திருச்சிராப்பள்ளி மாவட்டம் திருவெள்ளறை ஸ்வஸ்திக் கிணற்றை, தமிழ்நாடு தொல்லியல் துறை புனரமைத்து புதுப்பொலிவாக்கியது.
தமிழ்நாட்டில், 110 வரலாற்றுச் சின்னங்களை, மாநில தொல்லியல் துறை பாதுகாக்கிறது.
அந்த வகையில், திருச்சிராப்பள்ளி - துறையூர் சாலையிலுள்ள திருவெள்ளறை கிராமத்தில், பல்லவ மன்னர் நந்திவர்மனின் ஐந்தாம் ஆட்சியாண்டில், இங்கு, 'மார்பிடுகு பெருங்கிணறு' எனும் பெயரில், ஸ்வஸ்திக் வடிவில் படிக்கட்டுகளுடன் கிணறு கட்டப்பட்டது. கடந்த காலங்களில் ஊர் மக்களின் தண்ணீர் பஞ்சத்தை போக்கியதுடன், ஒரு பக்கத்தில் குளிப்பவர்களை மறுபக்கத்தில் குளிப்பவர்கள் பார்க்க முடியாத பாதுகாப்பு வசதியுடன் கட்டப்பட்ட பெருமையும் உடையது. படிக்கட்டில் தமிழில் எண்கள் இடப்பட்டுஉள்ளன.
இது, 1976 ம் ஆண்டு முதல் தொல்லியல் துறையின் கட்டுப்பாட்டில் உள்ளது.
இந்தக் கிணற்றிலுள்ள கல்வெட்டின் படி, நந்தி வர்மன் ஆட்சியில், ஆலம்பாக்கத்தைச் சேர்ந்த விஜய நல்லுாழான் என்பவரின் தம்பி கம்பன் அரையன் என்பவர், கி.பி 799 ல் துவங்கி, 800 ல் வெட்டி முடித்துள்ளார். கிணறை, 45 லட்சம் ரூபாய் செலவில், தொல்லியல் துறை பழமை மாறாமல் செப்பனிடும் பணியை, கடந்தாண்டு துவக்கி தற்போது முடித்துள்ளது.
மேலும், கிணற்றைச் சுற்றி கம்பி வேலி, வரலாற்றுக் குறிப்பு பலகைகள், காவலர் கூடம், பார்வையாளர்களுக்கான அடிப்படை வசதிகளையும் செய்துள்ளது.
மேலும், இக்கிணற்றை சுற்றியிருந்த மண்மேடையை அகற்றி, 4 அடி ஆழத்தில் சமதளமாக்கி, புல்வெளியை அமைத்து, பார்வையாளர்கள் நடக்க, பாவு கற்களை பரப்பியுள்ளது. இரவில் ஒளிரும் விளக்குகளையும் அமைத்துள்ளது.
தற்போது, தொல்லியல் களங்களை அறியும் ஆர்வம் மாணவர்கள், மற்றும் பொதுமக்களிடம் அதிகரித்துள்ள நிலையில், இந்த ஸ்வஸ்திக் கிணறு, புனரமைக்கப்பட்ட பின், சுற்றுலா பயணியரை வெகுவாகக் கவர்ந்துள்ளது.திருவெள்ளறை வைணவ 108 திவ்யதேசங்களில் ஒன்றாகும். சோழ நாட்டு நான்காவது திருத்தலம். திருச்சிராப்பள்ளிக்கு அருகில் துறையூர் போகும் வழியில் அமைந்தது. இங்கு செந்தாமரைக்கணன் எனும் புண்டரீகாக்ஷன் எம்பெருமான் எழுந்தருளியுள்ளார்.பெரியாழ்வார் மற்றும் திருமங்கையாழ்வார் மங்களாசாசனம் செய்த மொத்தம் 24 பாசுரங்கள் உள்ளது.
