உள்துறை அமைச்சர் அடிக்கல் நாட்டிய இந்தியன் ஆயில் நிறுவனத் திட்டங்கள்

மத்திய உள்துறை அமைச்சர் சென்னையில் அடிக்கல் நாட்டிய இந்தியன் ஆயில் நிறுவன திட்டங்களின் விவரங்கள். மத்திய உள்துறை அமைச்சர் திரு அமித் ஷா கடந்த 21-ஆம் தேதி தமிழக முதலமைச்சர் திரு எடப்பாடி கே பழனிச்சாமி, துணை முதலமைச்சர் திரு ஓ பன்னீர்செல்வம் மற்றும் அதிகாரிகள் முன்னிலையில் சென்னையில் இந்தியன் ஆயில் நிறுவனத்தின் பல்வேறு திட்டங்களுக்கு அடிக்கல் நாட்டினார். கடந்த 2019-ஆம் ஆண்டு சென்னையில் நடைபெற்ற உலக முதலீட்டாளர்கள் மாநாட்டின் போது தமிழக அரசின் தொழில் ஆலோசனை மன்றத்துடன் ரூபாய் 7900 கோடி முதலீடு செய்வதற்கு கையெழுத்திடப்பட்டது. இதன் அடிப்படையில் இந்த மூன்று திட்டங்களுக்கு அடிக்கல் நாட்டப்பட்டது. இந்த திட்டங்கள் குறித்த விவரங்கள் பின்வருமாறு: பெட்ரோல் முனையம்- வல்லூர்: காமராஜர் துறைமுகத்துக்கு அருகே 100 ஏக்கர் நிலப்பரப்பில் அமைக்கப்படவுள்ள வல்லூர் முனையம் 2 லட்சம் கிலோலிட்டர் பெட்ரோல் சேமிக்கும் திறன் கொண்டதாகவும், இங்கு, பெட்ரோல் நிரப்பும் வாகனங்கள் நிறுத்துவதற்கு 24 தடங்களும் அமைக்கப்படும். ரூபாய் 900 கோடி மதிப்பில் அமைக்கப்படவுள்ள இந்த முனையம், வரும் 2023-ஆம் வருடம் நிறைவடையும் என்று எதிர்பார்க்கப்படுகிறது. காமராஜர் துறைமுகத்தில் இறங்கு தளம்- எண்ணூர்: வல்லூர் முனையத்தில் இருந்து பெட்ரோலியப் பொருட்களை கப்பல் வாயிலாக எடுத்துச் செல்வதற்கு எண்ணூர் காமராஜர் துறைமுகத்தில் புதிய இறங்குதளம் அமைக்கப்படவிருக்கிறது. ஆண்டுக்கு 2 முதல் 3 மில்லியன் மெட்ரிக் டன்களை கையாளும் வகையில் இந்த தளம் அமைக்கப்படும். ரூபாய் 900 கோடி மதிப்பீட்டில் அமைக்கப்படும் இந்த இறங்குதளம் 2025-ஆம் ஆண்டு பயன்பாட்டிற்கு வரும் என்று எதிர்பார்க்கப்படுகிறது. ஒருங்கிணைக்கப்பட்ட லூப் வளாகம்- அமுல்லைவாயல்: மணலியில் அமுல்லைவாயல் கிராமத்தில் 71 ஏக்கர் நிலப்பரப்பில் புதிய வளாகம் அமையவிருக்கிறது. இந்த ஒருங்கிணைந்த வளாகத்தில் பல்வேறு இயற்கைக்கு உகந்த மசகு எண்ணெய் வகைகள் கலவையாக்கப்படும். ரூபாய் 1400 கோடி மதிப்பில் ஏற்படுத்தப்படும் இந்தத் திட்டம், வரும் 2023-ஆம் ஆண்டுக்குள் முடிவடையும் என்று எதிர்பார்க்கப்படுகிறது. மொத்தம் ரூ. 3200 கோடி மதிப்பில் அமையவுள்ள இந்த திட்டங்களின் மூலம் நூற்றுக்கணக்கான தொழிலாளர்களுக்கு வேலை வாய்ப்பு கிடைக்கும். இந்தத் தகவல், தமிழ்நாடு மற்றும் புதுச்சேரிக்கான இந்தியன் ஆயில் மாநில தலைவர் மற்றும் நிர்வாக இயக்குநர் திரு பி ஜெயதேவன் வெளியிட்டுள்ள செய்திக் குறிப்பில் தெரிவிக்கப்பட்டுள்ளது.