காசி தமிழ் சங்கமம் 4.0, மத்திய கல்வி அமைச்சகம் டிசம்பர் 2 முதல் நடத்தவுள்ளது
காசி தமிழ் சங்கமம் தமிழ்நாடு மற்றும் காசி இடையேயான நாகரிக பிணைப்புகளைக் கொண்டாடும்
தமிழ்நாட்டிதிற்கும் காசிக்கும் இடையிலான ஆழமான நாகரிக தொடர்புகளைக் கொண்டாடுவதற்காக காசி தமிழ் சங்கமத்தின் நான்காவது பதிப்பை டிசம்பர் 2 முதல், மத்திய கல்வி அமைச்சகம் ஏற்பாடு செய்கிறது. பிரதமர் திரு நரேந்திர மோடியின் தொலைநோக்குப் பார்வையால் ஈர்க்கப்பட்ட இந்த முயற்சி, இரு பகுதிகளுக்கும் இடையிலான நாகரிகம், கலாச்சாரம், மொழியியல் மற்றும் மக்களிடையேயான தொடர்புகளை தொடர்ந்து அதிகரிக்கிறது, இது ஒரே பாரதம் உன்னத பாரதம் என்ற உணர்வைப் பிரதிபலிக்கிறது.
இந்த நிகழ்ச்சித் திட்டத்தை ஐஐடி மெட்ராஸ் மற்றும் வாரணாசியில் உள்ள பனாரஸ் இந்து பல்கலைக் கழகம் ஆகியவை ஒருங்கிணைக்கின்றன, மேலும் கலாச்சார அமைச்சகம், தகவல் மற்றும் ஒலிபரப்பு அமைச்சகம், சுற்றுலா அமைச்சகம், ஜவுளி அமைச்சகம், உணவு பதப்படுத்தும் தொழில்கள் அமைச்சகம், குறு, சிறு மற்றும் நடுத்தர நிறுவனங்கள் அமைச்சகம், திறன் மேம்பாடு மற்றும் தொழில்முனைவோர் அமைச்சகம், இந்திய ரயில்வே கேட்டரிங் மற்றும் சுற்றுலா கழகம், உத்தரப்பிரதேச அரசு ஆகியவை இந்நிகழ்வை ஒருங்கிணைக்கின்றன.
2022-ல் தொடங்கப்பட்டதிலிருந்து, காசி தமிழ் சங்கமம் பொதுமக்களின் மிகப்பெரிய பங்களிப்பைக் கண்டுள்ளது. இந்தியாவின் இரண்டு பழமையான கலாச்சார மரபுகளை மீண்டும் இணைக்கும் ஒரு மைல்கல் பாலமாக இது உருவெடுத்துள்ளது. காசி தமிழ் சங்கமத்தின் முந்தைய மூன்று பதிப்புகளின் வெற்றியைக் கட்டியெழுப்ப, 4-வது பதிப்பு மேம்பட்ட கற்றல் பரிமாற்றங்கள், கலாச்சார ஈடுபாடு, கல்வி தொடர்புகள் மற்றும் அதிக இளைஞர் பங்கேற்பு மூலம் ஈடுபாட்டை மேலும் ஆழப்படுத்துவதை நோக்கமாகக் கொண்டுள்ளது.
2025-ம் ஆண்டிற்கான கருப்பொருள்: “தமிழ் கற்கலாம்”
“தமிழ் கற்கலாம்” என்ற கருப்பொருளைச் சுற்றி ஏற்பாடு செய்யப்படும் நான்காவது பதிப்பு இந்தியா முழுவதும் தமிழ்க் கற்றலை ஊக்குவிப்பதுடன், இந்தியாவின் பாரம்பரிய மொழியியல் மற்றும் இலக்கிய பாரம்பரியத்திற்கான பரந்த அளவிலான பாராட்டை வளர்ப்பதையும் நோக்கமாகக் கொண்டுள்ளது.
இந்தப் பதிப்பில், தமிழ்நாட்டிலிருந்து 1,400-க்கும் மேற்பட்ட பிரதிநிதிகள் பின்வரும் ஏழு பிரிவுகளின் கீழ் பங்கேற்பார்கள்:
1. மாணவர்கள்
2. ஆசிரியர்கள்
3. எழுத்தாளர்கள் & ஊடக வல்லுநர்கள்
4. விவசாயம் & அதனுடன் தொடர்புடைய துறைகள்
5. தொழில் வல்லுநர்கள் & கைவினைஞர்கள்
6. பெண்கள்
7. ஆன்மீக அறிஞர்கள் மற்றும் பயிற்சியாளர்கள்
பிரதிநிதிகள் வாரணாசி, பிரயாக்ராஜ் மற்றும் அயோத்திக்கு வருகை தருவது, கலந்துரையாடல்கள், கருத்தரங்குகள், கலாச்சார நிகழ்ச்சிகள் மற்றும் உள்ளூர் உணவு வகைகள், கைவினைப்பொருட்கள் மற்றும் பாரம்பரியம் பற்றிய வெளிப்பாடு உள்ளிட்ட 8 நாள் அனுபவ சுற்றுப்பயணத்தை மேற்கொள்வார்கள்.
மகாகவி சுப்பிரமணிய பாரதியாரின் மூதாதையர் இல்லம், கேதார் காட், "லிட்டில் தமிழ்நாடு" பகுதியில் உள்ள காசி மடம், ஸ்ரீ காசி விஸ்வநாதர் கோயில் மற்றும் மாதா அன்னபூர்ணா கோயில் உள்ளிட்ட வாரணாசியில் உள்ள குறிப்பிடத்தக்க தமிழ் பாரம்பரிய இடங்களுக்கு பிரதிநிதிகள் அழைத்துச் செல்லப்படுவார்கள். கல்வி மற்றும் இலக்கிய தொடர்புக்காக பனாரஸ் இந்து பல்கலைக்கழகத்தில் உள்ள தமிழ்த் துறையையும் அவர்கள் பார்வையிடுவார்கள்.
