுட்பத் துறை அமைச்சர் ஆர் பி உதயகுமார் ஆலோசனைமேற்கொண்டார் . காணொலி காட்சி மூலம் நடைபெறும் இந்த ஆலோசனை கூட்டத்தில் ஐடி நிறுவனங்கள் எவ்வாறு செயல்பட வேண்டும்? அரசின் விதிமுறைகளை எப்படி கடைபிடிக்க வேண்டும் உள்ளிட்டவற்றை அமைச்சர் வலியுறுத்தினார். மேலும் ஐடி நிறுவனங்களின் கோரிக்கைகளையும் கேட்டறிந்தார்.இந்த ஆலோசனை கூட்டத்திற்கு பிறகு நிருபர்களுக்கு அமைச்சர் ஆர்.பி.உதயகுமார் அளித்த பேட்டியில் கூறியதாவது: கொரோனா தொற்றின் காரணமாக 6வதுமுறையாக ஜூலை 31-ம் தேதி வரை ஊரடங்குஉத்தரவு நீட்டிக்கப்பட்டுள்ளது. இந்த காலக்கட்டத்தில் ஐடி நிறுவனங்கள் செயல்படுவதற்கான வழிமுறைகள், விதிகளை அரசு வகுத்துள்ளது. ஊரடங்கு நீட்டிப்பு செய்யப்படுகிற நேரங்களில் எல்லாம் ஐடி நிறுவனங்களுடன் தொடர்ந்து அரசு ஆலோசனை நடத்துகிறது. அதன்அடிப்படையில் ஐடி நிறுவனங்களுடன் நாஸ்காம் உதவியுடன் காணொலி காட்சி மூலம் ஆலோசனை நடத்தினேன். இந்த ஆய்வின் போது சில கோரிக்கைகளை நிறுவனங்கள் சார்பில் வைக்கப்பட்டுள்ளது. மேலும் வீட்டிலிருந்த படியே பணியாற்ற நிறுவனங்களுக்கு அறிவுரைகள்வழங்கப்பட்டது. அரசு முழுஒத்துழைப்பு அளிக்கும் வகையில் வீடுகளிலிருந்து ஐடி நிறுவன ஊழியர்கள் திறம்பட பணியாற்றி வியாபார தொடர்புகளை தடையின்றி செய்து வருகின்றனர். சென்னை உள்ளிட்ட 4 மாவட்டங்களில் 50 சதவீத ஊழியர்களுடனும், பிற மாவட்டங்களில் 100 சதவீத ஊழியர்களுடனும் வரும் 6-ம் தேதி முதல் செயல்பட தளர்வுகளை முதல்வர் அறிவித்துள்ளார். அப்படி பணியாற்றும் போது சமூக இடைவெளியை பின்பற்றுவது, முககவசம் அணிவது, கிருமிநாசினி தொளிப்பது உள்ளிட்ட பல்வேறு அறிவுரைகள் ஐடி நிறுவனங்களுக்கு இந்த ஆய்வின் போது அறிவுறுத்தப்பட்டுள்ளது. இவ்வாறு அமைச்சர் ஆர்.பி.உதயகுமார் கூறினார். இதை தொடர்ந்து நிருபர்கள் கேட்ட கேள்விக்கு அமைச்சர் ஆர்.பி.உதயகுமார் பதிலளித்து பேசுகையில்: முதல்வர் உட்பட நாங்கள் சேவை மனபான்மையுடன் உயிரை பணயம் வைத்து பணியாற்றி வருகிறோம். அதே மூத்த அரசியல்வாதியான ஐ.