திருப்பரங்குன்றம் - மலை உச்சி தீபத் தூணில் வெற்றித் தீபம் ஏற்றுவோம்! இராம ரவிக்குமார் சிறப்புப் பேட்டி

பப்ளிக் ஜஸ்டிஸ் - சிறப்பு செய்தி

*திருப்பரங்குன்றம் - மலை உச்சி தீபத் தூணில் #வெற்றித்தீபம் ஏற்றுவோம்!!*

* இந்து தமிழர் கட்சி நிறுவனர் திரு. இராம ரவிக்குமார் திருப்பரங்குன்றத்தில் விளக்கு ஏற்றி வழிபாடு - உச்ச நீதிமன்றத்தில் செவ்வாய் 17.11.2026 அன்று இரட்டை வழக்கு விசாரணை*

*மதுரை, 14.11.2026 - பப்ளிக் ஜஸ்டிஸ் சிறப்பு நிருபர்:*

கந்த சஷ்டி நான்காம் நாளான இன்று, திருப்பரங்குன்றம் அருள்மிகு சுப்பிரமணியசுவாமி திருக்கோவில் முன்பாக, இந்து தமிழர் கட்சி நிறுவனத் தலைவர் திரு. இராம. இரவிக்குமார் தலைமையில், பக்தர்கள், அடியார்கள் பங்கேற்ற சிறப்பு வழிபாடு நடைபெற்றது.

திருக்கோவில் முன்பாக விளக்கேற்றி, முருக நாமம் சொல்லி, நீதிமன்ற உத்தரவு நகல்களை காண்பித்து வழிபாடு செய்யப்பட்டது.

இந்த ஆண்டு *24.11.2026* அன்று நடைபெற உள்ள கார்த்திகை தீப விழாவில், நீதிமன்ற உத்தரவுப்படி மலை உச்சி தீபத்தூணில் தீபம் ஏற்ற வேண்டும் என்றும், வரும் *செவ்வாய் 17.11.2026* அன்று டெல்லி உச்ச நீதிமன்றத்தில் வரும் வழக்கில் வெற்றி பெற வேண்டும் என்றும் பிரார்த்தனை செய்யப்பட்டது.

நீதிமன்ற உத்தரவை நிறைவேற்றி தீபத்தூணில் தீபம் ஏற்ற வேண்டும் என்ற கோரிக்கை மனு, இந்து சமய அறநிலையத் துறை அதிகாரிகளுக்கு அனுப்பி வைக்கப்பட்டுள்ளதாகவும் தெரிவிக்கப்பட்டது.

*பப்ளிக் ஜஸ்டிஸ் இதழுக்கு இந்து தமிழர் கட்சி நிறுவனர் திரு. ராம ரவிக்குமார் கூறியதாவது:*

திருப்பரங்குன்றம் மலை உச்சியில் உள்ள தீபத்தூணில் தீபம் ஏற்ற வேண்டும் என்று கடந்த ஆண்டு உயர் நீதிமன்றம் மதுரை கிளை நீதிபதி ஜி.ஆர். சுவாமிநாதன் அவர்கள் உத்தரவு பிறப்பித்தார்கள்.

அதை நடைமுறைப்படுத்தாமல் கடந்த தி.மு.க. அரசு நீதிமன்ற உத்தரவை அவமதித்தது; விளக்கேற்றாமல் தடுத்தது.

இதனை எதிர்த்து கடந்த தி.மு.க. அரசு தொடர்ந்த மேல்முறையீட்டை, மாண்புமிகு நீதிபதிகள் ஜி. ஜெயச்சந்திரன், கே.கே. ராமகிருஷ்ணன் ஆகியோர் அடங்கிய இரு நீதிபதிகள் அமர்வு தள்ளுபடி செய்து, தனி நீதிபதியின் உத்தரவை உறுதிப்படுத்தியது.

இந்த நிலையில் உயர் நீதிமன்றம் கொடுத்த உத்தரவுகளுக்கு இந்த நாள் வரை எந்த தடையும் இல்லை.

ஆகவே நீதிமன்ற உத்தரவை நிறைவேற்ற தீபத்தூணில் தீபம் ஏற்ற வேண்டும் என்ற கோரிக்கை மனுவை இந்து சமய அறநிலையத் துறை அதிகாரிகளுக்கு அனுப்பி வைத்திருக்கிறோம்.

இந்த ஆண்டு மலை உச்சியில் உள்ள தீபத்தூணில் தீபம் ஏற்ற தமிழ்நாடு அரசு, இந்து சமய அறநிலையத் துறை வழிவகை செய்யும் என்று நம்புகிறோம்.

இந்த வழக்கு வரும் 17.11.2026 அன்று டெல்லி உச்ச நீதிமன்றத்தில் வருகிறது. நிச்சயமாக வழக்கில் வென்று வெற்றி தீபத்தை தீபத்தூணில் ஏற்றுவோம்.

