திருப்பராய்த்துறை ஸ்ரீ இராமகிருஷ்ன தபோபனம் உப தலைவர் சுவாமி திவ்யாநந்தர் காலமானார்

ஸ்ரீ ராமகிருஷ்ண தபோவனத்தின் உப தலைவராக இருந்த சுவாமி திவ்யானந்தர் (86) நேற்று திருச்சியில் காலமானார். திருச்சிராப்பள்ளியிலிருந்து கரூர் செல்லும் சாலையில் அமைந்துள்ளது ஸ்ரீ ராமகிருஷ்ண தபோபனம் இதை திருப்பராய்துறை ஸ்ரீ தாருகாவணேஸ்வரர் ஆலயம் புனரமைத்து 1900 ஆண்டு கட்டிய கானாடுகாத்தான் வெ. வீர.நாகப்ப செட்டியார் குமாரர் இரண்டாம் திருப்பணிச் செம்மல் கானாடுகாத்தான் வெ.வீர.நா.அருணாசலம் செட்டியார் உதவியால் முன்னால் ஆளுநர் நிதியமைச்சர் மற்றும் பல பதவிகள் வகித்த சி.சுப்பிரமணியத்தின் சிறிய தகப்பனாரான சித்பவாநந்தரால் 1944 ல் துவங்கப்பட்டது அதில் 1971-ல் தபோவனத்தில் இணைந்தவர், 1977-ல் தபோவனத்தின் நிறுவனரான சித்பவானந்தரிடம் சந்நியா தீட்சை பெற்று, திவ்யானந்தர் என்ற பெயரில் தனது பணியைத் தொடங்கினார். ஸ்ரீ ராமகிருஷ்ண தபோவனத்தின் கிளை நிறுவனங்களான திருநெல்வேலி மாவட்டம், சேரன்மகாதேவி பரத்வாஜா ஆசிரமம், ஸ்ரீ ராமகிருஷ்ண சிறுவர் காப்பகம் ஆகியவற்றின் பொறுப்பாளராக 32 ஆண்டுகள் பணியாற்றினார். மேலும், திருநெல்வேலி மாவட்டம் திசையன்விளை, உடன்குடி மற்றும் ராணிப்பேட்டை ஆகிய இடங்களில் உள்ள ஸ்ரீ ராமகிருஷ்ண பள்ளிகளின் செயலாளராகவும் மற்றும் மதுரை மாவட்டம், திருவேடகம் விவேகானந்த கல்லூரி, ஸ்ரீ ராமகிருஷ்ண தபோவனம் ஆகியவற்றின் செயலாளராகவும் இருந்துள்ளார். ஸ்ரீ ராமகிருஷ்ண தபோவனத்தின் உப தலைவராகப் பணியாற்றி வந்த இவர், திருச்சி மாவட்டம், திருப்பராய்த்துறையில் உள்ள தபோவனத்தின் தலைமையகத்தில் தங்கியிருந்தார். இதனிடையே, கடந்த சில நாட்களாக உடல்நலக் குறைவால் பாதிக்கப்பட்டு, திருச்சி தனியார் மருத்துவமனையில் அனுமதிக்கப்பட்டிருந்த திவ்யானந்தர் நேற்று அக்டோபர். 27 ஆம் தேதி இரவு காலமானார். அதைத் தொடர்ந்து, அவரது உடல் திருப்பராய்த்துறை ராமகிருஷ்ண தபோவன பள்ளி வளாகத்தில் அஞ்சலிக்காக வைக்கப்பட்டுள்ளது. இன்று (அக்டோபர். 28) பிற்பகல் அவரது உடல் தகனம் செய்யப்படவுள்ளது.