கள்ளக்குறிச்சி விஷச்சாராயச் சாவு 67 அலட்சியம் குறித்து கோகுல்தாஸ் விசாரணை ஆணையம் அறிக்கை !,
"மெத்தனால் கசிவைத் தடுக்கத் தவறிய அதிகாரிகளே இந்த சராய சாவுக்கு காரணம்" - 12 பேர் மீது துறை ரீதியான விசாரணைக்கு பரிந்துரை; கல்வராயன் மலையில் தனி மதுவிலக்கு படை அமைக்கவும் பரிந்துரை!
சென்னை, 2024-ஆம் ஆண்டு ஜூன் மாதம் கள்ளக்குறிச்சி மாவட்டம் கல்வராயன்மலை கருணாபுரத்தில் நிகழ்ந்த கொடூர கள்ளச்சாராய சம்பவத்தில் 67 பேர் உயிரிழந்த நிலையில், ஓய்வுபெற்ற உயர் நீதிமன்ற நீதிபதி பி. கோகுல்தாஸ் தலைமையில் திமுக ஆட்சியில் அமைக்கப்பட்ட ஒருநபர் ஆணையத்தின் இறுதி அறிக்கை இன்று செப்டம்பர் .8 சட்டப்பேரவையில் தாக்கல் செய்யப்பட்டது. காவல்துறை, மதுவிலக்கு மற்றும் வருவாய்த்துறை அதிகாரிகளின் அலட்சியமும், கடமை தவறிய போக்குமே இந்த உயிரிழப்புகளுக்கு முக்கியக் காரணம் என அந்த அறிக்கையில் கண்டறியப்பட்டுள்ளது
2024-ஆம் ஆண்டு ஜூன் 19 மற்றும் 20-ஆம் தேதிகளில், கள்ளக்குறிச்சி மாவட்டம் கருணாபுரம் பகுதியில் மெத்தனால் கலந்த விஷ நச்சுச் சாராயத்தை அருந்தியதில் 67 பேர் உயிரிழந்தனர். மேலும் 161 பேர் பாதிக்கப்பட்டனர். இந்தச்சம்பவம் குறித்து விசாரிக்க அப்போதைய திமுக அரசு, ஓய்வுபெற்ற உயர் நீதிமன்ற நீதிபதி கோகுல்தாஸ் தலைமையில் ஒருநபர் ஆணையத்தை அமைத்தது. ஆணையம் 433 பேரிடம் விசாரணை நடத்தியதுடன், 69 சாட்சிகளின் வாக்குமூலங்களையும் பதிவு செய்துள்ளது. இந்த வழக்கு தற்போது உயர் நீதிமன்ற உத்தரவின் பேரில் CBI விசாரணையில் உள்ளது.
கள்ளச்சாராய விற்பனையாளர்களுக்கும் காவல்துறை அதிகாரிகளுக்கும் இடையே கேடான கூட்டணி இருந்ததை ஆணையம் தெளிவாகக் கண்டறிந்துள்ளது. மெத்தனாலின் சேமிப்பு, போக்குவரத்து மற்றும் விற்பனையைக் கண்காணிக்கும் அதிகாரிகள் தங்கள் கடமைகளில் விழிப்புடன் இருந்திருந்தால், இந்தக் கொடிய விஷ இரசாயனம் சென்னையிலிருந்து கள்ளக்குறிச்சி வரை பயணித்திருக்க முடியாது என்று அந்த அறிக்கை குறிப்பிடுகிறது. இத்துறையினர் மெத்தனால் பயன்பாட்டைக் கண்காணிக்கத் தவறியதால் இந்த சம்பவம் நிகழ்ந்ததாக குற்றம்சாட்டப்பட்டுள்ளது. காவல்துறை: கள்ளக்குறிச்சி, சங்கராபுரம் மற்றும் கச்சிராப்பாளையம் காவல் நிலையங்களில் பணியாற்றிய உதவி ஆய்வாளர்கள், ஆய்வாளர்கள் மற்றும் காவல் துணை கண்காணிப்பாளர்கள் மீது பொறுப்பு சாட்டப்பட்டுள்ளது. மேலும், திருக்கோவிலூர் மதுவிலக்கு அமலாக்கப் பிரிவு அதிகாரிகளும் இதில் அடங்குவர்.
வருவாய்த்துறை கிராம உதவியாளர்கள், கிராம நிர்வாக அலுவலர்கள், வருவாய் ஆய்வாளர்கள் மற்றும் கள்ளக்குறிச்சி, சங்கராபுரம், கச்சிராப்பாளையம் வட்டங்களின் வட்டாட்சியர்கள் மீதும் பொறுப்பு சாட்டப்பட்டுள்ளது.
