விக்கிரவாண்டி சட்டமன்றத் தொகுதி இடைத்தேர்தலில் நாளை வாக்குப்பதிவு
இறுதிக்கட்ட வாக்கு சேகரிப்பு தீவிரம். விக்கிரவாண்டி தொகுதி இடைத்தேர்தலுக்கான பிரச்சாரம் நேற்று மாலையுடன் முடிந்தது இறுதிக்கட்ட வாக்கு சேகரிப்பில் வேட்பாளர்கள் மற்றும் கட்சியினர் ஈடுபட்டனர்.
விழுப்புரம் மாவட்டம் விக்கிரவாண்டி சட்டமன்றத் தொகுதி உறுப்பினராக இருந்தவர் தி.மு.க. வின் நா.புகழேந்தி. உடல் நலக்குறைவால் ஏப்ரல் மாதம் 6 ஆம் தேதி மரணமடைந்தார். அதனால் விக்கிரவாண்டி சட்டமன்றத் தொகுதிக்கு இடைத்தேர்தல் அறிவிக்கப்பட்டு நாளை புதன்கிழமை வாக்குப்பதிவு நடக்கிறது.
இந்தத் தேர்தலில் தி.மு.க. சார்பாக அன்னியூர் சிவா, பாட்டாளி மக்கள் கட்சியின். சார்பில் சி.அன்புமணி, நாம் தமிழர் கட்சியின் டாக்டர் அபிநயா உள்ளிட்ட 29 வேட்பாளர்கள் களத்திலுள்ளனர்.
பிரதான எதிர்க்கட்சியான அண்ணா தி.மு.க. மற்றும் அதன் கூட்டணிக் கட்சியான தே.மு.தி.க. இடைத்தேர்தலை புறக்கணித்துள்ளன. இதனால் அங்கு தி.மு.க., பா.ம.க., கட்சிகளுக்கிடையில் போட்டி நிலவுகிறது.
தி.மு.க. வேட்பாளர் அன்னியூர் சிவாவை ஆதரித்து முதலமைச்சர் மு.க. ஸ்டாலின் காணொலிக் காட்சி மூலம் பிரச்சாரம் செய்தார். அமைச்சர்கள், சட்டமன்ற உறுப்பினர்கள், கட்சி நிர்வாகிகள் மற்றும் கூட்டணிக் கட்சிகளின் தலைவர்கள் தொகுதி முழுவதும் தீவிர வாக்கு சேகரித்தனர்.
அதேபோல் பா.ம.க. வேட்பாளர் சி.அன்புமணியை ஆதரித்து கட்சியின் நிறுவனர் டாக்டர் ச.ராமதாஸ், கட்சித் தலைவர் டாக்டர் அன்புமணி ராமதாஸ், மற்றும் கட்சி மூத்த தலைவர்கள் தீவிரமாக பிரச்சாரத்தில் ஈடுபட்டுள்ளனர். பா.ஜ.க. சார்ந்த கூட்டணிக் கட்சிகளின் தலைவர்களும் பா.ம.க. வேட்பாளருக்கு ஆதரவு திரட்டினர்.
நாம் தமிழர் கட்சி வேட்பாளர் டாக்டர் அபிநயாவும் சூறாவளிப் பிரச்சாரத்தில் ஈடுபட்டவரை ஆதரித்து அந்தக் கட்சியின் தலைமை ஒருங்கிணைப்பாளர் சீமான் பல்வேறு இடங்களில் வாக்குகளைச் சேகரித்தார்.
தி.மு.க. இளைஞர் அணி செயலாளரும், இளைஞர் நலன் மற்றும் விளையாட்டுத்துறை அமைச்சருமான உதயநிதி ஸ்டாலின், தி.மு.க. வேட்பாளர் அன்னியூர் சிவாவை ஆதரித்து திருவாமாத்தூர், காணை, பனமலைப்பேட்டை, அன்னியூர் ஆகிய இடங்களில் வாக்குச் சேகரித்தார்.
பா.ம.க. வேட்பாளரை ஆதரித்து டாக்டர் அன்புமணி ராமதாஸ், அய்யூர்அகரம், தென்னமாதேவி, திருவாமாத்தூர், சோழகனூர், கொசப்பாளையம், சங்கீதமங்கலம் ஆகிய இடங்களில் பிரச்சாரம் செய்தார்.
தேர்தலுக்கு ஒரு நாள் உள்ள நிலையில் நேற்று திங்கட்கிழமை மாலை 6 மணியுடன் தேர்தல் பிரசாரம் ஓய்ந்தது.
அதனால் வேட்பாளர்களும் அக்கட்சியைச் சேர்ந்த நிர்வாகிகளும், தற்போது இறுதிக்கட்டப் பிரச்சாரத்தில் தீவிரமாக ஈடுபட்டனர்.
தும்பூர், நேமூர் உள்ளிட்ட இடங்களில் அமைச்சர் உதயநிதி ஸ்டாலின் பிரச்சாரம் செய்து, மாலை 5 மணிக்கு விக்கிரவாண்டி பேரூராட்சி பகுதியில் பிரச்சாரத்தை முடித்தார்.
அது போல பா.ம.க , நாம் தமிழர் கட்சி வேட்பாளர்கள் உள்பட அனைத்து வேட்பாளர்களும் இறுதிக்கட்ட பிரச்சாரத்தை முடித்தனர் வாக்குப்பதிவுக்கான முன்னேற்பாடுகளை தேர்தல் ஆணையம் தீவிரப்படுத்தியது. விக்கிரவாண்டி இடைத்தேர்தல் வாக்குப்பதிவு 276 வாக்குச்சாவடி மையங்களில் அமைதியான முறையில் நடத்துவதற்கான அனைத்து முன்னேற்பாட்டுப் பணிகளை காவல்துறை துணையுடன் தேர்தல் ஆணையம் மேற்கொண்டுள்ளது.
தேர்தலில் பதிவாகும் வாக்குகள் ஜுலை 13 ஆம் தேதி பனையபுரம் அரசு மேல்நிலைப்பள்ளியில் எண்ணப்படுகிறது.
கருத்துகள்