திருவெள்ளறை அழகன் பெரியாழ்வார் பாசுரம் 192
இந்திரனோடு பரமன் ஈசனிமையவ ரெல்லாம், மந்திர மாமலர் கொண்டு மறைந்தவ ராய்வந்து நின்றார், சந்திரன் மாளிகைசேரும் சதுரர்கள் வெள்ளறை நின்றாய், அந்தியம் போதிது வாகும் அழகனே! காப்பிட வாராய் ....பெரியாழ்வார், 192 வது பாசுரம், இக்கோவில் பல்லவ மன்னன் நந்திவர்மனின் ஐந்தாம் ஆண்டில் கி.பி 805 ஆம் ஆண்டு துவங்கி மூன்றாம் நந்திவர்மன் சோழர்கள், மற்றும் விஜயநகர பேரரசின் நாயக்க மன்னர்கள் என பல காலகட்டங்களில் இந்த கோயில் திருப்பணி நடைபெற்றுள்ளதை அக் காலத்தின் கல்வெட்டுகள் மூலம் அறியலாம். மதுராந்தக உத்தமச் சோழனின் எட்டாம் ஆண்டு கல்வெட்டுகளில் இக் கோவில் "பெரிய ஸ்ரீ கோயில்" என்று குறிப்பிடப்பட்டுள்ளது. இக்கோவிலின் இரண்டாம் நுழைவாயிலில் மதுரையை சேர்ந்த மாறவர்மன் சுந்தரபாண்டியன் காலத்தில் கி.பி 1216 ஆம் ஆண்டு பொறிக்கப்பெற்ற கல்வெட்டில் பொன்னமராவதி யுத்தம் மூன்றாம் இராசராசனை வென்றதன் மூலம் காவேரி நாட்டை எப்படித் தனதாக்கிக் கொண்டான் என்பதை விளக்கும் பாடல் ,
வெறியார் தவளத் தொடை செயமாறன் வெகுண்டதொன்றும்
அறியாத செம்பியன் காவேரி நாட்டிலரமியத்துப்
பறியாத தூணிலை கண்ணன் செல்பட்டினப் பாலைக்கன்று
நெறியால் விருந்தூண் பதினாறு மேயங்கு நின்றானே!
மாறவர்மன் சுந்தரபாண்டியன் சோழ நாட்டைக் கைப்பற்றிய போது அங்கிருந்த எல்லா மண்டபங்களையும் இடித்துத் தள்ளினான் ஆனால் அக்காவேரி நாட்டில் அவன் அழிக்காமல் விட்டது 16 தூண்களை உடைய மண்டபத்தை ஏனென்றால் அந்த மண்டபம் சோழ மன்னன் கரிகாலனை பாடியமைக்காக பட்டினப்பாலை பாடிய உருத்திரக்கண்ணருக்கு பரிசாக அளித்தது என்று விளக்குகிறது மேற்கொண்ட கல்வெட்டு பாடல்.
கோயிலில் இருக்கும் கிணறு பல்லவ மன்னன் நந்திவர்மனால் உருவாக்கப்பெற்றது. இது மாற்பிடுகு பெருங்கிணறு என்று அழைக்கப்பெறும். இந்தக் கிணற்றுக்கு அருகில் இருக்கும் ஒரு கல்வெட்டு ஆலம்பாக்கத்து கம்பன் அரையன் என்ற தலைவன் தன் அரசன் நந்திவர்மன் பட்டபெயரான மாற்பிடுகு என்ற பெயரில் "மாற்பிடுகு பெருங்கிணறு" என்று தோற்றுவித்தான். இந்த கிணற்றின் பக்கசுவற்றில் ஒரு கல்வெட்டு பாடல் ஆலம்பாக்கத்து கம்பன் அறையனால் பொறிக்கப்பெற்றுள்ளது,
ஸ்ரீ கண்டார் காணா உலகத்திற் காதல் செய்து நில்லாதேய்
பண்டெய் பரமன் படைத்த நாள் பார்த்து நின்று நைய்யாதேய்
தண்டால் மூப்பு வந்து உன்னைத் தளரச் செய்து நில்லாமுன்
உண்டேல் உண்டு மிக்கது உலகமறிய வைம்மினேய்! என்பதாகும்.
கருத்துகள்