அனைத்து மத நம்பிக்கைகளையும் சமமாக மதிப்பதாக சொல்லும் முதல்வர் விஜய் அவர்கள், நீதிமன்ற தீர்ப்புகளை ஏற்று நடைமுறைப்படுத்தி வெற்றி தீபம் ஏற்றிட உதவிடுவார் என்று நம்புகிறோம்.

நீதிமன்றத்தையும் உத்தரவுகளையும் இந்து மத உணர்வுகளையும் மதிக்காமல் தீபம் ஏற்றுவதை தடுத்த கடந்த தி.மு.க. அரசின் நிலை போல் இந்த அரசுக்கு வந்து விடக்கூடாது என்ற எண்ணத்தில், முதல்வர் விஜய் அனைத்து மத மக்களுடைய நம்பிக்கைகளையும் சமமாக பாவிப்பார் என்று நம்புகிறோம்.

திருப்பரங்குன்றத்தில் வெற்றி தீபம் ஏற்றிட உரிய வழிவகையை தமிழக அரசும் இந்து சமய அறநிலையத் துறையும் செய்ய வேண்டும் என்று கூறினார்.

*வரலாறு - முழு பின்னணி*

*1. 1920 - 1931 - மலை யாருக்கு சொந்தம்?*

O.S. No. 4 of 1920 வழக்கில், திருப்பரங்குன்றம் மலை முழுவதும் கோவிலுக்கு சொந்தம் என்றும், நெல்லித்தோப்பு, படிக்கட்டுகள், மசூதி அமைந்த இடம் மட்டும் விலக்கு என்றும் தீர்ப்பு வந்தது. இதை பிரிவி கவுன்சில் 1931-ல் உறுதி செய்தது. இதுவே இன்று வரை மலை உரிமைக்கான அடிப்படை ஆதாரம்.

*2. 1862 - 1912 - பழைய முயற்சிகள்*

1862-லும், 1912-லும் மலை உச்சியில் தீபம் ஏற்ற முயற்சி நடந்ததாகவும், அது மரபு அல்ல என்று தடுக்கப்பட்டதாகவும் 1923 தீர்ப்பில் பதிவாகியுள்ளது என்று அரசு தரப்பு கூறுகிறது.

*3. 1996 - 2014 - 2017 - பழைய உத்தரவுகள்*

1996-ல் உயர் நீதிமன்றம் தேவஸ்தானம் மட்டுமே தீபம் ஏற்ற வேண்டும், மரபு இடத்திலேயே ஏற்ற வேண்டும் என்று உத்தரவிட்டதாக அரசு தரப்பு கூறுகிறது. 2014, 2017-ல் மலை உச்சியில் தீபம் கேட்ட மனுக்கள் தள்ளுபடி செய்யப்பட்டன.

*4. 01.12.2025 - தனி நீதிபதி உத்தரவு*

W.P. (MD) No. 33197 of 2025-ல், நீதிபதி ஜி.ஆர். சுவாமிநாதன், தீபத்தூணில் கார்த்திகை தீபம் ஏற்ற வேண்டும் என்று உத்தரவிட்டார். தீபத்தூண் தர்காவிலிருந்து சுமார் 50 மீட்டர் தொலைவில், கீழ் சிகரத்தில் உள்ளது என்றும், விளக்கேற்றுவது புனித செயல், யார் மனதையும் புண்படுத்தாது என்றும் நீதிமன்றம் குறிப்பிட்டது.

*5. 03.12.2025 - 04.12.2025 - அவமதிப்பு வழக்கு*

உத்தரவு நிறைவேற்றப்படாததால், Cont.P. (MD) Nos. 3594, 3657 of 2025 மற்றும் Cont.P. (MD) No. 252 of 2026 ஆகிய அவமதிப்பு மனுக்கள் தாக்கல் செய்யப்பட்டன. CISF பாதுகாப்புடன் 10 பேர் சென்று தீபம் ஏற்ற நீதிமன்றம் அனுமதித்தது.

*6. 06.01.2026 - இரு நீதிபதிகள் அமர்வு உறுதி*

நீதிபதிகள் ஜி. ஜெயச்சந்திரன், கே.கே. ராமகிருஷ்ணன் அமர்வு, தனி நீதிபதி உத்தரவை உறுதி செய்து, அரசின் மேல்முறையீட்டை தள்ளுபடி செய்தது. தீபத்தூண் கோவிலுக்கு சொந்தமான இடத்தில் உள்ளது என்றும், சட்டம்-ஒழுங்கு அச்சம் கற்பனை என்றும் அமர்வு கூறியது.

*7. 09.04.2026 - இன்னொரு மனு தள்ளுபடி*

இந்து தர்ம பரிஷத் தொடர்ந்த இன்னொரு மனுவை உயர் நீதிமன்ற அமர்வு ரூ.50,000 அபராதத்துடன் தள்ளுபடி செய்தது.

