உயிருடன் உள்ள நபரை இறந்ததாக அரசு அறிவித்த நிலையில் உயர்நீதிமன்றத்தில் உறவினர் வழக்கு

 இலங்கை அகதியிடம் தமிழ்நாடு அதிகாரிகள். 

 நீங்க இறந்துவிட்டீர்கள் உங்களை விடுவிக்க முடியாது என அதிர்ச்சிப் பதில்

நீங்கள் இறந்து விட்டதால், உங்களின் கோரிக்கையைப் பரிசீலிக்க முடியாதெனக் கூறி, அரசின் அகதிகள் சிறப்பு முகாமில் உயிருடன் உள்ள இலங்கை அசைலம் விசா  அகதியிடம், தமிழ்நாடு அரசு அலுவலர்கள் கையெழுத்துப் பெற்றது அதிர்ச்சியாகியுள்ளது.

தமிழ்நாட்டில் பலவிதமான குற்றவியல் வழக்குகளில் கைதாகி, சிறைத் தண்டனை முடித்த நிலையில் வெளிநாட்டினர், திருச்சிராப்பள்ளி சிறப்பு அகதிகள் முகாமில் தங்க வைக்கப்படுவது வழக்கம்.

தற்போது, இலங்கைத் தமிழர்கள் உட்பட, 140 க்கும் அதிகமானோர், முகாமில் அடைக்கப்பட்டுள்ளனர்.

அதில் இலங்கையைச் சேர்ந்த கிருஷ்ணகுமாரும் ஒருவர்.

கிருஷ்ணகுமார் உறவினர்களுடன் சேர்ந்து வாழ அனுமதிக்க வேண்டுமனக் கூறி, தமிழ்நாடு அரசின் அயலகத் தமிழர் நலன் மற்றும் மறுவாழ்வுத்துறை ஆணையத்துக்கு, அவரது உறவினர்  கடிதம் மனுவாக கொடுத்திருந்தார்.

ஆனால், கிருஷ்ணகுமார் இறந்துவிட்டதாக அரசிடமிருந்து பதில் வந்துள்ளது.

அதை ஆட்சேபித்து, கிருஷ்ணகுமாரின் உறவினர் நாகேஸ்வரி சென்னை உயர் நீதிமன்றம் மதுரை கிளையில் தாக்கல் செய்துள்ள ஆட்கொணர்வு மனுவில்:

மதுரை மாவட்டம் உச்சப்பட்டி அகதிகள் முகாமில், எனது இரு மகள்களுடன் வசித்து வருகிறேன்.

எனது தங்கை மகன் கிருஷ்ண குமார், சட்டவிரோதச் செயல்பாடுகள் காரணமாக, 2015 ஆம் ஆண்டில், இராமநாதபுரம் மாவட்ட கியூ பிரிவு காவல்துறையினரால் கைது செய்யப்பட்டார். பின்னர் விசாரணை முடிவில் 

அவர் மீதான குற்றங்களுக்கு, 2018 ஆம் ஆண்டு, இராமநாதபுரம் நீதிமன்றம், அவருக்கு பத்நாண்டுகள் சிறைத் தண்டனை விதித்ததை எதிர்த்து, அவர் சென்னை உயர் நீதிமன்றம் மதுரை கிளையில் மேல்முறையீடு செய்தார். விசாரணையில், அவருக்கு விதிக்கப்பட்ட தண்டனை, ஏழாண்டுகளாகக் குறைக்கப்பட்டது.

அவரின் சிறை தண்டனை முடிந்த பின், திருச்சிராப்பள்ளி அகதிகள் சிறப்பு முகாமில் அடைக்கப்பட்டார். என் தங்கை மகனை, எங்கள் குடும்பத்தினருடன் நிரந்தரமாக தங்க வைத்துக் கொள்ள விரும்புகிறேன்.

அதுகுறித்து, கடந்த மார்ச் மாதம் 3 ஆம் தேதியில், திருச்சிராப்பள்ளி மாவட்ட ஆட்சியர், அயலக நலத்துறையின் அலுவலர்களுக்கு கடிதமெழுதினேன். எனது கோரிக்கை பரிசீலிக்கப்படவில்லை. அதையடுத்து, நீதிமன்றத்தில் வழக்குத் தொடர்ந்தேன். எனது கோரிக்கையைப் பரிசீலித்து உரிய முடிவெடுக்க, நீதிமன்றம் உத்தரவிட்டது. நான்கு வாரங்கள் கடந்த பிறகும், உரிய நடவடிக்கை எடுக்கப்படாத நிலையில், கடந்த ஏப்ரல் மாதம் 17 ஆம் தேதியில் எனது தங்கை மகனுக்கு, தமிழ்நாடு  அரசின் அயலகத் தமிழர் நலன் மற்றும் மறுவாழ்வுத்துறை ஆணையத்திடமிருந்து, கடிதம் ஒன்று வந்துள்ளதில், 'மனுதாரர் கிருஷ்ணகுமார் ஏற்கனவே இறந்து விட்டதால், கோரிக்கையைப் பரிசீலிக்க இயலாது' என, அதில் தெரிவிக்கப்பட்டுள்ளது.

சிறப்பு அகதிகள் முகாமில் அடைக்கப்பட்டிருக்கும் கிருஷ்ணகுமார் குறித்து, எந்த விதமான தகவலையும் உறுதிப்படுத்தாமல், இப்படியொரு தவறான கடிதம் எழுதப்பட்டுள்ளது. அதன் மீது உரிய நடவடிக்கை எடுத்து, என் தங்கை மகனை, எங்கள் குடும்பத்துடன் தங்க வைப்பது தொடர்பாக, அரசுக்கு உத்தரவிட வேண்டுமென மனுவில் கூறப்பட்டுள்ளது.

சிறைத் தண்டனை முடிந்து, சிறப்பு அகதிகள் முகாமிற்கு வருபவர்களை, கோரிக்கை அடிப்படையில், உறவினர்களுடன் தங்க அரசு அனுமதிக்கிறது. அந்த வகையில், நுாற்றுக்கும் மேற்பட்டவர்கள், தங்கள் உறவினர்களுடன் வசித்து வருகின்றனர். திருச்சிராப்பள்ளி அகதிகள் முகாமிலுள்ள கிருஷ்ணகுமார், தன் சிற்றன்னையுடன் தங்க அரசிடம் உரிய அனுமதி கேட்டார். ஆனால், 'அவர் இறந்துவிட்டார்' எனக் கடிதம் அனுப்பி, அவரிடமே கையெழுத்துப் பெற்றுள்ளனர்.

சிறப்பு அகதிகள் முகாமில் அடைக்கப்பட்டுள்ள நபருக்கு தினமும் அரசு, 175 ரூபாயைத் தருகிறது. இறந்து போனவருக்கு எப்படி அரசு பணம் கொடுத்து வந்தது? அது மொத்தத்தில் அலட்சியத்தோடும் கவனக்குறைவு அலுவலர்களின்  செயல்பாடு தான், உயிரோடு இருப்பவரை இறந்து விட்டதாக, அபத்தமான செயலில் ஈடுபட்டுள்ளனர். அவர்களுக்கு அரசு என்ன தண்டனை கொடுக்கப் போகிறது? இதுவும் வாழ்வுரிமைச் சட்டத்தில் குற்றம் தானே