பெரியசாமி மற்றும் எதிர்கட்சி தலைவர் எவ்வாறு மக்கள் பணியாற்றி வருகிறார்கள் என்பது அனைவருக்கும் தெரியும். தற்போதைய காலகட்டத்தில் வைரஸ் தொற்று ஏற்பட்டு விடும் எனும் அச்சம் அனைவருக்கும் உள்ளது. இருந்தபோதிலும் மருத்துவர்கள், செவிலியர்கள், காவலர்கள் உள்பட பொதுவாழ்க்கையில் ஈடுபட்டுள்ள என்னை போன்றவர்கள் அச்சுறுத்தல் இருந்தபோதிலும் மக்களை உயிரை காக்க வேண்டும் என்ற அடிப்படையில் முதல்வரின் ஆணைக்கிணங்க செயல்பட்டு வருகிறோம். ஆனால் எதிர்கட்சி தலைவர் உட்பட அவரது கட்சியை சார்ந்தவர்கள் வீட்டிற்குள்ளேயை அமர்ந்து கொண்டு அறிக்கை மேல் அறிக்கை மட்டும் விட்டு கொண்டு அரசியல் செய்து வருகின்றனர். இந்த காலகட்டத்தில் நான் எத்தனை பணிகளில் நேரடியாக மேற்கொண்டு வருகிறேன். முதல்வர் எத்தனை பணிகளை நேரடியாக சென்று செய்து வருகிறார். அதே போன்று எதிர்கட்சி தலைவரே அல்லது அவரது கட்சியை சார்ந்தவர்களே எத்தனை களப்பணியாற்றியிருக்கிறார் என்பது எல்லாம் மக்களுக்கு நன்றாக தெரியும். எதிர்கட்சி தலைவரை பொறுத்தவரை இந்த இக்கட்டண சூழ்நிலையை அரசியலுக்காக பயன்படுத்தி கொண்டு அறிக்கை மேல் அறிக்கை மட்டும் தான் விட்டு வருகிறார். 10 அறிக்கை எதிர்கட்சி தலைவர் தனது பெயரிலும், சில அறிக்கைகளை தங்களது கட்சியின்மூத்த தலைவர்கள் பெயரிலும் வெளியிடுகிறார். கோவிட் 19 காலக்கட்டத்தில் எங்களை போன்றவர்கள் மக்கள் சேவை செய்து வரும் வேளையில், எதிர்கட்சி தலைவர் அறிக்கையை மட்டும் விட்டு விட்டு எந்த வேலையும் செய்வது கிடையாது. 2015-ம் ஆண்டு பெருவெள்ளம் போன்று இனிவரும் நாட்களில் அதிக மழை பெய்யும் என ஐஐடி தெரிவித்துள்ளது. வடகிழக்கு பருவமழை காலங்களான நவம்பர், செப்டம்பர், டிசம்பர் ஆகிய காலகட்டங்களில் மேற்கொள்ள வேண்டிய பணிகள் குறித்து பேரிடர் மேலாண்மை துறை அதிகாரி மாவட்ட நிர்வாகளுக்கு அறிவுறுத்தியுள்ளார். அதன்அடிப்படையில் பாதிக்கப்பட்டக்கூடிய பகுதிகளை கண்டறிந்து முன்னெச்சரிக்கைநடவடிக்கைகளை மேற்கொள்ள மாவட்ட நிர்வாகளுக்கு அறிவுறுத்தப்பட்டுள்ளது. பேரிடர் காலத்திற்கு முன், பேரிடர் காலம், அதற்கு பின் என 3 பிரிவாக பிரித்து இந்த காலங்களில் மேற்கொள்ள வேண்டிய பணிகள் குறித்து 32 வருவாய் மாவட்ட நிர்வாகத்திற்கு, குறிப்பாக கடலோர மாவட்ட நிர்வாகத்திற்கு அறிவுரை வழங்கப்பட்டுள்ளது. இதற்கு முன்பாக கஜாபுயல், வர்தா புயல் ஆகிய நேரங்களில் தமிழக அரசு முன்கூட்டியே மேற்கொண்ட நடவடிக்கையின் காரணமாக தான் ஒரு உயிரிழப்புக்கூட ஏற்படவில்லை,அதே போன்று மழைகாலத்திற்கு முன்பாக அனைத்து நடவடிக்கைகளும் பேரிடர் மேலாண்மை துறை மூலம் மேற்கொள்ளப்பட்டுவருகிறது. இவ்வாறு அமைச்சர் ஆர்.பி.உதயகுமார் பதிலளித்தார்.