சென்னை உயர் நீதிமன்ற வளாகத்தில் தற்கொலை செய்தவர் பழங்குடியினரில்லை: தமிழக அரசு தரப்பில் தகவல்

சென்னை உயர் நீதிமன்ற வளாகத்தில் தற்கொலை செய்தவர் பழங்குடியினரில்லை: தமிழக அரசு தகவல்.       

  உயர் நீதிமன்ற வளாகத்தில் தீக்குளித்து தற்கொலை செய்து கொண்ட வேல்முருகன் பழங்குடி வகுப்பைச் சேர்ந்தவரல்ல என தமிழக அரசு சென்னை உயர் நீதிமன்றத்தில் தகவல்.தீ வைத்து இறந்த நபர் காஞ்சிபுரம் மாவட்டம் படப்பை அருகிலுள்ள சேர்மாதூர் பகுதியைச் சேர்ந்த வேல்முருகன் தான் மலைக்குறவர் சமூகத்தைச் சேர்ந்தவர், தனக்கு ஜாதிச் சான்றிதழ் வழங்குமாறு பலமுறை அரசு அலுவலகங்களில் கேட்டுள்ள நிலையில், தனக்கு ஜாதிச் சான்றிதழ் வேண்டுமென சென்னை உயர் நீதிமன்ற வளாகத்தில் உள்ள சட்ட உதவி மையத்திற்கு வந்த பின் உடலில் மண்ணெண்ணெய் ஊற்றி தீ வைத்துக் கொண்டது தெரியவந்தது.

தற்கொலை செய்த வேல்முருகன் 95 சதவீதக் தீக்காயங்களுடன் கீழ்ப்பாக்கம் அரசு மருத்துவமனை தீக்காயத் தடுப்பு பிரிவில் அனுமதிக்கப்பட்டு தீவிர சிகிச்சை பெற்று வந்த நிலையில்  சிகிச்சை பலனின்றி  உயிரிழந்தார்.

இந்த நிலையில் சென்னை உயர் நீதிமன்றத்தில் நீதிபதி எஸ்.எம். சுப்பிரமணியன் முன் ஆஜரான வழக்கறிஞர் சூர்யாபிரகாசம், இச் சம்பவத்தைக் குறிப்பிட்டு இது குறித்து உயர் நீதிமன்றம் தாமாக முன்வந்து வழக்காக எடுத்து விசாரிக்க வேண்டும் எனக் கேட்டுக்கொண்டதையடுத்து நீதிபதி, உயர் நீதிமன்ற பதிவாளரை அழைத்து சம்பவம் குறித்துக் கேட்டறிந்தார். பின்னர் இந்த சம்பவத்தை தாமாக முன் வந்து வழக்காக விசாரணைக்கு எடுத்துக் கொள்வதாகவும், தலைமை நீதிபதிக்கு அனுப்ப உள்ளதாகவும் தெரிவித்தார்.

பழங்குடியினரில் ஜாதிச் சான்றிதழ் கேட்டு விண்ணப்பித்தும் அதை வழங்காமல்  அலைக்கழித்ததாக குற்றம் சாட்டி சென்னை உயர்நீதிமன்ற வளாகத்தில் உள்ள இலவச சட்ட உதவி மையத்தின் அருகில் காஞ்சிபுரம் மாவட்டம் படப்பையைச் சேர்ந்த வேல்முருகன் இரு நாட்களுக்கு முன் தீக்களித்து தற்கொலை செய்து கொண்டது தொடர்பாக சென்னை உயர் நீதிமன்றம் தாமாக முன்வந்து வழக்கை விசாரணைக்கு எடுத்துக் கொண்டது.

சென்னை உயர் நீதிமன்ற பொறுப்புத் தலைமை நீதிபதி டி.ராஜா மற்றும் நீதிபதி கிருஷ்ணகுமார் அடங்கிய அமர்வில் இந்த வழக்கு விசாரணைக்கு வந்த போது காஞ்சிபுரம் மாவட்ட ஆட்சித் தலைவர் தரப்பில்  அறிக்கை தாக்கல் செய்யப்பட்டதில் "தீக்குளித்து மரணமடைந்த  வேல்முருகன் பட்டியலினத்தைச் சேர்ந்தவர் என்றும் பழங்குடியினர் ஜாதிச் சான்றிதழ்  கேட்டு செப்டம்பர் மாதம் 20-ஆம் தேதியில் அவர் அளித்த விண்ணப்பத்தின் அடிப்படையில் செப்டம்பர் மாதம் 23-ஆம் தேதி கள ஆய்வு மேற்கொள்ளப்பட்டதில். அவர் பழங்குடியின வகுப்பைச் சேர்ந்தவரில்லை என்பதால், அவரது விண்ணப்பம்  செப்டம்பர் மாதம் 26-ஆம் தேதி நிராகரிக்கப்பட்டது. அவர் தன்னுடைய சகோதரர் எனக்கூறி, பழங்குடியினர் இனத்தைச் சேர்ந்த இளவரசன் என்பவரின் சான்றிதழை இணைத்து தாக்கல் செய்திருக்கிறார். ஆனால், உண்மையில் இளவரசனுக்கும், வேல் முருகனுக்கும் எந்தவிதமான  சம்பந்தமுமில்லை.

அதையடுத்து, கள ஆய்வின்போது அவரது பக்கத்து வீட்டில் வசிப்பவர்வகள், அவர் வசிக்கும் தெருவில் வசிப்பவர்களிடம் விசாரணை நடத்தப்பட்டதா? என்பது குறித்து மாவட்ட ஆட்சியரின் அறிக்கையில் எந்த தகவலும் இடம்பெறவில்லை எனக் கூறிய நீதிபதிகள், வேல்முருகன் பழங்குடியின வகுப்பைச் சேர்ந்தவரா? என்பது குறித்து, மாவட்ட வருவாய் அதிகாரியை நியமித்து விசாரிக்கும்படி மாவட்ட ஆட்சியருக்கு உத்தரவிட்டனர்.

மாவட்ட வருவாய் அதிகாரி, அப்பகுதி கிராம நிர்வாக அலுவலர், பக்கத்து  வீட்டார்கள், வேல்முருகனின் குழந்தைகள் படிக்கும் பள்ளிகளிலும்  விசாரணை நடத்த வேண்டும். சகோதரர் எனக்கூறிய இளவரசனிடமும் விசாரணை நடத்தி இரண்டு வாரங்களில் அறிக்கை தாக்கல் செய்ய வேண்டும் என உத்தரவிட்ட நீதிபதிகள், விசாரணையை தள்ளிவைத்தனர்.