*8. SLP (C) No. 17085/2026 - உச்ச நீதிமன்றம் முடித்த வழக்கு*

அந்த தள்ளுபடியை எதிர்த்து உச்ச நீதிமன்றம் சென்ற போது, நீதிமன்றம் தலையிட மறுத்து, அபராதத்தை மட்டும் ரூ.50,000-லிருந்து ரூ.5,000-ஆக குறைத்தது. இந்த வழக்கு முடிந்து விட்டது.

*செவ்வாய் 17.11.2026 - உச்ச நீதிமன்றத்தில் என்ன வருகிறது? - Cause List உறுதி*

உச்ச நீதிமன்ற அதிகாரப்பூர்வ Cause List-ல், 17.11.2026 செவ்வாய் அன்று, நீதிபதிகள் *அரவிந்த் குமார், விபுல் எம். பஞ்சோலி* அமர்வு முன்பு இரண்டு வழக்குகள் ஒன்றாக (Tag) வருகின்றன.

*வழக்கு 1: W.P.(C) No. 1280/2025 - Hindu Dharma Parishad v. Union of India*

கோவில் + மலை முழுவதையும் ASI-யிடம் ஒப்படைக்க வேண்டும், தீபத்தூணில் 24 மணி நேரமும் தீபம் எரிய வேண்டும், கார்த்திகையில் மலை முழுவதும் விளக்கு ஏற்ற வேண்டும் என்ற கோரிக்கை. 23.01.2026-ல் நோட்டீஸ் அனுப்பப்பட்டது.

*வழக்கு 2: Diary No. 36337/2026 - Commissioner, HR&CE v. Rama Ravikumar*

தமிழக அரசு / அறநிலையத் துறை தொடர்ந்த SLP. உயர் நீதிமன்றத்தின் 06.01.2026 உத்தரவை எதிர்த்து, 11.06.2026-ல் - த.வெ.க. அரசு பதவி ஏற்ற பிறகு - தாக்கல் செய்யப்பட்டது. 03.08.2026-ல் நோட்டீஸ் அனுப்பப்பட்டது. இதுவரை எந்த இடைக்கால தடையும் பிறப்பிக்கப்படவில்லை.

*அரசு தரப்பு பதில் - 12.11.2026:*

அறநிலையத் துறை ஆணையர் டி.ஜி. வினய் 12.11.2026-ல் எதிர் மனு தாக்கல் செய்தார். 1923 தீர்ப்பு, பிரிவி கவுன்சில் 1931 உறுதி, 150 ஆண்டு மரபு, 1996 உத்தரவு ஆகியவற்றை காட்டி ASI-யிடம் ஒப்படைக்க முடியாது என்றும், தீபத்தூண் கட்டுக்கதை என்றும் அரசு கூறியுள்ளது.

*கூடுதல் IA:*

மலை உச்சியில் CRPF பாதுகாப்பு கேட்டு கே.கே. ரமேஷ் தரப்பில் IA தாக்கல் செய்யப்பட்டுள்ளது.

*செவ்வாய் அன்று 3 சாத்தியங்கள்*

*1. உயர் நீதிமன்ற உத்தரவு உறுதி செய்யப்பட்டால் -* 24.11.2026-ல் தீபத்தூணில் தீபம் ஏற்றுவது கட்டாயமாகும்.

*2. இடைக்காலத் தடை வந்தால் -* இந்த ஆண்டு தீபம் பழைய இடத்திலேயே ஏற்றப்படும், வழக்கு தொடரும்.

*3. வழக்கு ஒத்தி வைக்கப்பட்டால் -* 24-ம் தேதிக்கு முன் மீண்டும் விசாரணை வரும், அப்போது தான் முடிவு தெரியும்.

*நிறைவு*

திருப்பரங்குன்றம் தீபம் வழக்கு உச்ச நீதிமன்றத்தில் உறுதியாக வெல்லும். அது வரலாறு சொல்லும்.

நீதிமன்றத்தில் தீபம் வழக்கு வெற்றி பெற்று வெற்றி தீபம் ஏற்றிட, அனைத்து பக்தர்களும் அடியார்களும் உலக இந்து தமிழர்கள் அனைவரும் இல்லத்தில் விளக்கேற்றி, உள்ளத்தில் விளக்கேற்றி, திருப்பரங்குன்றம் தீபத்தூணில் விளக்கேற்றிட உறுதி ஏற்க வேண்டும் என்று வேண்டுகோள் முன் வைத்தார்.

*வெற்றி வேல் முருகனுக்கு அரோ ஹரா* என நிறைவு செய்தார்.

*திரு. இராம. இரவிக்குமார்*

*இந்து தமிழர் கட்சி - நிறுவனத் தலைவர்*

*ஆசிரியர் குறிப்பு:* வழக்கு எண்கள் அதிகாரப்பூர்வ Cause List மற்றும் நீதிமன்ற செய்திகளிலிருந்து சரி பார்த்தவை.