காசி தமிழ் சங்கமம் 4.0-ன் கீழ் மேற்கொள்ளப்படும் முக்கிய முயற்சிகள்
1. தென்காசியில் இருந்து காசிக்கு அகத்திய முனிவர் வாகனப் பயணம்
தமிழ்நாடு மற்றும் காசிக்கு இடையிலான பண்டைய கலாச்சார வழிகளைக் கண்டறியும் "அகத்திய முனிவர் வாகனப் பயணம்" டிசம்பர் 2 அன்று தென்காசியில் துவங்கி, டிசம்பர் 10 அன்று காசியில் முடிவடைகிறது. இந்தப் பயணம் பாண்டிய மன்னர் ஸ்ரீ அதிவீர பராக்கிரம பாண்டியனின் முயற்சிகளைக் குறிக்கிறது. அவர் தமிழ்நாட்டிலிருந்து காசிக்கு தனது பயணத்தின் மூலம் பாரத கலாச்சாரத்தில் ஒற்றுமையின் செய்தியைப் பரப்பினார். மேலும் சிவபெருமானுக்கு அர்ப்பணிக்கப்பட்ட ஒரு கோவிலைக் கட்டினார். ஒற்றுமையின் உணர்வை அடிக்கோடிட்டுக் காட்ட நகரத்திற்கு தென்காசி (தட்சிண காசி) என்று பெயரிட்டார்.
இந்தப் பயணம் சேர, சோழ, பாண்டிய, பல்லவ, சாளுக்கிய மற்றும் விஜயநகர காலங்களின் நாகரிக தொடர்புகளை எடுத்துக்காட்டும் அதே வேளையில், பாரம்பரிய தமிழ் இலக்கியம், சித்த மருத்துவம் மற்றும் பகிரப்பட்ட பாரம்பரியம் பற்றிய விழிப்புணர்வை ஊக்குவிக்கும்.
2. உத்தரப் பிரதேசத்தின் வாரணாசியில் உள்ள பள்ளிகளில் தமிழ் கற்பித்தல்
“தமிழ் கற்கலாம்” என்ற பிரச்சாரத்தின் கீழ், காசியில் உள்ள பள்ளி மாணவர்களுக்கு இந்தி தெரிந்த 50 தமிழ் ஆசிரியர்கள் தமிழ் கற்பிப்பார்கள்.
3. உத்தரப் பிரதேச மாணவர்களுக்கான தமிழ் கற்றல் படிப்புச் சுற்றுலாக்கள்
காசியைச் சேர்ந்த மொத்தம் 300 கல்லூரி மாணவர்கள் 15 நாள் தமிழ் கற்றல் திட்டத்திற்காக தமிழ்நாட்டில் உள்ள முக்கிய நிறுவனங்களுக்குச் செல்வார்கள். சென்னையில் உள்ள செம்மொழி தமிழாய்வு மையம் நோக்குநிலை மற்றும் கற்றல் பொருட்களை வழங்கும், அதே நேரத்தில் நடத்தும் நிறுவனங்கள் தமிழ்நாட்டின் பாரம்பரியம், மரபுகள் மற்றும் காசியுடனான வரலாற்று உறவுகளை எடுத்துக்காட்டும் கல்வி மற்றும் கலாச்சார சுற்றுப்பயணங்களை ஏற்பாடு செய்யும். இந்த மாணவர்கள் சென்னையில் அன்புடன் வரவேற்கப்படுவார்கள்.
கலாச்சார பரிமாற்றம், மொழியியல் செறிவூட்டல் மற்றும் அறிவுப் பகிர்வு மூலம் தேசிய ஒற்றுமையை வலுப்படுத்துவதற்கான இந்திய அரசின் உறுதிப்பாட்டை காசி தமிழ் சங்கமம் 4.0 மீண்டும் உறுதிப்படுத்துகிறது. பல்வேறு சமூகங்களை ஒன்றிணைப்பதன் மூலம், இந்தத் திட்டம் இந்தியாவின் நாகரிக தொடர்ச்சி மற்றும் கலாச்சார ஒற்றுமையின் உயிருள்ள சாரத்தை உள்ளடக்கியது.
பதிவுகளுக்கு:
காசி தமிழ் சங்கமம் 4.0 க்காக இரண்டு பிரத்யேக பதிவு இணையதளங்கள் தொடங்கப்பட்டுள்ளன.
மற்ற அனைத்துப் பிரிவுகளிலும் பங்கேற்பதற்காக, https://kashitamil.iitm.ac.in/ என்ற தளம் மற்ற அனைத்துப் பதிவுகளுக்கும் திறந்திருக்கும். பதிவுச் சாளரம் நவம்பர் 21 அன்று இரவு 8:00 மணிக்கு மூடப்படும், மேலும் தேர்வு வினாடி வினா நவம்பர் 23 அன்று காலை 10:00 மணி முதல் மாலை 5:00 மணி வரை நடத்தப்படும்.
இரண்டாவது தளம் https://kashitamil.bhu.edu.in/, டிசம்பர் மூன்றாவது வாரத்தில் 15 நாள் கல்விப் பயிற்சிக்காக தமிழ்நாட்டிற்கு வருகை தரும் 300 மாணவர்களைத் தேர்ந்தெடுப்பதற்கானது.
கருத்துகள்