நாட்டின் மொத்த உள்நாட்டு உற்பத்தியில் சுமார் 30 சதவிகித பங்களிப்பை மத்திய அரசின் சிறு குறு நடுத்தர தொழில் துறை - மத்திய இணையமைச்சர் திரு பானு பிரதாப்சிங் வர்மா
நாட்டின் மொத்த உள்நாட்டு உற்பத்தியில் சுமார் 30 சதவிகித பங்களிப்பை மத்திய அரசின் சிறு குறு நடுத்தர தொழில் துறை வழங்குவதாகவும் மேலும் அதன் முன்னேற்றத்தை உறுதி செய்வதற்காக 11 கோடிக்கும் அதிகமான மக்கள் இந்த துறையில் பணி புரிகிறார்கள் என்றும், தொழில்முனைவோருக்கு முக்கிய பங்கு அளிப்பதுடன் பெரிய அளவிலான வேலைவாய்ப்புகளை உருவாக்குவதில் இந்த துறை பெரும் பங்கு வகிப்பதாகவும் மத்திய சிறு-குறு தொழில் துறைக்கான மத்திய இணையமைச்சர் திரு பானு பிரதாப்சிங் வர்மா பேசினார்.
தஞ்சாவூர் பெரியார் மணியம்மை நிகர்நிலைப் பல்கலைக்கழகத்தில் மத்திய அரசின் சிறு குறு நடுத்தர தொழிலாளர்கள் அமைச்சகம் சார்பில் தேசிய ஷெட்யூல்டு வகுப்பினர் மற்றும் பழங்குடியினர் மாநாடு நடைபெற்றது.
நிகழ்ச்சியில் பேசிய மத்திய இணை அமைச்சர், தமிழ்நாட்டின் சிறு-குறு தொழில் துறையில் தொழில்முனைவு மற்றும் வாய்ப்புகளை மேம்படுத்துவதை நோக்கமாகக் கொண்ட இந்த கருத்தரங்கில் புதிய தொடக்கங்கள், வணிக விரிவாக்கம், தொழில்நுட்பத்தை செயல்படுத்துதல், சந்தைப்படுத்தல் மற்றும் திறன் மேம்பாடு போன்றவற்றிற்காக வடிவமைக்கப்பட்ட அரசாங்க திட்டங்கள் பற்றிய விழிப்புணர்வைப் பெறும் வகையிலான தளமாக விளங்கும் என்ற நம்பிக்கை ஏற்பட்டிருக்கிறது என்றார்.
நாட்டின் மொத்த உள்நாட்டு உற்பத்தியில் சிறு-குறு தொழில் துறை சுமார் 30 சதவீத பங்களிப்பை வழங்குகின்றன என்று கூறிய அமைச்சர், இந்த துறை இந்தியப் பொருளாதாரத்தை மேம்படுத்துவதற்கான பாதையை வகுத்து தருவதோடு, வலுவான மற்றும் தன்னிறைவு கொண்ட இந்தியாவை உருவாக்குவதிலும் முக்கிய பங்கு வகிக்கின்றன.
இன்றைய நிலவரப்படி, 1.09 கோடி சிறு-குறு தொழில் நிறுவனங்கள் இணையதளத்தில் பதிவு செய்யப்பட்டுள்ளதாகவும் அவற்றில் 11.46 லட்சம் அலகுகள் தமிழ்நாட்டைச் சேர்ந்தவை என்றும் அமைச்சர் குறிப்பிட்டார்.
ஒரு துடிப்பான தொழில்துறையாக தொழில் முனைவோரின் பாரம்பரியத்தை முன்வைக்கும் வகையில் இது கைவினைப்பொருட்கள் மற்றும் குடிசைத் தொழில்களில் தனது பங்களிப்பை வழங்கிவருகிறது. வாகன உதிரிபாகங்கள் மற்றும் பழுதுநீக்குதல் ஆகியவற்றில் முன்னணியில் உள்ளது. உள்ளாடைகள், ஆயத்த ஆடைகள், தோல் மற்றும் தோல் பொருட்கள் உட்பட பல சிறு தொழில்களை உள்ளடக்கிய குழுமங்களின் தாயகமாகவும் தமிழகம் உள்ளது.
கட்டிடக்கலை அற்புதங்கள் நிறைந்த வரலாற்று கோயில்களை உள்ளடக்கிய தமிழகம் மத மற்றும் ஆன்மீக சுற்றுலாவிற்கு ஏற்ற இடமாக உள்ளது, அதே நேரத்தில் மக்களுக்கு தொழில்முனைவு வாய்ப்புகளையும் வேலை வாய்ப்புகளையும் வழங்குகிறது.
சிறு-குறு தொழில் துறையின் மேம்பாட்டிற்காக மத்திய மற்றும் மாநில அரசுகளால் தொடங்கப்பட்டு செயல்படுத்தப்பட்டு வரும் தொடர்ச்சியான ஊக்குவிப்பு நடவடிக்கைகள் காரணமாக இந்த அற்புதமான வளர்ச்சி காணப்படுகிறது.
திறன் மேம்பாடு, சந்தை இணைப்புகள், நிதி வசதி, டெண்டர் ஏலம் போன்ற பல்வேறு தலையீடுகள் மூலம் ஷெட்யூல்டு வகுப்பினர் மற்றும் பழங்குடியின தொழில்முனைவோருக்கு ஆதரவான சுற்றுச்சூழல் அமைப்பை உருவாக்குவதற்கான முதன்மை நோக்கத்துடன் தேசிய ஷெட்யூல்டு வகுப்பினர் மற்றும் பழங்குடியின தொழில் முனைவோருக்கான முனையம் தொடங்கப்பட்டுள்ளது.
நிகழ்ச்சியில் பழங்குடியினர் கைவினைப் பொருட்களின் கண்காட்சி இடம் பெற்றிருந்தது.
இந்த மாநாட்டில் தமிழக சிறுகுறு தொழில்கள் துறை அமைச்சர் அன்பரசன், ஆதிதிராவிடர் நலத்துறை அமைச்சர் கயல்விழி செல்வராஜ், தமிழக அரசின் தலைமை கொறடா கோவி செழியன் ஆகியோர் பங்கேற்றனர்.
கருத்துகள்