இந்த சம்பவத்திற்கு 12 அதிகாரிகள் பொறுப்பு என்று ஆணையம் கண்டறிந்து, அவர்கள் மீது துறை ரீதியான விசாரணை நடத்தப் பரிந்துரைத்துள்ளது.
கள்ளச்சாராயத்தின் முக்கிய ஆதாரமாக உள்ளது தனியாக ஒரு மதுவிலக்கு அமலாக்கப் படை அமைக்க பரிந்துரைக்கப்பட்டுள்ளது. மெத்தனாலின் சேமிப்பு, போக்குவரத்து மற்றும் பயன்பாட்டை கண்டிப்பாக ஒழுங்குபடுத்தும் வகையில் சட்டங்களில் திருத்தம் கொண்டு வர பரிந்துரைக்கப்பட்டுள்ளது.
உயிரிழந்தவர்களின் குழந்தைகளுக்கு கல்வி, உணவு, தங்குமிடம் மற்றும் அரசு வேலை வாய்ப்புகள் வழங்க பரிந்துரைக்கப்பட்டுள்ளது. பாதிக்கப்பட்டவர்களுக்கு பகுதி மற்றும் நிரந்தர இயலாமைக்கு ரூபாய் 2 லட்சம், முழு நிரந்தர இயலாமைக்கு ரூபாய் 5 லட்சம் கூடுதல் இழப்பீடு வழங்கப் பரிந்துரைக்கப்பட்டுள்ளது. கள்ளக்குறிச்சியில் தொழிற்சாலைகள் அமைத்து, இளைஞர்களுக்கு வேலைவாய்ப்புகளை உருவாக்கவும் பரிந்துரைக்கப்பட்டுள்ளது.
2023-இம் ஆண்டு விழுப்புரத்தில் கள்ளச்சாராய சம்பவம் நடந்தும், 2024-ஆம் ஆண்டு கள்ளக்குறிச்சியில் மீண்டும் அதே சோகம் நிகழ்ந்தது. காவல் நிலையத்திற்கு சில அடி தூரத்தில் கள்ளச்சாராய விற்பனை நடந்து கொண்டிருந்தது. இது வெறும் அலட்சியம் அல்ல; இது ஒரு அரசு மாவட்ட அமைப்பு நிர்வாக ரீதியான தோல்வி மெத்தனால் கசிவு, கள்ளச்சாராய விற்பனை, அதிகாரிகளின் கண்காணிப்பின்மை என ஒவ்வொரு கட்டத்திலும் தவறுகள் நிகழ்ந்துள்ளன. "கள்ளச்சாராய விற்பனையாளர்களுக்கும் காவல்துறைக்கும் இடையே கேடான கூட்டணி" என்று ஆணையம் கூறியிருப்பது, இந்த சம்பவத்தின் உண்மை முகத்தை வெளிப்படுத்துகிறது. 12 அதிகாரிகள் மீது விசாரணை பரிந்துரைக்கப்பட்டிருந்தாலும், இவர்கள் மீது உண்மையில் நடவடிக்கை எடுக்கப்படுமா? பழைய ஆணையங்கள் எல்லாம் அறிக்கைகளை மட்டும் தந்துவிட்டு முடிந்துவிட்டன. இந்த அறிக்கையும் அப்படித்தான் ஆகிவிடுமா? CBI விசாரணை நடந்து கொண்டிருக்கும் நிலையில், அதன் முடிவுகளும் முக்கியமானவை. இந்த சோகம் மீண்டும் நிகழாமல் தடுக்க, பரிந்துரைகள் அனைத்தும் முழுமையாக செயல்படுத்தப்பட வேண்டும்.
அறிக்கை சட்டப்பேரவையில் தாக்கல் செய்யப்பட்டுள்ளதால், சட்டமன்ற உறுப்பினர்கள் இது குறித்து விவாதிப்பார்கள். அரசு, அறிக்கையில் உள்ள பரிந்துரைகளின் அடிப்படையில், குற்றம்சாட்டப்பட்ட 12 அதிகாரிகள் மீது துறை ரீதியான விசாரணை நடத்த நடவடிக்கை எடுக்கும். CBI விசாரணை தொடர்ந்து நடைபெறும். கல்வராயன் மலைப் பகுதிகளில் தனி மதுவிலக்கு படை அமைக்கப்படலாம். இந்த சம்பவத்தில் இருந்து பாடம் கற்று, எதிர்காலத்தில் இதுபோன்ற சம்பவங்களைத் தடுக்க புதிய சட்டங்கள் அல்லது விதிமுறைகள் கொண்டு வர வாய்ப்புள்ளது.
கருத்துகள்